1 KORINTI 10 - Wunta Mempori

To Isaraeli gagi aasa pompopoto'ori 10:1–11:1

¹ Ineheku, ka imento'orio, pepaekompo luwu-luwu, nine luwudo uempu'uto mekongko a ntoto po'engoino seru ka nine mpolalo iramo tahi.

² Ka domegagi mpetonda ndi Musa mebinaho iramo luwu a laro nseru ka a laro ntahi.

³ Luwudo mpongkaa kaanga rohani anu mengkena

⁴ ka luwudo mpo'inu inua rohani anu mengkena, hangano mpo'inu ira inso a watu manaha rohani anu tumonda ira, ka watu manaha atuu onaemo Ondae i Kerisituu.

⁵ Sine maupo kanatuu asa ntia langkai inso ndi ondae nahi Dopemoiko ira Ue Ala, hangano mempinepate ira i pada one.

⁶ Luwuno andio gagiomo pandiri ndi ontae anu mopoto'oriakita, ka si tomemosisiriakono luwuno anu mosa'o kana anu domeweweuomo,

⁷ ka si tomegagi mia mpesomba a lahumoa, mengkena kana ba opia mia inso ndi ondae, kana hinao teburi, ”Ka mpentoro iramo tongku atuu ira mpongkaa ka mpo'inu; ka do'amba mpentade ka memawongko.”

⁸ Si tompogauo mebelesu, kana anu pinogaudo ba opia mia inso ndi ondae, ranta i aasa oleo mateomo rua pulu ka otolu nsowu mia.

⁹ Ka si tome'ara-arahako Ira i Ue, kana anu wineweudo ba opia mia inso ndi ondae, ranta ka domemate itungku ira ule.

¹⁰ Ka si mpewuruki, kana anu wineweudo ba opia mia inso ndi ondae, ranta mala'eka pompepate mepate ira.

¹¹ Luwuno andio i'alu iramo gagi pandiri ka binuri gagi pompopoto'ori ndi ontae anu mentuwu a mpokotompaano tempo.

¹² Onaemo pu'uno isema anu potaeno, nine onae moroso mentade, ipompesu'uimo ka si tebangku!

¹³ Luwuno po'ara-arahako anu pinembasaimiu onaemo luwuno po'ara-arahako anu lano dompembasaio mia, anu nahi laloio rosono mia. Hangano Ondae Ue Ala nahi bali pokongkomi-Do ka onaemo pu'uno nahi Ira mo'inee komiu ka ime'inara-arahako lumaloio rosomiu. Tempono ime'inara-arahako Ira moweeakomiu sala peluarakoa, ranta ka impokotembio.

¹⁴ Onaemo pu'uno, pepaekompo luwu-luwu anu pinehohawaku, ime'olaiakonomo mpesomba a lahumoa!

¹⁵ Kupepau ndi omiu kana mia anu mempande mposongka. Omiumo mpewowoloo hapa anu pinauku!

¹⁶ Kombake tonde pontarimakasi anu tompontarimakasiako, onaemo tepo'asaa saru rea-Do i Kerisituu? Kombake roti anu siniba-sibato onaemo tepo'asaa saru koroi-Do i Kerisituu?

¹⁷ Hangano roti aasa, ka ontae maupo tomehadio, mpe'asa ngkoroi, hangano mpohawe kita luwu tia a roti anu aasa atuu.

¹⁸ Impepentee ira tongku Isaraeli montonda ihi: kombake ondae anu mpongkaa hapa anu pinesombaako mpohawe tia a pompekakaakoa meda pontunua pesomba?

¹⁹ Hapake anu tinooku saru pau atuu? Nine pesomba a lahumoa hinao pengkonaano? Ke nine lahumoa hinao pengkonaano?

²⁰ Naahi, hapa anu tinooku onaemo, nine pesombado onaemo pesomba a onitu nsa'o, komba ndi Ondae Ue Ala. Ka nahi kubehe, intepo'asaako ira onitu nsa'o.

²¹ Nahi komiu mpokompo'inu inso a ntonde-Do i Ue ka inso mbo'u a ntondedo onitu nsa'o. Nahi komiu mpokompohawe tia a mpelimbua-Do i Ue ka a pelimbuado mbo'u onitu nsa'o.

²² Ke kita mpokotesingkaoke mosa'ono aroa-Do i Ue? Nde memoroso kitapoke sekono Ondae?

²³ ”Luwuakoano ininduako.” Mentee, sine komba luwuakoano mentudu. ”Luwuakoano ininduako.” Mentee, sine komba luwuakoano mowongu.

²⁴ Si hina maupo te'asa mia anu mo'ungke moikoano tuwuno onaeno, sine asalakono sompo-sompo mia mo'ungke moikoano tuwudo mia mehano.

²⁵ Moiko imengkaano luwuakoano anu inasa a olu po'asaa bau, siimo ipinaresa hangano kabaratano aroa.

²⁶ Hangano, ”Tolino ka luwuno ihino Ondae i Ue me'ueo.”

²⁷ Tewala asa mia anu nahi pompe'ala-ala umolu komiu mpongkaa, ka inehemiu koa melako, imengkaanomo hapamo koa anu ipatindaa komiu, siimo imemparesao hangano kabaratano aroa.

²⁸ Sine tewala asa mia motaeakomiu, ”Pesomba a lahumoa atuu!” si kaano, hangano onae anu pauakomu ka hangano kabaratano aroa.

²⁹ Kabarata anu tinooku komba kabaratano aroamu, sine kabaratano aroado mia susua atuu. Bara'ura hinao mia anu motae, ”Tembio po'eheno aroaku ka i'asalakono itantuio kabaratano aroano mia susua?

³⁰ Tewala montarimakasi aku a hapa anu kupetonda kumaano, tembio ka dompepauikiakune mia hangano kaanga, hangano onae kupontarimakasiakono?”

³¹ Sumangki aku: Tewala mongkaako ke mo'inu, ke tewala hinao wineweumu anu susua, weweuomo luwuno atuu melangkai Ira Ue Ala.

³² Si mpokonanta-nantaako ira mia aroado, moiko to Yahudi ke to Yunani maupo bawaa-Do Ue Ala.

³³ Mengkena koa mbo'u kana ongkue umungkeakono mokonsanaao aroado luwuno mia a laro luwuakoano, komba moikoaku, sine moikoado mia hadio, ka domentekadudui.