Матфей 26 - Наа Молҷағ

Иудейлернің хара сағызы

¹ Прай пу нимені чоохтирын тоозып, Иисус ӱгренҷілеріне теен: –

² Ікі кӱн пазынаң Па́сха тіп ӱлӱкӱн поларын пілчезер. Андада Кізі Оолғын кіреске хазап саларға пирібізерлер.

³ Ол туста иң улуғ абыстың – Кайафаның туразынзар улуғ абыстар, Моисей Чахии пілігҷілері паза ах сағаллар чыылыс парғаннар.

⁴ Пу чыылығда олар Иисусты кӧйтікнең тудып аларға, анаң ӧдірібізерге чарат салғаннар,

⁵ че «Аны ӱлӱкӱнде идерге чарабас, чон чабалланып хайнир» тіп чоохтасханнар олар.

Иисус Вифанийде

⁶ Вифаний аалда Иисус хаҷан-да ходыр чызығ палығлығ Симонның туразында полғанда,

⁷ Аныңзар пір ипчі, аарлығ миро хайахтығ алавастр ідізін тудынып, пас килген. Одырчатхан Иисустың пазына ідістегі хайахты ур сыххан.

⁸ Иисустың ӱгренҷілері, аны кӧр салып, тарынып, чоохтанғаннар: – Аны нимее іди ӱредерге кирек?

⁹ Пу хайахты аарлыға садып, ахчазын чох кізілерге ӱлебізерге чарирҷых. –

¹⁰ Нимее сірер ипчіні хомзындырчазар? Ол Мағаа чахсы ниме ит салған, – теен Иисус, нимедеңер чоохтанчатханнарын сизініп, –

¹¹ Чох кізілер сірернің хыриңарда хаҷан даа поларлар. Че Мин сірернең хада сыбыра полбаспын.

¹² Пу ипчі, хайахты ӱстӱме урып, Мині чыып саларларына тимнеп салды.

¹³ Сынны чоохтапчам сірерге, прай чир-чалбахта Чахсы Хабар тарадылар, ноо даа чирде пу ипчіні ундубас ӱчӱн, ол иткен нимедеңер чоохталар.

Иуда Искариоттың садынғаны

¹⁴ Андада Иисустың он ікі ӱгренҷізінің пірсі – Иуда Искариот ат ал чӧргені – улуғ абыстарзар парған. –

¹⁵ Мин Иисусты сірерге садыбыссам, Аның ӱчӱн ниме пирерзер мағаа? – теен Иуда. Абыстар ағаа отыс кӱмӱс манит пиргеннер.

¹⁶ Ол тустаң сығара Иуда Иисусты оларның холына пирібізер оңдай сағып сыххан.

Ӱлӱкӱн чиизін тимнеені

¹⁷ Ачытпаан халас ӱлӱкӱнінің пастағы кӱніндӧк ӱгренҷілері, Иисуссар пас киліп, сурғаннар: – Піс Сағаа Па́сха тіп ӱлӱкӱннің чиизін хайда тимнеп пирибіс тіп сағынчазың?

¹⁸ Иисус оларға теен: – Сірер, саарда пір кізізер парып, чоохтаңар ағаа: «Ӱгретчі тіпче: „Минің тузым чағын. Синде Па́сха ӱлӱкӱнін ӱгренҷілерімнең хада иртірербін“».

¹⁹ Ӱгренҷілері, Иисус хайди чоохтаан, ідӧк иткеннер. Па́сха тіп ӱлӱкӱн чиизін тимнеп салғаннар.

Иирдегі чиис

²⁰ Иир пол парғанда, Ол стол кистіне ӱгренҷілерінең хада одырған.

²¹ Азыранчатханнарында, Иисус чоохтанған: – Сынны сірерге тіпчем, сірернің пірсі Мині садыбызар.

²² Ӱгренҷілері, тың хомзын парып, полғаны ла Иисустаң сур сыххан: – Хан-пигім! Анзы минмін ме? –

²³ Холын айахха Миннең хада сунған кізі Мині садыбызар, – нандырған Иисус, –

²⁴ Итсе-де, Кізі Оолғы Аннаңар Худай Пічиинде пазылған хоостыра ӧл парар, че хыйал Кізі Оолғын сатчатхан кізее! Ол кізее тӧрібеске артых поларҷых.

²⁵ Ол туста Аны садарға чӧрчеткен Иуда теен: – Анзы минмін ме, Ӱгретчі? – Син чоохтадың аны, – нандырған Иисус.

²⁶ Олар азыранчатхан туста, Иисус халасты, алып алып, алғабызып, сындырған, анаң аны ӱгренҷілеріне ӱлеп, теен: – Мыны алып, чіңер, пу Минің ит-сӧӧгім.

²⁷ Анаң, чірче алып, алғыстап, ӱгренҷілеріне пиріп, теен: – Прайларың мыннаң ізіңер.

²⁸ Пу Наа Молҷағны таныхтапчатхан ханым. Ол кӧп кізілернің чазыхтарын позыдар ӱчӱн тӧгілче.

²⁹ Тіпчем сірерге: Мин Пабамның хан-чирінде наа арағаны сірернең хада ісчең кӱнге теере пу виноград арағазын паза іспеспін.

³⁰ Анаң олар, Худайны саблапчатхан ырны ырлап ала, Елеон тағзар парғаннар.

Пётрның хыйа поларын ухаанҷылааны

³¹ Анаң Иисус оларға теен: – «Хадарҷыны ӧдірібізербін, андада ӧӧрдегі хойлар пытырас парарлар» тіп Пічікте пазылған. Аннаңар пу хараазын сірер прайзыңар Мині тастап парыбызарзар.

³² Че тірілген соонда, Мин сірерні Галилей чирінде сағирбын. –

³³ Синнең прайзы даа айланыбысса, мин хаҷан даа Синнең аар айланмаспын, – теен Иисусха Пётр. –

³⁴ Сынны сағаа тіпчем: пуох хараазын, питук тапсаалахха даа, син Миннең ӱс хати хыйа полыбызарзың, – нандырған ағаа Иисус.

³⁵ Че Пётр Ағаа теен: – Синнең хада ӧлімге дее парарға киліссе, мин Синнең хыйа полбаспын. Пасха даа ӱгренҷілері іди тееннер.

Иисус Гефсиман садында

³⁶ Анаң Иисус, ӱгренҷілерінең хада Гефсиман тіп адалчатхан орынзар киліп, ӱгренҷілеріне теен: – Сірер мында одыр турыңар. Мин, парып, тігде пазырып алим.

³⁷ Анаң, Пётрны паза Зеведейнің ікі оолғын Позынаң хада апарып, илеп-чобал сыххан. –

³⁸ Чобаам сині чох улуғ, ол Мині ӧдір парир. Миннең хада мында халыңар, узубаңар, – теен оларға Иисус.

³⁹ Позы, тізең, оортах арах пастыр парып, чирге тӱңдере тӱзіп, пазыр сыххан: – Пабам! Оңдай пар полза, пу хыйаллығ чірчені Миннең оортах ал! Че Мин хынғанни нимес, Син хынғанни ползын!

⁴⁰ Анаң ӱгренҷілерінзер киліп, оларның узупчатханнарын кӧріп, Пётрға теен: – Хайди сірер Миннең хада, узубин, пір час таа пол полбадар?

⁴¹ Хыҷыхха пастырбас ӱчӱн, узубаңар, пазырыңар. Кізі кӧңні кӱстіг, че ит-сӧӧгі порт.

⁴² Анаң ікінҷізін оортах парып, Ол пазыр сыххан: – Пабам! Пу ӱлӱс Миннең хыйа иртчее чох полып, Мағаа ол ӱлӱсті хайди даа иртерге килісчетсе, Синің кӧңніңҷе ползын.

⁴³ Нандыра киліп, кӧрзе, тігілернің харахтары постары ла чабыл парчатханнаңар, олар пазох узупчалар.

⁴⁴ Иисус, пазох оларны халғыс салып, оортах пастыр парыбысхан. Хатап олох сӧстерні чоохтанып, ӱзінҷізін пазырған.

⁴⁵ Анаң киліп, ӱгренҷілеріне чоохтанған: – Сірер, ам даа узуп, тынанчазар ба? Кӧріңер! Кізі Оолғының чазыхтығларның холына кірер тузы чит килді.

⁴⁶ Турыңар, парааңар: Мині садыбысхан кізі чит килді.

Иисусты тудып алғаннар

⁴⁷ Иисус іди чоохтанчатхан тустох Иуда, он ікі ӱгренҷізінің пірсі, чиде тӱскен. Аннаң хада, тізең, хылыстар паза ӧзектер тудын салған улуғ абыстарнаң ах сағаллар ысхан кӧп кізі килген.

⁴⁸ Иисусты садыбысхан Иуда кізілерге мындағ танығ пирген полған: – Мин охсанғаны сірерге кирек полар. Анзын хабарзар!

⁴⁹ Сах андох Иисуссар пас киліп: – Изен, Ӱгретчі! – тіп, охсаныбысхан Аны.

⁵⁰ Иисус ағаа теен: – Нанҷы, син нимее пеер килдің? Ол туста кізілер, Иисуссар пас киліп, Аны, хаап, пик тудып алғаннар.

⁵¹ Иисуснаң хада полғаннарның пірсі, хылызын сығар киліп, иң улуғ абыстың нымысчыларының пірсінің хулаан кизе сабысхан.

⁵² Андада Иисус ағаа теен: – Хылыс хапхан кізі хылыстаңох ӧлер, аннаңар хылызыңны нандыра сух сал.

⁵³ Мині Пабамнаң полызығ сур полбас тіп сағынчазың ма? Сурынзамох, Ол Мағаа он ікі тӱбеннең дее кӧп ангел ыс пирер.

⁵⁴ Андада Худай Пічиинде прай ниме толдырыл парарға кирек тіп пазылғаны хайди толар?

⁵⁵ Анаң Иисус чонға чоохтанған: – Сірер, хылыстар паза ӧзектер алып алып, Мині, сайбағҷыны чіли, тудып аларға килдіңер бе? Мин, кӱннің сай храмда сірерні ӱгредіп одырҷаң полғам, сірер, тізең, Мині хаппаҷаңзар.

⁵⁶ Прай пу ниме ухаанҷыларның чоохтааны тол парзын тіп пол парған. Андада Иисустың ӱгренҷілері прайзы, Аны тастап, тизібіскен.

Иисус ӧӧркі чарғы алнында

⁵⁷ Иисусты тудып алған кізілер Аны Кайафа тіп иң улуғ абыссар ағыл килгеннер. Анда Моисей Чахии пілігҷілерінең ах сағаллар чыылыс парған полғаннар.

⁵⁸ Пётр Иисустың соонҷа, илееде оортах парып, иң улуғ абыстың чуртына килген. Пу нименің хайди тоозыларын піліп алар ӱчӱн, ол нымысчыларнаң хада сиден істінде одыр салған.

⁵⁹ Улуғ абыстар, ах сағаллар паза прай ӧӧркі чарғы, Иисусты ӧлімге чарғылабызарға тіп, Аннаң тоғыр чой киречілес тілееннер.

⁶⁰ Че таап полбааннар. Кӧп чой киречі килген дее полза, киректері киліспеен. Иң соонаң ікі чой киречі киліп, тееннер: –

⁶¹ Иисус чоохтанған: «Мин Худай храмын, прай иңзерібізіп, ӱс кӱнге наазынаң пӱдір саларбын».

⁶² Иң улуғ абыс, орнынаң турып, Иисусха теен: – Олар Синнең тоғыр киречілепчеткеннеріне ноға пір дее ниме нандырбинчазың?

⁶³ Иисус тапсабаан. Анаң улуғ абыс пазох теен: – Тіріг Худайның адынаң чоохтап пир піске, Синзің ме Мессий-Христос, Худай Оолғы?

⁶⁴ Иисус ағаа піди нандырған: – Син анзын позың чоохтадың, че Мин сірерге прайзыңарға тіпчем: Мының соонда сірер Кізі Оолғын Чайаачының оң саринда одырчатханын паза тигірдегі пулуттарҷа килчеткенін кӧрерзер.

⁶⁵ Андада иң улуғ абыс, кибін тали тартып ала, теен: – Мына, Худайдаң тоғыр чоохтанча! Піске паза киречілер кирек пе? Худайдаң тоғыр чоохтанғанын сағам на истіңер!

⁶⁶ Ниме сағынчазар? – Ол пыролығ, аннаңар ӧл парзын! – нандырғаннар олар.

⁶⁷ Анаң, сырайына тӱкӱріп, сохханнар Аны. Пасхалары, тізең, наахтап,

⁶⁸ тееннер: – Ухаанҷыла піске, Мессий! Че, чоохта, кем сапты Сині?

Пётр тӧдір хылынғаны

⁶⁹ Пётр тасхар тура алнында одырчатхан туста, андар пір сӱмекчін ипчі пас киліп, теен: – Син дее Галилей чиріндегі Иисуснаң хада полғазың.

⁷⁰ Че ол, прайзының кӧзіне тоғыр саап, теен: – Пілбинчем, нимедеңер чоохтанчазың.

⁷¹ Ол, сиден тастынзар сығып, пас париғанда, пазох пір ипчі, аны кӧр салып, андағы кізілерге теен: – Ол Назареттегі Иисуснаң хада полған. –

⁷² Мин ол Кізіні пілбинчем, – тіп обалланып ала тоғыр сапхан Пётр.

⁷³ Тӱрче полғанда, анда турчатхан кізілер, пас киліп, Пётрға тееннер: – Син сынап таа оларның пірсізің, чооғыңнаң пілдістіг нооза.

⁷⁴ Андада Пётр теен: – Обал Худай! Сынны чоохтапчам, мин Ол Кізіні пілбинчем. Олох туста питук тапсабысхан.

⁷⁵ Андада Пётр Иисустың «Питук тапсаанҷа, син ӱс хати Миннең тӧдір пазынарзың» теенін сағысха кир килген. Анаң, оортах парып, ол ачығ ылғабысхан.