Ekesedes 1 - Kamula

Isalael so opata ta꞉le

^1-5 Epedeme Yokob ya꞉ akimlala iwolotapo yia꞉ a mate Isip mo dla tamalaiyo. Luben, epo Simiyon, epo Libai, epo Yuda, epo Isakal, epo Sebulun, epo Benyamin, epo Dan, epo Naptali, epo Gad, epo Asel. Yia꞉tapo tamalemama me-yia꞉ wola꞉ mate epo yia꞉ yimlala mate elemtamalaiyo. Amasiyama Yosep tlo ya꞉ tatle Isip mo dla ma-tame halaiyo. Yokob ya꞉ akimlala mate epo ya꞉ mamadulo mate Isip mo dla tame hatlo godepo sesa꞉lati 70 umaiyo.

⁶ Yosep mate epo ya꞉ bapadulo mate Isip mo dla ha꞉ha꞉po depo mo-totoyimlala momama paliyo. Epame yia꞉ mate teta꞉le so mape mo-paliyo.

⁷ Amasiyama Isalael sota yimlala sikemte isukumama Isip mo patoye kustiptame elaiyo.

⁸ Epame alotle Yosep koko yeliyele oplamitapo Isip mo dla dokopala oplami halaiyo.

⁹ Epapeleye dokopala oplami Pelo etapo ya꞉ opa watle epo atlaiyo, “Wua꞉ natiya, Isalael soye sikemte pasatamama di opaye tla꞉mtla yakomapo.

¹⁰ Epapedeme di api totamolowa, Isalael sota sikemte pasatlala depo himomolloweye. Adipalati, yia꞉tapo yia꞉ opata ma-ta꞉lati natipame potlowedeme opahale so opi mate hatlope depame dia꞉ mate opahale dlala,” diyo.

¹¹ Epammama yia꞉tapo Isalael sota itiyamaleta pa꞉lepo depame asiyama pa꞉le oko patoto dla hatitipame yia꞉ omha꞉ha꞉lalo so ma hohomaiyo. Epalati Isalael sotapo mo patoto dapiyamte Pitom mate epo Lamses mate kotipo aya halomtamalaiyo, Pelotapo ya꞉ alisisi hapuloma edla hatitimelepo depame.

¹² Amasiyama epapele tlope yia꞉ oko pato me-halomha꞉ha꞉mama yia꞉ yimlala ma-a꞉ma sikemte isukumaiyo. Epapalati Isip sotapo Isalael sota epo sikemte me-a꞉ma pasatamtlati natipame wowota꞉iyo.

^13-14 Epammama asiyama yia꞉tapo oko sikemte patoto aya halomolowe oko mate epo osalo hatitimolowe oko mate tlo yia꞉ watle halopimha꞉ha꞉mama pasakalo kokalle dla elemtamalaiyo.

¹⁵ Epapele dulu dla Isip mo dokopala oplami Pelotapo Hibulu so wola꞉ta yimlala hohomalati mopapo natilalo so wola꞉ dapiyamte Sipla mate epo Puwa mate dla yu hamimama epo atlaiyo,

¹⁶ “Wua꞉ Hibulu so wola꞉ta owayimlala hohomale dulu dla akimlala hohomalati e tlo potimama asiyama utukaka hohomalati e tlo woloma natidemha꞉ha꞉iye,” diyo.

¹⁷ Amasiyama dulu edla wola꞉ dapiyamte iwolotapo God tlo wowota꞉mama dokopala oplami Pelo yu dla posalladlalo Isalael so wola꞉ta akimlala hohomalati popotimasemdiyo.

¹⁸ Epalati Pelotapo mopapo natilalo so wola꞉ dapiyamte ewoloye sisilapame yia꞉ watle epo atlaiyo, “Wua꞉ adipalati Hibulu so wola꞉ta akimlala hohomalati popotimalalo wekemduwa?” diyo.

¹⁹ Epalati asiyama yia꞉tapo epo atlaiyo, “Dokopala oplami, wa꞉ natine, Hibulu so wola꞉ye owayimlala hohomolowe dla sikemte i-itiyamana, po-Isip so wola꞉ epapena. Epapele koko tle dita ma hapele tuwame yia꞉ gadloweye pta dekelemde,” diyo.

^20-21 Epalati Godta mopapo natilalo so wola꞉ ewolo dla siyemhallati yia꞉ ma yia꞉ yimlala sikemte hohomaiyo. Epalati Isalael sotapo ma a꞉ma sikemte pasatamtaiyo.

²² Epedeme Pelotapo matle Isip so hapuloma watle yu ipo hamiyo, “Wua꞉ Hibulu wola꞉ta owayimlala hohomama akimlala hohomalati Nael aloma dla polole demha꞉ha꞉iye. Amasiyama utukaka hohomalati tlo po-potimha꞉ha꞉lowa,” diyo.