1 KORINTI 11 - Wunta Mempori

¹ Imetonda akumo, mengkena koa mbo'u kana ongkue metonda ndi Ondae i Kerisituu.

Ramba-ramba uluno beine 11:2-16

² Asalakono ku'unde-unde komiu, hangano a laro luwuakoano impewowolo aku mpiha ka mpe'ini moroso a pompaguru anu kupotilaloakono ndi omiu.

³ Sine ineheku, ka imento'orio mongkona andio, onaemo petewawano sompo tama Ondaemo i Kerisituu, petewawano beine onaemo tama ka petewawa-Do i Kerisituu onaemo Ondae Ue Ala.

⁴ Sompo-sompo tama anu mekakai ke mompau anu ta gagi saru kongko tutuwi uluno, ipokoko'iio uluno.

⁵ Sompo-sompo beine anu mekakai ke mompau anu ta gagi ka nahi tutuwio uluno, ipokoko'iio uluno, hangano onae mengkena saru beine anu kineru wuuno.

⁶ Hangano tewala beine nahi behe tumutuwio uluno, asalakono ka igontio koa mbo'u wuuno. Sine tewala a beine onaemo mokoko'iia, nine wuuno ginonti ke kineru, ka asalakono ka itutuwio uluno.

⁷ Hangano tama siimo itutuwio uluno: onae mewantahiako gambara ka maramba-Do Ue Ala. Sine beine mewantahiako marambano tama.

⁸ Hangano tama komba te'inso a beine, sine beine te'inso a ntama.

⁹ Ka tama komba pinokogagi hangano beine, sine beine pinokogagi hangano tama.

¹⁰ Onaemo pu'uno, beine asalakono ka ipompokona petondoni pabawa a uluno hangano luwuno mala'eka.

¹¹ Sine maupo kanandio, ndi Ondae i Ue nahina beine ba nahina tama ka nahina tama ba nahina beine.

¹² Hangano mengkena kana beine te'inso a ntama, kanandio koa mbo'u tama ipe'anaakono beine; ka luwuakoano te'inso ndi Ondae Ue Ala.

¹³ Imentimbangaomo liomiu: Metoto koake beine mekakai ndi Ondae Ue Ala ba nahi tutuwio uluno?

¹⁴ Kombake wawontolino isa'a mokomengkaa ndi omiu, nine onaemo tataano tama, tewala onae mewuu ondau,

¹⁵ sine a beine onaemo pelangkaino, tewala onae mewuu ondau? Hangano wuu wineeako beine gagi petutuwino.

¹⁶ Sine tewala hinao mia anu mingki mengengeakono, omami maupo luwuno bawaa-Do Ue Ala komba kimeleleoakono anu kanandio.

Luwuno gau anu sala a pelimbua wongi 11:17-34

¹⁷ Sine a luwuno atora anu tudano nahi kupolio umunde-unde komiu, hangano luwuno tepotowoamiu nahi powawa moikoa, sine mowawa mosa'oa.

¹⁸ Hangano amba-ambano kurongeo, nine tewala ntepumpu komiu a tempumpua bawaa, hinao teposisalaa i olomiu, ka mongkona atuu tedei hadio kupe'ala-alao.

¹⁹ Hangano i olomiu hinao teposisalaa, ka imengkaa lembuino isema i olomiu anu mokompompetea.

²⁰ Tewala ntepumpu komiu, komba ntepumpu komiu pongkaa a pelimbua-Do i Ue.

²¹ Hangano a pelimbua atuu sompo-sompo mia kumaano se'elu kaangano onaeno, onaemo ka imokoninggo anu asa mia ka anu mehano molangu.

²² Nde nahinake lano rahamiu ka impongkaa ka mpo'inu? Ke inehemiu tokoa mokongkodei ira bawaa-Do Ue Ala ka mokoko'ii ira mia anu nahina hapa-hapado? Hapake anu kupauakomiu? Umunde-unde komiu? Anu kanandio komba ku'unde-undeo.

²³ Hangano hapa anu kupohaweo ndi omiu, kutarimaomo inso ndi Ondae i Ue, onaemo nine Ondae i Ue Yesu, a wongi tempono Dopineweengako, mo'ala Ira roti

²⁴ ka umarino atuu Dopontarimakasiakono; Dosiba-sibao ka Dopotae, ”Ndiomo koroi-Ku, anu pineweengako hangano omiu; imeweweuomo andio gagi rorambe-Ku!”

²⁵ Kanandio koa mbo'u Do'alao tonde, umari-Do mongkaa, ka Do'amba motae, ”Tonde andio onaemo pedandia wo'ohu anu tinondoniako rea-Ku; imeweweuomo andio, sompo ime'inuo, gagi rorambe-Ku!”

²⁶ Hangano sompo impongkaa roti andio ka mpo'inu a ntonde andio, imempaleleo matea-Do i Ue ranta ka Dohawe.

²⁷ Gaagi ba isema anu nahi pototono ka ipongkaa roti ke mo'inu a ntonde-Do i Ue, onae tehala a ngkoroi-Do ka rea-Do i Ue.

²⁸ Onaemo pu'uno sompo-sompo mia ka iparesao koroino onaeno ka i'amba umarino atuu ikaano roti ka mo'inu inso a ntonde atuu.

²⁹ Hangano ba isema mongkaa ka mo'inu nahi tuduo koroi-Do i Ue, moweweuomo hukuno koroino.

³⁰ Onaemo pu'uno hadio i olomiu anu molema ka mahaki, ka komba tedei anu mate.

³¹ Tewala toparesao koroito ontaeto, nahi alu kita pohuku.

³² Sine tewala montarima kita pohuku inso ndi Ondae i Ue, mempinaguru kita, ka si tomehinuku meronga saru wawontolino.

³³ Onaemo pu'uno, pepaekompoku luwu-luwu, tewala komiu mpepumpu mpongkaa, imambesikori koa.

³⁴ Tewala hinao mia anu mokoninggo, laluopo ka ipongkaa ari i rahano, ka si mpepumpu ka imehinuku. Mongkona anu mehano ka ku'amba umatorao, ba kuhawe.