1 KORINTI 1 - Wunta Mempori

Tabea 1:1-3

¹ Inso ndi Paulu, anu hangano po'ehe-Do Ue Ala pinoboi gagi tinena-Do i Kerisituu Yesu, ka inso ndi Sositene, pepaekompoto,

² a bawaa-Do Ue Ala i Korinti, onaemo ondae anu pinokomempori ndi Ondae i Kerisituu Yesu ka anu mempinoboi gagi mia memempori, saru luwuno mia a luwuno po'ianga, anu mpebooli a nee-Do Ueto i Yesu Kerisituu, onaemo Uedo ka Ueto.

³ Pompehohawa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.

Pontarimakasi 1:4-9

⁴ Montarimakasi aku mpiha ndi Ondae Ue Alaku hangano omiu a mpe'aroa-Do Ue Ala anu Doweeakomiu ndi Ondae i Kerisituu Yesu.

⁵ Hangano ndi Ondae gagi komiumo mengkaea a luwuakoano: a laro mperupa-rupa pinau ka mperupa-rupa ponto'ori,

⁶ menunu saru ponsakosii mongkona Ondae i Kerisituu, anu pinokomorosoomo i olomiu.

⁷ Kanandiomo omiu nahi memakuraako maupo te'asa pompowee kontongaamiu mensikorio hawe-Do Ueto i Yesu Kerisituu.

⁸ Ira koa mbo'u mokoroso komiu hawe a mpoko'ariano, ranta nahina tataamiu a oleo-Do Ueto i Yesu Kerisituu.

⁹ Ondae Ue Ala, anu moboi komiu a ntepo'asaa saru Ana-Do i Yesu Kerisituu, Ueto, anu nahi bali.

Teposisalaa a laro bawaa 1:10-17

¹⁰ Sine ku'oliwi komiu, pepaekompo, a nee-Do Ueto i Yesu Kerisituu, ka impe'asa mpau ka si hina teposisalaa i olomiu, sine tendeano ka imemoroso ntepo'asa ka mpe'asa aroa mpe'asa pompewowolo.

¹¹ Hangano, pepaekompoku, domempauakunemo mia inso a nsomborino i Keloe mongkona omiu, nine hinao teposisalaa i olomiu.

¹² Anu tinooku onaemo, nine singge komiu mpotae: Ongkue inso a binawaano i Paulu. Ke ongkue inso a binawaano i Apolo. Ke ongkue inso a binawaano i Kepa. Ke ongkue inso a binawaa-Do i Kerisituu.

¹³ Nde tetia-tia Irake i Kerisituu? Nde pinaso a ngkeu pinotambake i Paulu hangano omiu? Ke mebinaho komiuke a neeno i Paulu?

¹⁴ Montarimakasi aku nine nahina maupo te'asa mia i olomiu anu binahoku sangkadio i Kerisipu ka i Gayusi,

¹⁵ onaemo ka nahina mia anu mokompotae nine mebinaho komiu a neeku.

¹⁶ Somborino mbo'u i Setepanu ongkue anu baho ira. Sangkadio ondae nahi kuto'orio, bara'ura hinao mbo'u mia anu binahoku.

¹⁷ Hangano Dotena aku i Kerisituu komba ka kupobaho, sine ka kupaleleo Lele Mawongkoa; ka maupo atuu komba saru ponto'ori pau, ka imentudu koa keu pinotamba-Do i Kerisituu.

Ponto'ori-Do Ue Ala ka ponto'orino mia 1:18–2:5

¹⁸ Hangano pompalele mongkona keu pinotamba onaemo lano monge-mongedo anu ira memate, sine ndi ontae anu mengkinadudui pompalele atuu onaemo moroso-Do Ue Ala.

¹⁹ Hangano hinao teburi, ”Aku rumopuo ponto'orido mia mponto'ori ka pandedo mia anu pande mposongka Aku mokotampulao.”

²⁰ Isua iramoke mia mponto'ori? Isua iramoke guru agama? Isua iramoke mia marampengenge inso i wawontolino andio? Kombake Doweweuomo Ue Ala ponto'orino wawontolino andio gagi monge-mongea?

²¹ Hangano a laro ponto'ori-Do Ue Ala, wawontolino nahi to'ori Ira Ue Ala mesala a ponto'orino, onaemo ka Dopemoikoo Ue Ala kumadudui ira anu mpompe'ala-ala hangano monge-mongea pompalelea Lele Mawongkoa.

²² To Yahudi mpo'ema petondoni ka to Yunani mpo'ungke ponto'ori,

²³ sine omami mempalele Ira i Kerisituu anu pinaso a ngkeu pinotamba: a nto Yahudi aasa watu tetidua ka a mia komba to Yahudi aasa monge-mongea,

²⁴ sine ndi ondae anu mempinoboi, moiko to Yahudi, maupo mia komba to Yahudi, Ondae i Kerisituu onaemo moroso-Do Ue Ala ka ponto'ori-Do Ue Ala.

²⁵ Hangano anu monge-monge inso ndi Ondae Ue Ala langkaiopo ponto'orino sekono mia ka anu molema inso ndi Ondae Ue Ala morosoopo sekono mia.

²⁶ Impewowoloomo koa, pepaekompo, ba kana'umpe teweweumiu, tempono imempinoboi: montonda posongkado mia komba hadio mia anu pande mosongka, sine hadio mia anu hinao pabawano, komba hadio mia anu mentinudu.

²⁷ Sine hapa anu pinemonge-mongeno wawontolino, Dobiniki ira Ue Ala ka dopokoko'ii ira mia anu mponto'ori, ka hapa anu pinemolemano wawontolino, Dobiniki ira Ue Ala ka dopokoko'ii ira anu memoroso,

²⁸ ka hapa anu nahi tinudu ka anu pinokongkodei i wawontolino, Dobiniki ira Ue Ala, maupo hapa anu nahina pengkonaano, Dobiniki ira Ue Ala ka dome'oninio hapa anu hinao pengkonaano,

²⁹ ka si hina maupo te'asa mia anu mawongko i aro-Do Ue Ala.

³⁰ Sine hangano Ondae ka imekongko ndi Ondae i Kerisituu Yesu, anu hangano Ondae Ue Ala gagiomo ponto'orito anu mentee. Ondae mompokomentee, mompokomempori ka tumolosi kita.

³¹ Onaemo pu'uno kana hinao teburi, ”Ba isema anu mawongko, po'ineeomo ka imawongko ndi Ondae i Ue.”