Матфей 17 - Наа Молҷағ

Иисус Христостың хубулғаны

¹ Алты кӱн пазынаң Иисус, Пётрны, Иаковты паза аның харындазы Иоанны, позынаң хада алып, пӧзік тағзар апарған. Анда олардаң пасха кізі чох полған.

² Анаң Ол оларның кӧзіне алыс сыххан: сырайы, кӱн чіли, чарып килген, кип-азаа чарых осхас ах пол парыбысхан.

³ Анаң олар Иисуснаң чоохтасчатхан Моисейнең Илияны кӧр салғаннар.

⁴ Андада Пётр Иисуссар айланған: – Хан-пигім! Хайдағ чахсыдыр піске мында поларға. Хынзаң, мында ӱс отах ит пирибіс: пірсін – Сағаа, пірсін – Моисейге паза пірсін – Илияа.

⁵ Ол іди чоохтанчатхан арада, оларның ӱстӱнде чарыпчатхан пулут сых килген, анаң пулуттаң ӱн истілген: – Пу Минің хынчатхан Оолғым, Ол Минің кӧңніме тың кірче. Истіңер Аны!

⁶ Ӱгренҷілер Аны истӧк, тың хорых парып, чирге тӱңдере тӱскеннер.

⁷ Че Иисус, пас киліп, оларға холын теертіп, чоохтанған: – Турыңар, хорыхпаңар.

⁸ Олар, харахтарын ӧӧр кӧрібісселер, хыриларында Иисустаң пасха пірдеезі чоғыл.

⁹ Тағдаң ин килчеткеннерінде, Иисус оларға мындағ чахығ пирген: – Кізі Оолғы, ӧл парып, хатап тіріл килгенҷе, кӧрген пу нимедеңер пірдеезіне чоохтабаңар.

¹⁰ Анаң ӱгренҷілері Иисустаң сурғаннар: – Ноға Моисей Чахии пілігҷілері пурун Илия килерге кирек тіп чоохтапчалар? –

¹¹ Сын, Илияа пурун киліп, прай ниме тимнеп саларға кирек, – нандырған оларға Иисус. –

¹² Че, тіпчем сірерге, Илия килген полған, че кізілер аны, таныбин, хайди хынза, іди иткеннер. Кізі Оолғына даа сах ідӧк олардаң хатығ теңер.

¹³ Андада ӱгренҷілері Иисустың Кіреске тӱзірҷең Иоаннаңар чоохтапчатханын сизін салғаннар.

Ағырығ оолахты имнебіскені

¹⁴ Олар кізілерзер айлан килгенде, пір кізі, пас киліп, Иисустың алнында тізекке тӱзіп,

¹⁵ алданған: – Хан-пигім! Айадах минің оолғыма. Ол, ай толызына орта алҷаағып, кӧйчеткен отха алай суға удаа сегіріп, тың ирееленедір.

¹⁶ Мин аны ӱгренҷілеріңзер ағылғам, че олар имнеп полбааннар. –

¹⁷ Йо-о, пу киртізі чох паза ардап парған тӧл! Нинҷезін Мин сірернең хада поларбын? Хаҷанға теере сірернең сыдазим? Ағылыңар аны пеер, Минзер, – нандырған Иисус.

¹⁸ Иисус ағырығ оолахтағы айнаа сых тіп хатығ чоохтанғанда, айна сых парыбысхан, оолғыҷах, тізең, сах андох хазыхтан парған.

¹⁹ Анаң ӱгренҷілері, Иисус чалғызан халғанда, андар пас киліп, сурғаннар: – Ноға піс айнаны сығара сӱр полбаабыс?

²⁰ Иисус, тізең, оларға теен: – Киртіністерің чохтаңар. Сынны тіпчем сірерге: киртіністерің горчицаның ӱренінҷе дее полған полза, пу таға «мыннаң тігзер чыл парыбыс» теен ползар, ол чыл парыбызарҷых. Андада сірер ит полбас ниме чох полар.

²¹ Ол осхастарны, тізең, молитванаң паза оразанаң на сығара сӱр поларзар.

Иисус Позының ӧлімінеңер паза тірілерінеңер хатап чоохтапча

²² Ӱгренҷілерінең хада Галилей чирінде полчатхан туста Иисус ӱгренҷілеріне теен: – Кізі Оолғын кізілер холына пирібізерлер.

²³ Олар Аны ӧдірібізерлер, ӱзінҷі кӱнінде, тізең, Ол тіріл килер. Ӱгренҷілері уғаа хомзын парғаннар.

Храмға албан тӧлеені

²⁴ Хаҷан Иисус ӱгренҷілерінең хада Капернаумзар читкенде, Пётрзар храмның албан чығҷаң кізілері, пас киліп, тееннер: – Ӱгретчілерің албан тӧлир бе піске? –

²⁵ Йа, – тіді анзы. Пётр туразар кір килгенде, Иисус аннаң пурун теен: – Хайди сағынчазың, Симон? Чирдегі ханнар кемнең ахча алай албан чыыпчалар? Постарының кізілерінең ме алай пасха чирдегілердең ме? –

²⁶ Пасха кізілердең, – нандырған Ағаа Пётр. – Андағда пос кізілеріне албан тӧлирге кирек чох, – теен ағаа Иисус. –

²⁷ Че албан чығҷаңнарны тарындырбас ӱчӱн, кӧлзер парып, хармах тастабыс. Хармааңа хапхан пастағыох палыхтың ахсын азыбызарзың, анда албан тӧлеҷең ахча таап аларзың. Ол ахчаны алып, Минің паза позыңның ӱчӱн тӧлеп саларзың.