1 KORINTI 12 - Wunta Mempori

Mperupa-rupa pompowee sine aasa koa Penaa 12:1-11

¹ Kanandio-andio mongkona luwuno pompowee-Do Penaa. Ineheku, pepaekompo luwu-luwu, ka imento'orio menteeano.

² Imento'orio, nine i tempono napi imento'ori Ira Ue Ala, nahi konde impompewowolo mempinadii komiu a luwuno lahumoa anu beebe.

³ Onaemo pu'uno ka kupauakomiu, nine nahina maupo te'asa mia anu mepau hangano Penaa-Do Ue Ala, mokompotae, ”Tetotonaa Iramo i Yesu!” ka nahina maupo te'asa mia, anu mokomangaku, ”Ondae i Yesu Ue,” sangkadio hangano Penaa Mempori.

⁴ Hinao mperupa-rupa pompowee, sine aasa koa Penaa.

⁵ Ka hinao mperupa-rupa pompekakaako, sine Ondae i Ue aasa koa.

⁶ Ka hinao mperupa-rupa wineweu kinohali-haliako, sine Ondae Ue Ala aasa koa anu umanggao luwuno a laro luwuno mia.

⁷ Sine a sompo-sompo mia pinoweeako mengkaa-Do Penaa gagi moikoado luwu.

⁸ Hangano a mia anu aasa Ondae Penaa moweeakono pompowee ka ipepauako ponto'ori anu mentee, ka a mia anu susua Ondae Penaa anu mengkena moweeakono pompowee ka ipepauako ponto'ori mompewowolo.

⁹ A mia anu aasa Ondae Penaa anu mengkena moweeakono pompe'ala-ala, ka a mia anu susua Dopoweeakono pompowee ka ipompokotompa.

¹⁰ A mia anu aasa Ondae Penaa moweeakono pabawa ka ipoweweu anu kinohali-haliako, ka a mia anu susua Dopoweeakono ka ipompau anu ta gagi, ka a mia anu susua mbo'u Dopoweeakono pompowee ka iponto'ori mosisalao mperupa-rupa penaa. A mia anu aasa Dopoweeakono pompowee ka ipepauako mperupa-rupa pau, ka a mia anu susua Dopoweeakono pompowee ka iponto'ori pauo pengkonaano mperupa-rupa pau atuu.

¹¹ Sine luwuno andio Do'anggao Penaa anu aasa ka anu mengkena, anu moweeako ira pompowee a sompo-sompo mia anu tepakosi, kana anu inehe-Do.

Hadio parewa, sine aasa koroi 12:12-31

¹² Hangano mengkena kana koroi atuu aasa ka parewano hadio, ka luwuno parewa atuu, maupo hadio, me'asa ngkoroi koa, kanandio koa mbo'u Ondae i Kerisituu.

¹³ Hangano a laro aasa Penaa luwuto, moiko to Yahudi, maupo to Yunani, moiko ata, maupo mia maradeka, mebinaho kitamo luwu gagi asa ngkoroi ka luwuto mempinopo'inu inso a aasa Penaa.

¹⁴ Hangano koroi mbo'u komba butu aasa parewano, sine hadio parewano.

¹⁵ Tewala motae karu, ”Hangano ongkue komba kae, nahi kutewinso a ngkoroi,” gaagi menteeke nahi tewinso a ngkoroi?

¹⁶ Ka tewala motae biri, ”Hangano ongkue komba mata, nahi kutewinso a ngkoroi,” gaagi menteeke nahi tewinso a ngkoroi?

¹⁷ Tewala asa ngkoroi onaemo mata, isuaomoke poronge? Tewala luwuno gagi biri, isuaomoke powoo?

¹⁸ Sine Ondae Ue Ala moweeako iramo po'iangado nte'o'asa parewa a ngkoroi kana po'ehe-Do.

¹⁹ Tewala luwuno onaemo aasa parewa, isuaomoke koroi?

²⁰ Lano hadio parewano, sine koroi aasa koa.

²¹ Gaagi mata nahi ta motaeakono kae, ”Nahi kukereko.” Ka ulu nahi ta motaeakono karu, ”Nahi kukereko.”

²² Tendeano luwuno parewa ngkoroi anu tengkita lalu molema, anu tedoa kinere.

²³ Ka a luwuno parewa ngkoroi anu montonda pongkitato makura ipinelangkai, tompoweeakono pompelangkai susua. Ka a luwuno parewa ngkoroito anu nahi tekosi, onae lalu tompekakaakono.

²⁴ Pompekakaako kanatuu nahi domengkereo parewa ngkoroito anu tekosi. Kanatuumo Dopotudao Ue Ala koroito, ranta a luwuno parewa ngkoroito anu nahi maramba pinoweeako pompelangkai susua,

²⁵ ka si gagi teposisalaa a laro ngkoroi, sine ka domambe pekakaako luwuno parewa anu nteposisingge atuu.

²⁶ Onaemo pu'uno tewala aasa parewa anu mompemahaki, luwuno parewa mpetonda mpompemahaki; tewala aasa parewa pinelangkai, luwuno parewa ntetonda mawongko.

²⁷ Omiumo luwu koroi-Do i Kerisituu ka omiu singge mia parewa ngkoroi-Do.

²⁸ Ka Dopakosiomo Ue Ala ba opia mia a laro bawaa: ko'aasa gagi tinena, ko'orua gagi nabi, ko'otolu anu mompaguru. Ka i'amba ondae anu mpohawe pompowee ka dompoweweu anu kinohali-haliako, ka dompompokotompa, ka dompompekakaako, ka dompetewawa, ka dompepauako pau penaa.

²⁹ Luwudoke tinena, ke nabi, ke anu pompaguru? Luwudoke mpohawe pompowee mpoweweu anu kinohali-haliako,

³⁰ ke ka dompompokotompa, ke ka dompepauako pau penaa, ke ka dompompau pengkonaano pau penaa?

³¹ Gaagi impeteahakomo ka imehawe ira pompowee anu lalu moiko. Ka aku montisoakomiu sala anu lalu moiko mbo'u.