1 KORINTI 13 - Wunta Mempori

Pompehohawa 13:1-13

¹ Maupo kupolio mepauako luwuno paudo mia ka paudo mala'eka, sine tewala nahina pompehohawaku, mengkena akumo saru tawa-tawa anu me'uni ka dio-dio anu mangkii.

² Maupo kupohawe pompowee ka kupompau anu ta gagi ka kuto'orio luwu anu tewuni ka tumo'orio luwuno ponto'ori; ka maupo bobotoli pompe'ala-alaku ka kupolimba torukuno, sine tewala nahina pompehohawa, nahina ntu'u tuduku.

³ Ka maupo kutia-tiao luwuakoano anu hina ndi ongkue, tendeano meweengakono koroiku ka itinunu, sine nahina pompehohawa, maupo tedei nahina tuduno ndi ongkue.

⁴ Pompehohawa atuu sabara; pompehohawa atuu me'aroa; nahi monsiri. Nahi pehamba-hamba ka nahi pompelangka-langkai.

⁵ Onae nahi poweweu anu nahi pontonda gau ka nahi po'ungke moikoano onaeno. Onae nahi marantekuda ka nahi ponaa-naa aroa a mia susua.

⁶ Nahi mawongkoakono anu nahi moleo, sine imawongkoakono menteea.

⁷ Ipeteao luwuakoano, me'ala-alao luwuakoano, mompe'osai luwuakoano, sabara tumembio luwuakoano.

⁸ Pompehohawa nahi ta menaa-naa; pau anu ta gagi ta upu; pau penaa ta menaa-naa; ponto'ori ta moliu.

⁹ Hangano ponto'orito nahi soompo ka pompauto anu ta gagi nahi soompo.

¹⁰ Sine tewala hawe anu soompo, ka anu nahi sompo atuu ta moliu.

¹¹ Tempono kunana'ote, kupepau kana nana'ote, ponto'oriku kana nana'ote, kupompewowolo kana nana'ote. Kanandio-andio sompoomo tinuwuku, kubintao pelelu nana'ote atuu.

¹² Hangano kanandio-andio tomengkitao a ntami aasa eo-eo anu rawu-rawu, sine te'upua kitamo ntepoporupa. Kanandio-andio napi kuto'orio ntu'u, sine te'upua aku koa tumo'orio ntu'u, kana kutino'ori.

¹³ Kanandiomo ipo'ia otolu rupa andio, onaemo pompe'ala-ala, pomperorohia ka pompehohawa, ka anu lalu langkai i olodo onaemo pompehohawa.