1 KORINTI 16 - Wunta Mempori

Pontulungi tiado bawaa i Yerusale 16:1-4

¹ Mongkona popumpua doi tiado mia memempori, po'ineeomo ka impoweweu menunu saru luwuno pontiso anu kuweeako ira luwuno bawaa i Galatia.

² A oleo amba-ambano sompo-sompo minggu po'ineeomo omiu singge mia – menunu saru hapa anu hinawemiu – impompesusua hinawemiu ka imenaao i raha, ka si amba mpopumpu, ba hawe akumo.

³ Tewala hawe akumo, aku tumena ira mia, anu mempine'ala-alamiu, melako i Yerusale mpowawa wunta ka dompohaweo pompoweemiu.

⁴ Tewala mengkaa kinere ka kulako mbo'u, asalakono ira melako mperonga saru ongkue.

Sinongkano i Paulu 16:5-9

⁵ Aku koa aiwa ndi omiu, umariku lumaloo Makedonia, hangano aku koa lumaloo Makedonia.

⁶ Ka i Korinti bara'ura aku mo'ia saru omiu ba te'opia tehineno ke bara'ura aku mo'ia i larono tempo morini, ka impokotulungi aku motilaloakono pelempaaku.

⁷ Hangano kanandio-andio nahi kubehe butu telalo sarai kumita komiu. Momperorohi aku ka kupokompo'ia tehi-tehine saru omiu, tewala Dope'eheo koa i Ue.

⁸ Sine aku mo'ia i Epesu hawe oleo langkai Pentakosotaa,

⁹ hangano i ndi'ai hadio tempoku umanggao anggaa anu langkai ka mentudu, maupo hadio anu umewaio.

Ba opia pompopoto'ori 16:10-18

¹⁰ Tewala hawe i Timotiu ndi omiu, impesu'uio ka si doito mo'ia i olomiu, hangano onae umanggao anggaa-Do i Ue, mengkena kana ongkue.

¹¹ Gaagi, si hina mia anu me'uru-uruo! Sine imentulungio, ka ipotilaloakono pelempaano temoiko, ka iwali hawe ndi ongkue, hangano ongkue i ndi'ai sumikorio haweano mperonga saru pepaekompo anu mehano.

¹² Mongkona pepaekompo i Apolo: mararuomo kudadaio ka iperongaako ira pepaekompo mehano aiwa tepohaweakomiu, sine nahi behe ntu'u aiwa kanandio-andio. Tewala hinao tempo moiko te'upua, ta koa aiwa.

¹³ Impetangkoromo! Impentademo temoroso a pompe'ala-ala! Imemosia koa! Ka moroso mpiha!

¹⁴ Ime'anggaomo luwuno anggaamiu a laro pompehohawa!

¹⁵ Hinao mbo'u aasa inema ndi omiu, pepaekompo. Imento'orio, nine i Setepanu ka somborino ondaemo mia anu amba-ambano ntepidi i Akaya, ka nine dompeweengakonomo koroido mpekakaako ira mia mempori.

¹⁶ Onaemo pu'uno imperorongeako ira mia anu kanandio ka sompo mia anu metonda mo'angga ka me'isei.

¹⁷ Mawongko aroaku hawedo i Setepanu, i Porotunatu ka i Akaiku, hangano ondae mpokosompoo hapa anu da makura ndi omiu;

¹⁸ hangano dompokosanaao aroaku ka aroamiu. Imentudu ira mia anu kanandio!

Tabea 16:19-24

¹⁹ Tabea ndi omiu inso a luwuno bawaa i Asia Kodei. I Akiwila, i Perisikila ka Bawaa i rahado mpo'oliwi tabea hadio ntu'u ndi omiu.

²⁰ Tabeado luwuno pepaekompo ndi omiu. Imambe pohaweako tabea saru pewoo-woo mempori.

²¹ Kaeku ongkueku burio andio: Tabea inso ndi Paulu.

²² Isema nahi kekewoi Ira i Ue, tetotonaaomo. Maranata!

²³ Pompehohawa-Do Ue Yesu kumongkomi komiu.

²⁴ Pompehohawaku kumongkomi komiu luwu a ntepo'asaa ndi Ondae i Kerisituu Yesu.