Матфей 22 - Наа Молҷағ

Тойдаңар кип-чоох

¹ Иисус оларға аннаң андар кип-чоохтар чоохтаан. –

² Тигір хан-чирі, позының оолғына ипчі ал пиріп, улуғ той иткен ханға тӧӧй поладыр.

³ Ол хан позының нымысчыларын аалҷыларны тойға хығыр килерге ызыбысхан, че хығырған кізілері килерге хынмааннар.

⁴ Ол пазох пасха нымысчыларын, піди чоохтанып ала, ызыбысхан: «Кізілерні ааллап хығырып, піди тіңер: „Чіҷең нимені мына тимнеп салдым, пуғаларым паза ӧнетін симірте азырап алған малларым соғыл пардылар. Прай ниме тимде, тойға киліңер“».

⁵ Че хығырған кізілері, тізең, аның хығырғанын нимее салбин, пірсі позының хыразынзар, паза пірсі садығ киреенең парыбысхан,

⁶ пасхалары, тізең, ханның нымысчыларын, тудып алып, иреелеп, ӧдірібіскеннер.

⁷ Мынзын ис салып, хан тың тарын парған. Ол, позының чааҷыларын ызып, кізі ӧдіргеннерні чох идіп, саарларын ӧртебіскен.

⁸ Анаң хан нымысчыларына теен: «Той чиизі тимде, че хығырған кізілер ағаа турыстығ полбадылар.

⁹ Аннаңар, чоллар пірікчеткен орынзар парып, учураан на кізіні тойға хығырыңар».

¹⁰ Ол нымысчылар, чолларзар сығып, учураан кізілерні прайзын – хомайларын даа, чахсыларын даа – хығыр килгеннер. Тойға кізі тол чӧрібіскен.

¹¹ Хан, аалҷыларны кӧрерге сых киліп, тойға кисчең кип-азаан киспеен кізіні кӧр салған

¹² «Нанҷым, хайди син тойға кисчең кип-азах чох пеер кір килдің?» – чоохтанған ол ағаа. Анзы, тізең, тапсабаан.

¹³ Андада хан нымысчыларына чахаан: «Хаап алыңар аны, азах-холларын палғап, тастындағы харасхызар тастабызыңар. Анда сыыт паза тіс хыҷыразы полар».

¹⁴ Хығыртхан кізі кӧп, че таллап алған кізі асхынах.

Хағанға – хағанни, Худайға – Худайни

¹⁵ Андада фарисейлер, хыйа парып, Иисусты пірее оңдайнаң Позыныңох сӧзінең тудып аларға чӧптескеннер.

¹⁶ Анаң постарының хай пірее ӱгренҷілерінең хада Ирод ханға чағын кізілерні Иисуссар ысханнар. Олар, парып, сурғаннар: – Ӱгретчі! Піс пілчебіс, Син кӧні кізізің, Худайның чолынҷа парарға сын ӱгретчезің. Син пірдеезінең чалтанминчазың, пірдеезіне чалғанминчазың.

¹⁷ Аннаңар чоохтап пир піске, хайди сағынчазың, піс Рим хағаныға албан тӧлирге кирекпіс пе алай чох па?

¹⁸ Че Иисус, оларның кӧйтіктенчеткеннерін кӧріп, чоохтанған: – Чойырхостар, Нимее мині сынап одырзар?

¹⁹ Кӧзіт пиріңер Мағаа албан тӧлепчеткен ахчаны. Олар Ағаа динарий ахчаны ағыл пиргеннер. –

²⁰ Пу динарийде кемнің сомы паза ады? – теен оларға Иисус. –

²¹ Хағанни, – нандырғаннар Ағаа. Андада Иисус оларға теен: – Андағда хағаннин хағанға пиріңер, Худайнин – Худайға.

²² Олар, Аны истіп, таңнап парғаннар. Анаң, Аны анда халғыс салып, парыбысханнар.

Тірілердеңер чоох

²³ Ӧлім соонда кізі тірілбинче тіпчеткен саддукейлер, олох кӱн Иисуссар пас киліп, Аннаң сурғаннар: –

²⁴ Ӱгретчі! Моисей піди теен: «Пірее кізі, пала чох чуртап, ӱреп парза, ол кізінің харындас-туңмазы, аның ипчізін ал салып, ӱреен харындазының тӧлін узаратсын».

²⁵ Пістің читі харындас полған. Улуғ харындазыбыс ипчі алған, че пала чох ӱреп парған. Моисей Чахии хоостыра аның ипчізін харындазы ал салған.

²⁶ Анзы ӱреен соонда, ол ипчіні ікінҷі харындазы ал салған, анаң ӱзінҷізі, іди читінҷі харындазына теере, прайзы ӱреглеп парғанҷа.

²⁷ Прайзының соонаң оларның ипчізі ӱреп парған.

²⁸ Ам олар прайзы тіріл килзелер, ол ипчі кемни полар? Прай харындастар пір ипчінең чуртааннар нооза.

²⁹ Иисус оларға нандырған: – Сірер, Худай кӱзін паза Худай Пічиин пілбин, алҷаас итчезер.

³⁰ Кізілер, тіріл килзелер, ипчі албинчалар, ирге дее парбинчалар. Олар тигірдегі Худай ангеллері осхас поларлар.

³¹ Ӱреп парғаннарның тірілерінеңер Худай сірерге чоохтаанын хығырбаазар ба?

³² «Мин Авраамның Худайыбын, Исаактың Худайыбын, Иаковтың даа Худайыбын». Худай ӱрееннерни нимес, че тіріглерни.

³³ Чон, Аны истіп, Аның ӱгредиине чапсаан.

Иң улуғ чахығ

³⁴ Фарисейлер, тізең, Иисус саддукейлерні хайди тымылдырыбысханын истіп, хада чыылыс парғаннар.

³⁵ Оларның пірсі, Моисей Чахии пілігҷізі, Иисусты сыныхтап, сурған: –

³⁶ Ӱгретчі! Моисей Чахиинда хайзы чахығ иң улуғдыр?

³⁷ Иисус ағаа теен: – Хан Худайға прай чӱрееңнең, прай кӧңніңнең паза прай сағызыңнаң хын.

³⁸ Пу пастағы паза ӧӧн чахығ.

³⁹ Ікінҷізі дее мынзыох осхас уғаа улуғ чахығ: «чағыныңа, позыңа чіли, хын».

⁴⁰ Моисей Чахиинаң ухаанҷыларның ӱгредии пу ікі чахыға тӧстенчелер.

Мессий-Христос кемнің тӧлі?

⁴¹ Фарисейлер чыылыс парғанда, Иисус олардаң сурған: –

⁴² Мессий-Христостаңар сірер ниме сағынчазар? Кемнің Ол тӧлі? Ағаа нандырғаннар: – Давидтің.

⁴³ Иисус оларға теен: – Андағда ноға Давидке Худай Худы тол парғанда, Давид, Мессийні Хан-пигім тіп адап, піди тіпче:

⁴⁴ «Хан Худай минің Хан-пигіме теен: „Мин Синің прай ыырҷыларыңны азааң алтына тастаанҷа, мында Минің оң саримда одыр тур“».

⁴⁵ Давид Аны Хан-пигім тіп адапчатса, хайди андағда Мессий-Христос Давидтің тӧлі пол парча?

⁴⁶ Пірдеезі Ағаа пір дее сӧс нандыр полбаан. Аннаң сығара пірдеезі Аны сурастырғлирға тідінмеен.