1 KORINTI 3 - Wunta Mempori

Teposisalaa 3:1-9

¹ Ka ongkue, pepaekompo, i tempo atuu nahi kupokompepauakomiu kana saru mia bukeako Penaa, sine butu saru mia tuwu ntolino anu napi sompo ponto'orino ndi Ondae i Kerisituu.

² Susu anu kuweeakomiu, komba kaanga motea, hangano napi mpokotarimao. Ka maupo kanandio-andio napi mpokotarimao.

³ Hangano da mia komiu mentuwu ntolino. Hangano, tewala i olomiu hinao kohili ka teposisala kombake mongkona atuu mokomengkaao, nine omiu mia mentuwu ntolino ka nine mentuwu komiu montonda po'eheno aroamiu?

⁴ Hangano tewala anu asa mia motae, ”Ongkue inso a bawaano i Paulu,” ka anu mehano mpotae, ”Ongkue inso a bawaano i Apolo,” kombake mongkona atuu mokomengkaao, nine omiu mia mentuwu ntolino anu komba rohani?

⁵ Gaagi, hapake i Apolo? Hapake i Paulu? Ondae puu mpo'angga-Do i Ue anu hangano ondae ka igagi mpompe'ala-ala, singge mia montonda sala anu Doweeakono i Ue.

⁶ Ongkue pahoo, i Apolo sumiwuio, sine Ondae Ue Ala anu motuwuo.

⁷ Onaemo pu'uno anu tinudu komba anu mompaho ke anu monsiwui, tendeano Ondae Ue Ala anu mompowee tuwua.

⁸ Moiko anu mompaho maupo anu monsiwui mengkena koa; ka singge mia ta tumarimao tambono menunu saru inanggano onaeno.

⁹ Hangano omami onaemo pe'asa mpo'angga-Do Ue Ala; omiu onaemo lere-Do Ue Ala, winangu-Do Ue Ala.

Pondasi ka winangu 3:10-23

¹⁰ Menunu saru pompehohawa-Do Ue Ala, anu Doweeakune, ongkue kana asa mia puu mpowangu anu pande monaa akumo pondasi, ka mia susua motilaloakono mowangu iwawono. Sine sompo-sompo mia asalakono ka ipepenteeo, ba kana'umpe ba ipowangu i wawono.

¹¹ Hangano nahina maupo te'asa mia anu polio monaa pondasi susua sekonopo pondasi anu ninaaomo, onaemo Ondae i Yesu Kerisituu,

¹² Ke mia ira mpowanguako wulaa a wawo mpodasi andio, ke salaka, watu paramata, keu, ewo mokari ke seami,

¹³ pohona te'upua inanggano singge mia ta koa tengkita. Hangano oleo-Do i Ue ta mokomengkaao, nde onae ta tengkitaako api ka ba kana'umpe inanggano singge mia ta inarahakoako api atuu.

¹⁴ Tewala anggaa anu winanguno asa mia nahi mo'ai, mia atuu ta mohawe tambo.

¹⁵ Tewala inanggano mo'ai, onae ta marugi, sine koroino ta kinadudui, sine kana inso a laro api.

¹⁶ Nahi imento'orioke, nine omiu raha-Do Ue Ala ka nine Penaa-Do Ue Ala mo'ia i laromiu?

¹⁷ Tewala hinao mia anu sumolangio raha-Do Ue Ala, asalakono mia atuu Ira sumolangio Ue Ala. Hangano raha-Do Ue Ala onaemo mempori ka raha-Do Ue Ala atuu onaemo omiu.

¹⁸ Ka si hina mia mopo'oo koroino onaeno. Tewala hinao i olomiu anu potaeno onae monto'ori montonda wawontolino andio, po'ineeomo ka igagi benge-benge, ka iponto'ori koa.

¹⁹ Hangano ponto'orino wawontolino andio Dopebenge-bengeo Ue Ala. Hangano hinao teburi, ”Ondae anu morako mia monto'ori a laro mpandeno mo'ungke akala.”

²⁰ Ka a mpo'ianga susua, ”Doto'orio i Ue luwuno tinoodo mia mponto'ori; Menteeano luwuno nahina tuduno.”

²¹ Onaemo pu'uno ka si hina mia anu mawongkoakono koroino a mia, hangano luwuakoano omiu umbuno:

²² moiko i Paulu, i Apolo, maupo i Kepasi, moiko wawontolino, tuwua, maupo matea, moiko tempo kanandio-andio, maupo tempo anu ta hawe. Luwuno omiu mpe'ueo.

²³ Sine omiu onaemo mia-Do i Kerisituu ka Ondae i Kerisituu onaemo mia-Do Ue Ala.