Yeneses 7 - Kamula

Yúta ta꞉lamo gola꞉dle

¹ Epame Godtapo Nowa watle epo atlaiyo, “Wata oloma hema ha꞉ha꞉ opa hapuloma dulu dla na꞉ta natiye hatlo wa꞉ tlo sikemte ka꞉dle oplami halema. Epapedeme wa꞉ mate wa꞉ a꞉ya mate epo wa꞉ akimlala mate epo yia꞉ wola꞉ mate koa dulu dla elemtuwane.

² Epame wua꞉ta tumama ullu watalo alinepi mila꞉pi meyelope meyelope dleye patetalo mate molalatalo mate hohopo tumullupe. Amasiyama wa꞉ ullu pa꞉talo alinepi tlo elemtumama alinepi mila꞉pi meyelope meyelope dleye patetalo dla 7 hohoma epame molalatalo dla 7 hohoma demtapame elemtulupe.

³ Epame tea mape patetalo dla 7 hohoma epo molalatalo dla 7 hohoma demtapame elemtulupe. Epalati yia꞉tapo ma alotle yia꞉ mila꞉pi sepele usulumha꞉ha꞉mama pasatlepo depame.

⁴ Wata oloma itle alila 7 pololepo gudlati na꞉tapo tiyo patoye ta꞉lamo dla tulune dlowama. Epalati 40 alila mate epo 40 utula꞉la mate tiyo patota hellepe. Epalati na꞉ta mimita꞉pele opa hapuloma mate epo alinepi hapuloma mateye poyuluwepo,” diyo.

⁵ Epalati Nowatapo Godta atlale koko hapulomaye ma-haiyo.

⁶ Nowaye 600 sokomoko hallati yútapo puaiyo.

⁷ Epalati Nowata ya꞉ a꞉ya mate epo ya꞉ akimlala mate epo yia꞉ wola꞉ mate koa pato dulu dla tuwaiyo, yúta ta꞉lamo gola꞉dlati yia꞉tapo pasakalo hallowe halowedeme.

^8-9 Epalati Godta atlale yu e dolumama tea mila꞉pi meyelope meyelope dle mate epo alinepi hapuloma mila꞉pi meyelope meyelope dle matetapo Nowa hala dla puame koa dulu dla tumhalaiyo. Yia꞉tapo koa dulu dla tumhalemama patetalo mate molalatalo mate tua demhalaiyo.

¹⁰ Epame alila 7 mogudlati yútapo ta꞉lamo patoye dokolomhetaiyo.

¹¹ Nowata halemama 600 sokomoko umale oloma edla yú mataletapo ta꞉la dulu tle popokotimyaiyo. Epalati omapla di tle tiyo patota heliyo. Koko iye namba 2 mama dulu dla namba 17 alila umulati apiyo.

¹² Epalati tiyotapo 40 alila mate epo 40 utula꞉la mate dulu dla helemhalaiyo.

¹³ Epalati Nowa mate ya꞉llu mate epo yia꞉ akimlala Sem mate epo Ham mate epo Yapet mate epo yia꞉ wola꞉ mate koa dulu dla tuwaiyo.

¹⁴ Yia꞉ta tumama alinepi mila꞉pi meyelope meyelope dle dulu dla halo mate epo yowo mate epo tea mila꞉pi meyelope meyelope dle mate elemtuwaiyo.

^15-16 Godta atlale yu e dolumama alinepi hapulomatapo Nowa mate tumhalale dulu edla patetalo mate epo molalatalo mate tua demhalaiyo. Yia꞉ta hapulomatapo koa dulu dla mo-tupa꞉mele pokadlati God meyelo kokolomaye godiyo.

^17-18 Tiyota 40 alila dulu dla helemhallati yúta pumhetamama koata hollowe mo-kotiyamaiyo.

¹⁹ Yútapo ta꞉lamo dokolomhetemama tamali patoto sikemte seselemalli popa꞉le aloweli diye mo-gola꞉gola꞉diyo.

²⁰ Epalati tamali patoto aloweli yúta gola꞉dleye 7 mita ga꞉tulli epapele halaiyo.

^21-23 Epalati alinepi hapuloma mate epo tea hapuloma mate epo opa hapuloma mate ta꞉la medla pomelletapo paliyo. Epedeme ta꞉lamo hema pasakalo ha꞉ha꞉lalo alisisi hapulomatapo mosukulu palipa꞉meliyo. Amasiyama hatlo Nowata koa dulu dla elemtuwale sotapo pasakalo gadlowe haiyo.

²⁴ Epalati 150 alila dulu dla yútapo ta꞉laye gola꞉depo elaiyo.