Матфей 15 - Наа Молҷағ

Улуғларның кибірлері

¹ Ол туста Иисуссар Иерусалимнең Моисей Чахии пілігҷілері паза фарисейлер, киліп, Ағаа чоохтааннар: –

² Ноға синің ӱгренҷілерің, пурунғыларның кибірін сайбап, хол чуғбин, халас чіпчелер?

³ Иисус, тізең, оларға нандырып, теен: – Сірер дее ноға постарыңның кибірлерің ӱчӱн Худай чахиин сайбапчазар?

⁴ Худай піди ӱгреткен: «Пабаң-іҷеңні улуғла» паза «Паба-іҷедеңер чабал чоохтанғаны кізіні ӧлімге ағылар».

⁵ Сірер, тізең, мына ниме тіпчезер: пірее кізі пабазына алай іҷезіне «Сірер миннең алҷаң ниме минің Худайға пирҷең сыйиим полча» тіпчетсе,

⁶ ол кізі позының пабазын алай іҷезін улуғлап полбинча. Кибірлеріңе ле тудынып, сірер Худай чахиин хыйа итчезер.

⁷ Чойырхостар! Исаийнің пічиинде сірердеңер орта чоохталған:

⁸ «Пу кізілер Мині тілде ле улуғлапчалар. Чӱректері, тізең, оларның Миннең ырах.

⁹ Чонның кибір-чозахтарына ла кізілерні ӱгредіп, Мині тикке ле улуғлаачых полчалар».

¹⁰ Иисус, кізілерні хығырып, оларға чоохтаан: – Истіңер паза піліп аларға кӱстеніңер.

¹¹ Кізіні ахсына кірчеткен ниме кірліг итпинче, че ахсынаң сыхчатхан сӧстер кізіні кірліг итче.

¹² Андада ӱгренҷілері, Иисуссар пас киліп, тееннер Ағаа: – Фарисейлер, пу сӧстерні истіп, хомзын парғаннарын пілчезің ме?

¹³ Ол, тізең, нандырып, піди теен: – Тигірдегі Пабам Позы одыртпаан полған на ӧзім, чилегезінең хада ходыра тартылып, хыйа тасталар.

¹⁴ Олардаңар сағыссырабаңар. Олар харах чохтарның харах чох пастыхтары. Харах чох кізі харах чоғох кізіні апарчатса, олар ікізінең оймахха тӱс парарлар.

¹⁵ Пётр, тізең, Иисусха нандырып, теен: – Кип-чооғыңны чарыт пир піске. –

¹⁶ Ам даа піл полбинчазар ба сірер? – теен Иисус. –

¹⁷ Ахсына кірген ниме, харнынзар прай парып, анаң тастынзар сығара тасталчатханын пілбинчезер бе?

¹⁸ Че ахсынаң сыхчатхан прай ниме чӱректең сыхчатхан ниме полча, аннаңар ол кізіні кірліг итче.

¹⁹ Чабал сағыстар, ӧдірері, оралызары, чӧреес хылыхтары, оғырлиры, чой киречілирі, сӧклирі чӱректең сыхчалар нооза.

²⁰ Мынзы кізіні кірліг итче. Чуғбаан холнаң азыранғаны, тізең, кізіні кірлебинче.

Ханаан чиріндегі ипчінің киртінізі

²¹ Иисус, андартын парып, Тир паза Сидон саарларның чирлерінзер чӧрібіскен.

²² Ол чирлердең сыххан ханаан ипчі, Иисуссар киліп, хысхырған: – Айадах мағаа, Хан-пигім, Давид тӧлі! Минің хызым айнаа тың хаптырт салды.

²³ Че Ол ағаа пір дее сӧс чоохтанмаан. Андада ӱгренҷілері, пас киліп, Аннаң сурынғаннар: – Пістең оортах ызыбыс аны, сообысча хысхыр килче! –

²⁴ Худай Мині Израиль чонының на астых парған хойларынзар ысхан, – тіп чоохтанған ӱгренҷілеріне Иисус.

²⁵ Че ол ипчі, пас киліп, Ағаа мӧкейіп пазырып, алданған: – Хан-пигім! Мағаа полыс пир.

²⁶ Ол, тізең, нандырып, теен: – Олғаннар чіҷең халасты, алып, адайларға тастап пирчеткені чахсы нимес. –

²⁷ Анзы андағ, Хан-пигім! Че адайлар даа ээлерінің столынаң тӱскен унахтарны чіпчелер, – теен ипчі.

²⁸ Андада Иисус ағаа нандырған: – Илбек полтыр киртінізің. Аннаңар сағаа синің кӧңніңҷе ползын. Сах андох ол ипчінің хызы хазыхтан парған.

Иисустың кӧп кізіні имнебіскені

²⁹ Иисус, андартын айланып, Галилей кӧлі хазынзар киліп, тағзар сығып, анда одыр салған.

³⁰ Анаң кӧп чон, постарынаң хада ахсахтарны, харах чохтарны, тіл чохтарны, кинектерні паза даа пасха ағырыға пастырчатханнарны Иисуссар ағылып, оларны Аның азағын алдыра салғаннар. Анзы, тізең, оларны имнебіскен.

³¹ Чон, тіл чохтарның чоохтан сыхханын, кинектернің хазыхтан парғанын, ахсахтарның пас чӧр сыхханын, харах чохтарның кӧр сыхханын кӧріп, хайхап, Израиль Худайын саблаан.

Тӧрт муң кізінің тосханы

³² Иисус, ӱгренҷілерін хығырып, теен: – Мағаа пу чон айастығ, ӱс кӱн Миннең хада пол парирлар, чіҷең нимелері чоғыл. Чолда ӱзе майых парбазыннар тіп, азырабин позыдарға хынминчам. –

³³ Хуу чазыда пу син чонны азыраҷаң халас хайдаң аларбыс? – ӱгренҷілері тееннер Ағаа. –

³⁴ Нинҷе халас сірерде пар? – сурған олардаң Иисус. Олар, тізең, тееннер: – Читі халас паза кӧп нимес палығас.

³⁵ Андада Ол кізілерге чирге одыр саларға чахыбысхан.

³⁶ Анаң, читі халасты паза палыхтарны алып, Худайға алғыс пирген. Сындырып, ӱгренҷілеріне пирген, ӱгренҷілері – кізілерге.

³⁷ Прайзы, азыранып, тос парған. Халған чиистің кизектері читі корыпха тол парған.

³⁸ Ипчілерні паза олғаннарны санабаза, тӧрт муңҷа кізі азыранған.

³⁹ Иисус, чонны позыдып, кимее одырыбызып, Магдала чирінзер читкен.