Ekesedes 15 - Kamula

Moses mate epo Isalael so mate God hi di dla ta꞉demama sala dolumale

¹ Epapedeme Moses mate epo Isalael so mate God hi di dla ta꞉demama sala iye dolumaiyo. “Na꞉tapo God hi di dla ta꞉demama sala iye dolumolowepo. Adipalati, ya꞉tapo Isip so mate nalatimama ya꞉ta itiyamaletapo yia꞉ye ma-tla꞉mtalepo. Epame ya꞉tapo aliya koa mate epo yo di dla popa꞉lalo so mate yú dla mo-yumatilipo.

² Epedeme Godtapo na꞉ dla itiyamale hamilalo halapo epame na꞉ pasakalo gadlalo halapo. Epedeme na꞉ ya꞉ dla sala solowama. Epame na꞉ta ya꞉ye na꞉ God ikadepe demama ya꞉ hi di dla ta꞉dlowepo. Epame na꞉ mamadulo yia꞉ God ikadepe demama ya꞉ dla siyele hamilowepo.

³ Epapedeme Godye opahale dlalo dokopala oplamipo. Epedeme Godye ya꞉ hi ikadepepo.

⁴ Epapele dulu dla Pelo ya꞉ opa mate epo yia꞉ aliya koa mate Godtapo Omteka꞉pele Kaula dulu dla mo-yumatilipo.

⁵ Epame yútapo yia꞉ dokolomama ewala some u-upiyemama ollotulume ta꞉la umpo popa꞉po.

⁶ Epame God wa꞉tapo Isip soye wa꞉ta itiyamale pato mate mo-potipo hamastalepo.

⁷ Epame wa꞉ta itiyamaletapo wa꞉ dla opahale dlalo soye batalipo hamastalepo. Epame wa꞉ta siyaladleye pta sikemte dlapa sepena. Epapedeme wa꞉ dla opahale dlalo soye dlapata osamokolo hamdemdiye epapelepo.

⁸ Epame wa꞉ta hedletapo mosisi some bibikilimama kaula patoye duka gladuwapo. Epalati yútapo kokalepame kosukulli some haluwapo.

⁹ Epapedeme ka꞉yapa Isip sotapo hatetalemama epo atlamyeuwapo, ‘Ditapo Isalael soye dodolomtame yia꞉ye hohopo aipa꞉ya mate poyupame yia꞉ alisisi hapuloma halomolowepo,’ demyeuwapo.

¹⁰ Amasiyama wa꞉ta hedletapo mosisi some bibikilimama yia꞉ye yúta gola꞉depo poyumama yú dulu dla ewala some ollo-ollo dlalimuwapo.

¹¹ Epapedeme god hale wa꞉ epapele halema꞉? Hao, hawa ikadepe. Adipalati, wa꞉ye sikemte aiyalma depo halemama hela꞉dle mate itiyamale mate halapo. Epame wa꞉tapo ulugiyemale koko patoto halomdepo.

¹² Epame wa꞉ta itiyamale tle Isip soye ta꞉lamota gola꞉dene dlepo.

¹³ Epapedeme wa꞉ kokó halepo hallalo bokotiyapo malamaletapo wa꞉ta ma ilame hohomale opa dia꞉ye eleme telepe. Epame wa꞉tapo yia꞉ye wa꞉ta hallalo mo dla eleme pulupe.

¹⁴ Epedeme opa opitapo koko i dalepame sikemte wowota꞉myelepe. Epapele dulu dla Pilisteya soye sikemte wowota꞉mama yia꞉ta itiyamaleye pa꞉lepe.

¹⁵ Epame Edom dokopala so mate epo Moab dokopala so mate sikemte eseselalalimale mate dupa yulumama wowota꞉myelepe. Epame Keinan so tlo sikemte yiyellepe.

¹⁶ Epapele dulu dla opa ewolotapo wa꞉ta itiyamale natipame wowota꞉mama dali sokotalo some ha꞉ha꞉myelepe. Yia꞉tapo mepo ha꞉ha꞉lati wa꞉ opa, wa꞉ta ma ilame hohomale sotapo tamhalemama tetla꞉mha꞉ha꞉lepe.

¹⁷ Epame wa꞉tapo yia꞉ye elemtame wa꞉ta hallalo tamali dla ipila꞉lepe. Adipalati, tamali eye wa꞉ dota mita꞉pele aiyalma ayapo.

¹⁸ God, wa꞉ta dokopala depo hallowe kokotapo kokó halepo hallepe.”

¹⁹ Epapedeme sala iye Isalael sotapo God hi di dla ta꞉demama dolumaiyo. Adipalati, Godtapo kaula patoye duka gladlati Isalael sota ta꞉la sekelle tle seme dla uliyo. Amasiyama Isip sota ullati Godta yúye ma hame puame bopudemama yia꞉ye poyuiyo.

²⁰ Epalati God yu molo atlalo a꞉ya, A꞉lon ya꞉ nana Miliyamtapo wola꞉ opi mate sila꞉sila꞉ halopo siyalemama Miliyamta itapu sala hamastepo yomaiyo.

²¹ Epammama ya꞉ sala ipo dolumaiyo, “God hi di dla ta꞉demama sala iye dolumaiya. Adipalati, ya꞉tapo Isip so mate nalatimama ya꞉ta itiyamaletapo yia꞉ye ma-tla꞉mtalepo. Epame ya꞉tapo aliya koa mate epo yo di dla popa꞉lalo so mate yú dla mo-yumatilipo.”

Yú haka꞉letapo ma opalli koko

²² Epame Mosestapo Isalael soye elepame Omteka꞉pele Kaula saliyome ma Sul dalupa dulu dla tamalemama alila dapahatlope dulu dla yú dimi tamalaiyo.

²³ Epame yia꞉ puame Mala mo dla yú natiyo. Amasiyama yú eye haka꞉lati podlomaiyo. Epedeme mo e ya꞉ hiye semama Mala demdepo.

²⁴ Epapeleye yia꞉ edla puame natitepo yú dloweta pa꞉lati Moses yu balemama, “Di yú hadima tame tilipo dlopa꞉?” demyaiyo.

²⁵ Epalati Mosestapo gadle yilo God dla otele himiyo. Epapalati Godtapo dali tatalaye nati-iyo. Epame Mosestapo dali tatala eye hame yú dla hamastlati yútapo ma opaliyo. Epapedeme Mala mo edla Godtapo Isalael sota ikadepe ya꞉ dolumolowe depame aiyalma amkoye ipo imaiyo,

²⁶ “Wua꞉ hatlo na꞉ yu dla dalepo salladepo siyamama na꞉ta solotamale koko tlo dolumha꞉ha꞉iya. Wua꞉ta epapelepiye, eta na꞉ta Isip so dla wotiyalle hapiwa epapele wotiyalleye ma wua꞉ watle pohapilowa. Adipalati, na꞉tapo God depo halemama wua꞉ta alomaleye ka꞉ka꞉dlalo halapo,” diyo.

²⁷ Epame yia꞉tapo Mala moye saliyome ma Elim mo dla puaiyo. Epapeleye Elim mo edla yú matale 12 me-popa꞉iyo. Epame olo dali 70 ma medla ha꞉ha꞉iyo. Epalati yia꞉tapo yú matale mateka꞉pi medla kimtimaiyo.