Матфей 8 - Наа Молҷағ

Ходырлығ кізіні имнебіскені

¹ Иисус тағдаң тӱскенде, Аның соонҷа кӧп чон парған.

² Мына чызығ палығлығ кізі, Андар пас киліп, Аның алнында тізекке тӱзіп, чоохтанған: – Хан-пигім! Хынзаң, мині арығлап поларзың. –

³ Йа, хынчам, – тіп ала, холын сунып, ол кізее теертібіскен Иисус. – Арығ пол пар! Сах андох чызығ палығлығ кізі арығ пол парған.

⁴ Андада Иисус ағаа теен: – Кӧр, пірдеезіне чоохтаба! Абыссар парып, позыңның арығ пол парғаныңны кӧзіт; анаң, имненіп алғаныңны киречілирге тіп, Моисей Чахии хоостыра тайығ сал.

Чӱс чааҷы пазының нымысчызының чазыл парғаны

⁵ Иисус Капернаумзар килгенде, Аныңзар римдегілернің чӱс чааҷының пазы пас киліп, сурынған: –

⁶ Хан-пиг! Минің нымысчым, чӱллері пос пол парып, ағырып, ибде чатча. Ол тың ирееленче. –

⁷ Мин, парып, аны имнебізербін, – теен ағаа Иисус.

⁸ Чӱс чааҷының пазы, тізең, нандырған: – Чох, Хан-пигім! Турама кіреріңе мин турыстығ нимеспін. Син чахығ ла пирібіс, нымысчым хазыхтан парар.

⁹ Минің дее позымнаң пӧзік пастыхтарым пар, позымның даа холымда чааҷылар пар. Чааҷыларымның піреезіне «пар» тізем, анзы парадыр, пасхазына «кил» тізем, ол киледір; нымысчыма «мыны ит» тізем, ол идедір.

¹⁰ Иисус, аны истіп, таңнап, соонҷа парчатханнарға теен: – Сынны сірерге тіпчем, Мин Израильде дее мындағ киртіністіг кізее тоғаспаам.

¹¹ Тіпчем сірерге, кӧп кізі, іскертін паза кидертін киліп, Тигір хан-чирінде Авраамнаң, Исаакнаң паза Иаковнаң хада стол кистінде одыр салар.

¹² Хан-чирінде поларға салылғаннар, тізең, тастындағы харасхызар сығара сӱрдірерлер. Анда сыыт паза тіс хыҷыразы полар. –

¹³ Пар, хай син киртінгезің, анҷох сағаа полар, – теен чӱс чааҷының пазына Иисус. Сах андох аның нымысчызы хазыхтан парған.

Иисус кӧп ағырығ кізіні имнеп салча

¹⁴ Иисус, Пётрның ибінзер киліп, аның хазинезінің тӧзекте, иді ізіп, ағырығ чатчатханын кӧр салған.

¹⁵ Иисус ол ипчінің холына теңендӧк, аның ағырии ирт парған. Пётрның хазинезі, тур киліп, оларның алнында хайын сыххан.

¹⁶ Иир пол парғанда, Иисуссар айналарға хаптыртхан кӧп кізіні ағыл килгеннер. Иисус сӧснең айналарны сӱрген, прай ағырығ кізілерні, тізең, имнебіскен.

¹⁷ Ухаанҷы Исаийнің «Ол пістің сағ чохтанғаныбысты паза ағырығларыбысты Позына алып алған» теен сӧстері тол парар ӱчӱн, Иисус іди иткен.

Иисустың соонҷа парары

¹⁸ Позынаң ибіре турғлабысхан кізілерні кӧр салып, Иисус ӱгренҷілеріне кӧлнің тігі саринзар кис парыбызарға чахаан.

¹⁹ Че Моисей Чахии пілігҷілерінің пірсі, пас киліп, теен: – Ӱгретчім! Син хайдар даа парзаң, мин Синің сооңҷа парарбын.

²⁰ Андада Иисус ағаа піди тіпче: – Тӱлгӱлернің іннері пар, тигірдегі хустарның – уйалары, че Кізі Оолғының, пазын хыйын салып, тынанып алҷаң орны чоғыл.

²¹ Ӱгренҷілерінің паза пірсі Ағаа теен: – Хан-пиг! Пастап мағаа, парып, пабамны чыып саларға чарат.

²² Че Иисус ағаа теен: – Син Минің соомҷа пар. Ӧліглер ӧліглерін постары чығзыннар.

Иисустың хазыр чилні тохтатханы

²³ Иисус кимее одырыбысханда, ӱгренҷілері Аның соонҷа одырғаннар.

²⁴ Ол туста кӧлде хазыр чил пол сыххан, киме салғахтарзар кір парыбыс турған, че Иисус узаан.

²⁵ Андада ӱгренҷілері, пас киліп, Аны усхурыбысханнар. – Хан-пигібіс! Ал хал пісті! Ӧлерге чӧрбіс! – хысхырғаннар олар. –

²⁶ Ноға іди тың хорых пардар? Киртіністерің пу ла син ме? – нандырған Иисус. Анаң тур киліп, чилнең кӧлні тызып, амырирға чоохтаан. Сах андох ап-амыр пол парыбысхан.

²⁷ Ӱгренҷілері, тізең, чапсып, чоохтасханнар: – Кемдір Ол андағ? Чилнең кӧл дее Аның чооғын исчелер?

Иисустың айнаа хаптырған ікі кізіні арығлабысханы

²⁸ Иисус, кӧлні кизіп, Гергесин чирінзер читкенде, Ағаа удур айнаа хаптыртхан ікі кізі сыыраттар полчатхан хуюдаң чӱгӱріс килгеннер. Олардаң хорығып, пірдеезі пу чолҷа парарға тідінмеҷең.

²⁹ Олар, килбинең, чабал хысхыр сыхханнар: – Ниме кирек Сағаа пістең, Иисус, Худай Оолғы? Син пісті, тус читкелеккеӧк, иреелирге килдің ме?

³⁰ Олардаң ырах нимес сосхаларның улуғ ӧӧрі оттап чӧрген. –

³¹ Син пісті сӱрчетсең, сосхаларның ӧӧрінзер ызыбыс, – сурынғаннар Иисустаң айналар. –

³² Парыңар, – нандырған айналарға Ол. Айналар, кізілердең сығып, сосхаларға кір парғаннар. Сах андох прай ӧӧр, пӧзік чардаң суға сегірібізіп, суға пурлух парған.

³³ Сосха хадарчатханнар, чӱгӱрібізіп, саарзар чидіп, прай нимедеңер, ол чабал хуттарға хаптыртхан кізілердеңер дее чоохтап пиргеннер.

³⁴ Андада саарның прай чуртағҷылары, Иисусха удур сығып, Аны кӧр салып, постарының чирінең парыбызарға сурынғаннар.