Матфей 20 - Наа Молҷағ

Виноградниктегі тоғысчылардаңар кип-чоох

¹ Тигір хан-чирі тоғынҷаң кізілерні иртен иртӧк тоғысха чаллап аларға сыххан виноградник ээзіне тӧӧй.

² Ол чалланчатхан кізілерні кӱнде пір динарий ахча тӧлирге чоохтас салып, винограднигінзер тоғынарға ызыбысхан.

³ Ӱс час тузында пазох ибдең сығып, садығ орнында тоғыс чох турчатхан хай пірее кізілерні кӧр салған.

⁴ Оларға даа тіді: «Сірер дее винограднигімзер парыңар. Тоғынып алған ахчаны тӧлеп пирербін». Олар парыбоғысханнар.

⁵ Кӱнӧрте алты паза тоғыс час тузында, пазох сығып, ідӧк иткен.

⁶ Он пір час иирзер хатап сығып, тоғыс чох турчатхан кізілерні кӧр салып, оларға теен: «Ноға сірер кӱн тооза мында, пір дее ниме итпин, турчазар?»

⁷ «Пісті пірдеезі тоғысха чаллабаан», – тееннер олар. «Сірер дее винограднигімзер парыңар, тоғынып алған ахчаны тӧлеп пирербін» – чоохтанған оларға ол.

⁸ Иир пол парғанда, виноградник ээзі тоғыс устағҷызына теен: «Тоғысчыларны хығырып, чал ахчазын тӧлеп пир, соондағылардаң пастап, пастағыларына теере».

⁹ Он пір час иирде тоғынып пастааннары пірер динарий ахча алып алғаннар.

¹⁰ Иң пурун килгеннері, тізең, кӧп арах аларбыс тіп сағынғаннар, че олар даа пірер динарий алып алғаннар.

¹¹ Ахчаларын алып алып, олар тура ээзіне перінглеп сыхханнар.

¹² «Соонаң килгеннері пір ле час тоғынғаннар, че син оларны піснең, кӱн тооза ізіге пызып ала тоғынғаннарнаң, тиң иттің».

¹³ Ээзі оларның пірсіне нандырған: «Истек мині, нанҷы! Мин сині хыйыхтабинчам. Син миннең пір динарийге чоохтас салған полбаазың ма?

¹⁴ Позыңның ахчаңны алып, пар. Мин соондағыларға, сағаа нинҷе пиргем, анҷох пирерге хынчам.

¹⁵ Алай минің нимемні позым хынғанни итчең ӱлгӱм чоғыл ба? Алай син минің андағ харам нимес полчатханыма атархапчазың ма?»

¹⁶ Пу оңдайнаң, соондағылары паста пол парарлар, пастағылары, тізең, соонда пол парарлар. Кӧп кізі хығыртылған, че асхынах – таллағны ирткен.

Иисус Позының ӧлімінеңер паза тірілерінеңер ӱзінҷізін чоохтапча

¹⁷ Иерусалимзер парчадып, Иисус, он ікі ӱгренҷізін алынҷа хығырып алып, чолда оларнаң чоохтас парған: –

¹⁸ Мына піс Иерусалимзер кірчебіс. Анда Кізі Оолғын, садып, улуғ абыстарның паза Моисей Чахии пілігҷілерінің холына пирібізерлер. Олар, тізең, Аны, ӧлімге чарғылап,

¹⁹ Худайы чохтарның холына, кӱлзіннер, сохсыннар паза кіреске хазазыннар тіп, пирібізерлер. Че ӱзінҷі кӱнінде Ол тіріл килер.

Зеведей оолларының іҷезінің сурынызы

²⁰ Соонаң Аныңзар Зеведейнің ипчізі, оолларынаң хада пастыр киліп, мӧкейіп ала пазырып, Иисустаң ниме-де сурынған. –

²¹ Ниме кирек сағаа? – сурған ол ипчідең Иисус. – Сӧс пир мағаа: хан пол парзаң, пу ікі оолғымның пірсі Синің оң сариңда, ікінҷізі, тізең, сол сариңда одырарлар, – нандырған Ағаа ол ипчі. –

²² Сірер нимедеңер сурынчатханнарыңны даа пілбинчезер. Мин ісчеткен ӱлӱс-чірчені сірер іс поларзар ба алай Мин кіреске тӱсчеткен чіли кіреске тӱс поларзар ба? – нандырған Иисус? – Поларбыс, – нандырғаннар Ағаа харындастар.

²³ Иисус оларға теен: – Мин ісчеткен ӱлӱс-чірчені ізерзер, Мин кірестенчеткен чіли кірестенерзер, че оң саримда паза сол саримда кем одырары Мин хынғанни полбинча. Анзы Пабам кемге тимнеен, ани полар.

²⁴ Аны истіп, халған он ӱгренҷізі пу харындастарға тарын парған.

²⁵ Иисус, прай ӱгренҷілерін хығырып алып, чоохтанған: – Чоннар ханнары оларның пастары полчатханын, пиглері оларнаң устап парчатханын пілчезер нимес пе зе?

²⁶ Че сірернің араңарда іди полбазын. Кем араңарда иң улии поларға сағынча, анзы сірерге нымысчы ползын.

²⁷ Кем араңарда пастағызы поларға сағынча, анзы сірерге хул ползын.

²⁸ Кізі Оолғы даа кізілерні Позының алны-кистіне чӧргізерге нимес, че пасхаларына нымысха чӧріп, кӧп кізінің ӱчӱн толығ полып, Позының тынын пирібізерге килген.

Иисустың харах чохтарны имнебіскені

²⁹ Иисус ӱгренҷілерінең хада Иерихоннаң сыхчатханда, Аның соонҷа кӧп чон парған.

³⁰ Чол хазында одырчатхан харах чох ікі кізі, Иисустың ирт париғанын сизін салып, хысхыр сыххан: – Хан-пигібіс! Давид тӧлі! Айадах піске!

³¹ Кізілер оларны тысханнар, че олар уламох тың хысхырғаннар: – Айадах піске, Хан-пигібіс, Давидтің тӧлі!

³² Иисус, тохти тӱзіп, оларны Позынзар хығырып, теен: – Ниме кирек сірерге Миннең? –

³³ Хан-пигібіс! Пістің харахтарыбысты ас пир! – тееннер олар Ағаа.

³⁴ Иисус, оларға айап, харахтарына теңен. Сах андох олар кӧр сыхханнар, анаң Аның соонҷа парғаннар.