1 KORINTI 4 - Wunta Mempori

Butu Ondae Ue Ala puu mpobitara 4:1-5

¹ Kanandiomo moikoano domengkita kami mia: kana tetenaa-Do i Kerisituu, anu ndi onae pine'ala-alaako rahasia-Do Ue Ala.

² Anu poko'ariano inema inso a luwuno puu pompekakaako anu kanandio onaemo, nine mengkaa tekona domempine'ala-ala.

³ Ndi ongkue tedei koa ntu'u pengkonaano ke komiu bintara aku ke a aasa pobitaraa mia. Tendeano maupo koroiku ongkueku nahi kubitarao.

⁴ Hangano lano nahina pinokonto'oriku, sine komba hangano atuu kupinokomenteeako. Ondae anu bitara aku, onaemo Ondae i Ue.

⁵ Onaemo pu'uno, si mpobitara ba napi tempono, onaemo ba napi Dohawe i Ue. Ira mokomewineo, saru mbo'u hapa anu tewuni a laro wongi-wongia, ka Ira mopokitao hapa anu tinoo i laro aroa. Ka sompo-sompo mia ta mohawe po'unde-unde inso ndi Ondae Ue Ala.

Impe'urumakomo 4:6-21

⁶ Pepaekompo luwu-luwu, luwuno pau andio kupokonao a ngkoroiku ongkueku ka ndi Apolo, hangano omiu, ka impepaguru inso a mpandirimami hapa pengkonaano pau, ”Si melaloo anu hinao teburi,” ka si hina i olomiu anu mompelangka-langkai mokolaluao anu aasa sekonopo anu susua.

⁷ Hangano isemake anu tumuduo laluakopo? Ka hapake anu hina ndi omue, anu nahi utarimao? Ka tewala lano utarimao, tembio ka umawongkoako, kana nahi utarimao?

⁸ Memowohi komiumo, gagi komiumo mengkaea, maupo nahi saru omami megagi komiumo mokole. Anai, tedoa moiko tewala mentee kanandio, nine megagi komiumo mokole, ranta omami mbo'u tetonda gagi mokole saru omiu.

⁹ Hangano, montonda pohaweku, omami luwuno tinena, Dopoweeakami Ue Ala po'ianga i totono ntu'u, mengkena kana mia anu mehinuku mate iramo, hangano megagi kamimo kikitaano wawontolino, luwuno mala'eka ka mia.

¹⁰ Mebenge-benge kami hangano Ondae i Kerisituu, sine mempande komiu ndi Ondae i Kerisituu. Omami memolema, sine omiu memoroso. Omiu memaramba, sine omami kodei tuwumami.

¹¹ Hawe a tempo andio memokoninggo kami, memokoranga, nahi kimpelemba, mentinunduhi ka tuwu mpelakopi,

¹² anggaa anu mobea kime'anggaakono kaemami. Tewala mempinepaukiako kami, mporonso kami; tewala mewineweunsa'o kami, mensabara kami;

¹³ tewala mempinosebe kami, kimesangkio mpiha moiko; megagi kamimo mpengkena kana rompono wawontolino, mengkena saru anu mokoburu inso a luwuakoano. Hawe kanandio-andio.

¹⁴ Kuburio mongkona andio komba ndio kupokoko'ii komiu, sine kumuahako komiu anaku anu pinehohawaku.

¹⁵ Hangano maupo mapasowu-sowu anu paguru komiu mongkona Ondae i Kerisituu, komba hadio amamiu. Nde ongkuemo gagi amamiu anu ndi Ondae i Kerisituu Yesu hangano Lele Mawongkoa anu kupaleleo ndi omiu.

¹⁶ Onaemo pu'uno ka ku'emao ndi omiu: imentondaomo pandiriku!

¹⁷ Onaemo pu'uno ka kutenao i Timotiu aiwa ndi omiu, onaemo ana anu pinehohawaku ka anu pine'ala-ala ndi Ondae i Ue. Onae ta mopoto'oriakomiu tuwua anu tinondaku ndi Ondae i Kerisituu Yesu, kana anu kupaguruako ira a sompo bawaa i sua-suamo koa.

¹⁸ Sine hinao ba opia mia anu gagi mompelangka-langkai, hangano potaedo, nine nami aku hawe mbo'u ndi omiu.

¹⁹ Sine aku koa ronga hawe ndi omiu, tewala po'ehe-Do i Ue. Ka aku koa tumo'orio, komba mongkona pinaudo mia anu mpompelangka-langkai atuu, sine mongkona rosodo.

²⁰ Hangano Poparentaa-Do Ue Ala komba hina inso a mpau, sine inso a mpabawa.

²¹ Hapake po'ehemiu? Asalakonoke ka ku'aiwaako ponsepi ndi omiu ke saru pompehohawa ka aroa anu mauru?