1 KORINTI 14 - Wunta Mempori

Pohonapo mbo'u mongkona pompowee-Do Penaa 14:1-25

¹ Ime'ungkeomo ntu'u pompehohawa atuu ka impeteahako ka imehawe ira koa pompowee-Do Penaa, tamoako lahi pompowee ka impompau anu ta gagi.

² Isema anu mepauako mperupa-rupa pau, komba mepau a mia, sine ndi Ondae Ue Ala. Hangano nahina maupo te'asa mia anu mokonto'orio pauno; hangano Penaa ipau ira anu mentewuni.

³ Sine isema mompau anu ta gagi, onae mepau a mia, onae mowangu, mompatudu ka montarero.

⁴ Isema anu mepauako pau penaa, onae mowangu koroino onaeno, sine isema mompau anu ta gagi, onae mowangu bawaa.

⁵ Ineheku, ka impepauako luwu pau penaa, sine laluaopo lahi ka impompau anu ta gagi. Hangano mia anu mompau anu ta gagi moikoopo lahi sekono mia anu mepauako pau penaa, sangkadio tewala mia atuu pauo mbo'u pengkonaano, ka bawaa pinokowangu.

⁶ Gaagi, pepaekompo luwu-luwu, tewala aiwa aku ndi omiu ka kupepauako pau penaa, hapake tuduno atuu ndi omiu, tewala nahi kupohaweakomiu pinokomengkaa-Do Ue Ala ke ponto'ori ke mompau anu ta gagi ke pompaguru?

⁷ Mengkena teweweuno saru luwuno parewa anu nahina penaano, sine anu me'uni kana siloli ka katapi – kana'umpeke mia ka dompokoto'orio penani hapake anu pinesiloliako ke katapi, tewala oruano nahi poluarako uni anu teposisingge?

⁸ Ke, tewala tawuwua nahi teronge unino, isemake anu mepatinda ta lumako metea?

⁹ Kanandio koa mbo'u omiu anu mpepauako pau penaa: tewala nahi impepauako pau anu tino'ori, kana'umpeke mia ira mpokonto'orio hapa anu pinaumiu? Paumiu tetadi-tadi mpena imempauo i laro meene!

¹⁰ Hadio – ke ba opia hadiono – rupano pau i wawontolino; maupo kanandio nahina maupo te'asa i olono anu me'uni nahina pengkonaano.

¹¹ Sine tewala nahi kuto'orio pengkonaano pau atuu, gagi aku mia hawe a mia anu mepauako ka onae mia hawe ndi ongkue.

¹² Kanandio koa mbo'u omiu: Omiu lano mpeteahako ka imehawe ira pompowee-Do Penaa, sine laluaopo sekono atuu ime'ungkeakono mempakeo mowangu bawaa.

¹³ Onaemo pu'uno isema anu mepauako pau penaa, asalakono ka ipekakai, ka ipinoweeako koa mbo'u pompowee ka ipauo pengkonaano.

¹⁴ Hangano tewala kupekakaiako pau penaa, ka penaakumo anu mekakai, sine pinewowolo molinoku nahi petonda mekakai.

¹⁵ Gaagi, hapake asalakono kupoweweu? Aku mekakaiako penaaku, sine aku koa mbo'u mekakaiako pinewowolo molinoku; aku menani ka mo'unde-undeako penaaku, sine aku koa mbo'u menani ka mo'unde-undeako pinewowolo molinoku.

¹⁶ Hangano, tewala omue butu montarimakasiako penaamu, kana'umpeke mia anu mehawe mporonge mpokompotae ”ami” a mpontarimakasimu? Kombake onae nahi to'orio hapa anu pinaumu?

¹⁷ Hangano maupo tedoa moiko upauo pontarimakasimu atuu, sine mia susua nahi wanguo.

¹⁸ Montarimakasi aku ndi Ondae Ue Ala, nine ongkue mepauako pau penaa lumaloi komiu luwu.

¹⁹ Sine a laro ntepotowoa bawaa lalukupo pauo olima mpali pau anu pinokonto'ori pompaguru mia susua mbo'u, sekonopo mapasowu-sowu mpali pau mepauako pau penaa.

²⁰ Pepaekompo luwu-luwu, si mpompewowolo mengkena kana nana'ote. A mosa'oa imegagimo nana-ote, sine pinewowolomiu kana mia sompoomo tinuwuno!

²¹ A laro Songka hinao teburi, ”Mesala a mia anu susua paudo ka wiwido mia mehawe Aku mepauako ira tongku andio, sine maupo kanandio nahi ira mperorongea-Kune, pau-Do i Ue.”

²² Onaemo pu'uno pompowee mepauako pau penaa onaemo petondoni, komba tiado mia mpompe'ala-ala, sine tiado mia anu nahi dompompe'ala-ala; sine pompowee ka ipompau anu ta gagi onaemo petondoni, komba tiado mia anu nahi dompompe'ala-ala, sine tiado mia anu mpompe'ala-ala.

²³ Gaagi, tewala luwuno bawaa mpepumpu memoroko ka sompo-sompo mia mepauako pau penaa, ka do'amba mpewinso mia susua ke mia anu nahi dompompe'ala-ala, nahi ira mpotaeke nine mpekombe komiu?

²⁴ Sine tewala luwuno mpompau anu ta gagi, ka do'amba mpewinso mia anu nahi dompompe'ala-ala ke mia anu da iaopo domehawe, luwuno ta mokomanasaakono luwuno anu paresao;

²⁵ Luwuno anu tewuni i laro aroano ta gagi mengkaa, onaemo ka ta menggolontu mesombai Ira Ue Ala ka mangaku, ”Mentee ntu'u, Ondae Ue Ala kongko Ira i tonga-tongamiu.”

Atora a ntepotowoa bawaa 14:26-40

²⁶ Gaagi kana'umpe kanandio-andio, pepaekompo? Tewala mpepumpu komiu, po'ineeomo sompo-sompo mia hinao pinesombaakono: anu asa mia penani po'unde-unde, anu susua pompaguru, ke pinokomengkaa-Do Ue Ala, ke pompowee mepauako pau penaa, ke pompowee ka ipauo pengkonaano pau penaa, sine luwuno atuu asalakono ka ipinake mowangu.

²⁷ Tewala hinao anu mepauako pau penaa, po'ineeomo te'orua ke hadionomo otolu mia, nte'o'asa mia, ka asalakono ka ihina mia susua pauo pengkonaano.

²⁸ Tewala nahina mia anu mokopauo pengkonaano, moikoopo domengkomino a laro ntepotowoa bawaa ka butu a ngkoroino onaeno moiko ipepau ka ndi Ondae Ue Ala.

²⁹ Mongkona luwuno nabi – moikoomo te'orua ke te'otolu mia i olodo mepau ka anu mehano mentimbangao hapa anu mempinaudo.

³⁰ Sine tewala asa mia susua anu mentoro i tu'ai mohawe pepokomengkaa, ka anu amba-ambano atuu asalakono ka ikomino.

³¹ Hangano luwumiu moiko impompau anu ta gagi nte'o'asa mia, ranta ka impokompepaguru luwu ka mpohawe roso.

³² Pompowee a nabi momperorongeako a luwuno nabi.

³³ Hangano Ondae Ue Ala nahi Dope'eheo marisua, sine rodoa.

³⁴ Mengkena kana a luwuno bawaado mia mempori, beine asalakono ka domengkomino a luwuno tepumpua bawaa. Hangano nahi dome'ineheako mpepau. Asalakono ka dompetuundu, kana anu pinau koa mbo'u a songka Taura.

³⁵ Tewala hinao anu inehedo mento'orio, moikoomo dompesikenoakono a ntamado i raha. Hangano komba gau ba ipepau beine a tepumpua bawaa.

³⁶ Nde hinaoke pau-Do Ue Ala mompu'u inso ndi omiu? Ke butu koa ndi omiu ihawe pau-Do Ue Ala atuu?

³⁷ Tewala asa mia tumuduo koroino nabi ke mia anu mohawe pompowee rohani, asalakono ka ito'orio, nine anu kupauakomiu onaemo parenta-Do i Ue.

³⁸ Sine tewala nahi perioo, siimo imperioo.

³⁹ Onaemo pu'uno, pepaekompoku, impeteahako ka impohawe pompowee mompau anu ta gagi ka si me'onto ira mia anu mpepauako pau penaa.

⁴⁰ Sine luwuakoano asalakono ka igagimo montonda gau ka te'atora.