Римдегілерге 8 - Наа Молҷағ

Худай Худында чуртааны

¹ Ол оңдайнаң пӱӱн Христос Иисуснаң ит-ханның оңдайынҷа нимес, Хуттың хоостыра чуртапчатханнар чарғылатпастар.

² Христос Иисустың пастыра чуртасты пирчеткен Худай Худының чахии мині чазыхтың паза ӧлімнің ӱлгӱзінең позытхан.

³ Моисей Чахии анзын ит полбаан. Ит-ханыбыс аның кӱзін сығарыбысхан. Аннаңар Худай Позының Оолғын, чазыхтығ ит-ханнығ кізее омалап салып, ысхан. Худай Аны чазыхтың ӱчӱн толығ ит салған. Іди Худай ит-ханның оңдайынҷа иткен чазыхты чарғылап салған.

⁴ Худай анзын пісте, ит-ханның оңдайынҷа нимес, Хуттың хоостыра чуртапчатханнарда, чахығ киректепчеткен ниме толзын тіп, іди иткен.

⁵ Ит-ханның оңдайынҷа полчатханнарның сағыстары ит-ханның хынығыстарын толдырарына айлан парча. Худай Худы хоостыра полчатханнар, тізең, Худай Худының кӧңнінҷе чуртирға сағынчалар нооза.

⁶ Пос кӧңнінҷе полғаны кізіні ӧлімге ағылча. Худай Худы хоостыра полғаны, тізең, чуртасха паза амыр хоныхха ағылча.

⁷ Кізінің пос кӧңнінҷе полғаны Худайға тоғыр. Аның ӱчӱн кізі Худай Чахииның ӱлгӱзіне кірбинче, сынында кір полбиндаача.

⁸ Ит-ханның оңдайынҷа чуртапчатхан кізілер Худайның кӧңніне кір полбастар.

⁹ Худай Худы сыннаң сірерде чуртапчатса, сірер, ит-ханның оңдайынҷа нимес, Худай Худының хоостыра чуртапчазар. Кемде Христостың Худы чоғыл, тізең, ол Христости нимес.

¹⁰ Сірерде Христос пар полза, ит-ханыңар чазыхтығдаңар ӧліг дее полза, че Хут ахтаныстың сылтаанда тіріг.

¹¹ Иисусты ӧліглердең Тірілдірібіскеннің Худы сірерде чуртапча. Андағ полза, Христосты ӧліглердең Тірілдірібіскені сірерде чуртапчатхан Позының Худынаң ӧлҷең иді-ханыңарны тірілдірібӧгізер.

¹² Аннаңар, харындастар, піс ит-ханға алымнығ нимеспіс. Ит-ханның оңдайынҷа чуртирға кирек чохпыс.

¹³ Сірер ит-ханның оңдайынҷа полчатсар, ӧл парарзар. Ит-ханның хынығыстарын Худай Худынаң пазынып алзар, чуртирзар.

¹⁴ Худай Худынаң устанчатхан кізілер прайлары Худайның палалары полчалар.

¹⁵ Хул итчеткен паза хорығып ала чуртатчатхан хутты сірер албаазар. Сірерні Худай палалары итчеткен Худай Худын алғазар. Пу Хуттың пастыра піс хығырчабыс: Авва Пабам!

¹⁶ Худай Худы пістің худыбыснаң хада піс Худайның палалары полчатханыбысты киречілепче.

¹⁷ Худайның палалары полчатханыбыста, Христоснаң тиңе Аннаң ӱлӱсті алҷаң кізілер полчабыс. Христостың ирееленістерін ӱлескенібісте, сабланызын даа ӱлезербіс.

Чағдапчатхан сабланыс

¹⁸ Пістің пӱӱнгі ирееленістерібіс піске килер сабланыстың хыринда пір дее нимее турбинчалар тіп санапчам.

¹⁹ Прай чайалған ниме Худай палалары кем полчатханын азыларын чидікпин сағыпча нооза.

^20-21 Прай чайалған ниме, позының нимес, Худайның кӧңнінҷе тик чуртастың ӱлгӱзінде чӧрче. Чайалған нименің, чызирдаң позып алып, Худайның палаларының пос чуртазын паза сабланызын аларларына ізеніс пар.

²² Піс пілчебіс, прай чайалған нимелер пу тусха теере, ӧстезіп ала, чобалчалар.

²³ Олар ла нимес, піс тее, Хуттаң тун-сый алған кізілер, пос алынҷа чобал чӧрчебіс. Худайның палалары поларыбысты паза ит-ханыбыс чазыхтаң позирын сахтапчабыс.

²⁴ Хаҷан піс ізенчебіс, піс арачыланып алчабыс нооза. Харахха кӧрінчеткен нимее ізенчетсең, ол ізеніс нимес. Кӧрчетсең, ноға ізенерге кирек.

²⁵ Кӧрінминчеткен нимее ізенчетсебіс, андада тыстанып ала сағыпчабыс.

²⁶ Олох оңдайнаң чазығ позыбысха Хут полысча. Піс хайди пазырарын паза хайди сурынарға кирегін пілбинчебіс нооза. Хут, чоохтанмин даа, улуғ тынғанынаң на пістің ӱчӱн сурынча.

²⁷ Чӱректерні сынапчатхан Худай, тізең, Хуттың сағызын пілче: Хут Худайның кӧңні хоостыра ах-арығларның ӱчӱн сурынча нооза.

²⁸ Піс, тізең, пілчебіс, Худайға хынчатханнарға паза Аның кӧңні хоостыра хығыртылғаннарға прай ниме чахсаа иділче.

²⁹ Худай пурун піл салған кізілерге, Позының Оолғы кӧп харындастарының аразында тун палазы ползын тіп, Позының Оолғына тӧӧй поларға турғыс салған.

³⁰ Кемні турғыс салған, тізең, оларныох хығыртхан. Кемні хығыртхан, оларныох ахтаан. Кемні ахтаан, тізең, оларныох саблаан.

Худайның хынызы Иисус Христоста

³¹ Мыннаң хоостыра паза ниме тир? Худай пістің ӱчӱн полчатханда, кем пістең тоғыр полар?

³² Ол Позының Оолғына айабаан, пістің прайзыбыстың ӱчӱн пир салған. Аннаң хада піске прай нимені сыйлап пирбес пе?

³³ Худай таллааннарны кем пыролир? Худай оларны ахтапча.

³⁴ Кем чарғылир? Пірдеезі. Христос Иисус ӧл парған, че тіріл парған. Ол Худайның оң саринда одырча паза пістің алныбысты алча.

³⁵ Кем пісті Худайның хынызынаң чар полар: ирееленістер алай сидіксіністер, алай сӱрдіртчеткенібіс, алай ӧзӧгіс, алай чох чуртас, алай хорғыс, алай хылыс па?

³⁶ Піди пазылых: Синнең ӱчӱн піс кӱннің сай ӧлім кӧрчебіс, пісті тайыға салҷаң хойларға санапчалар.

³⁷ Прай пу нимені піске хынчатхан Худайның сылтаанда чиңіп алчабыс.

³⁸ Ікінҷілебинчем, ӧлім дее, чуртас таа, ангеллер дее, пастыхтар даа, амғызы даа, соңархызы даа, хайдағ даа кӱстер,

³⁹ пӧзии, тирии пісті Худайның хынызынаң чар полбастар. Пір дее чайалған ниме Иисус Христос Хан-пигібістің пастыра пирілчеткен Худайның хынызынаң пісті чар полбас.