Матфей 13 - Наа Молҷағ

Таарығҷыдаңар кип-чоох

¹ Олох кӱн Иисус, ибдең сыға, кӧл хазынзар парып, анда одыр салған.

² Аның хыринда уғаа кӧп кізі чыыл парғаннаңар, Иисус, суғдағы кимезер парып, анда одыр салған. Прай чон, тізең, чар хазында турған.

³ Иисус оларға кӧп нимедеңер кип-чоохтар пастыра чоохтаан: – Мына таарығҷы таарирға сыххан.

⁴ Ол таарыпчатханда, хай-пірее ӱреннер чол хазына тӱсклеп парғаннар. Хустар, учух киліп, оларны хахлап салғаннар.

⁵ Піреелері тобырағы асхынах, тастығ чирге тӱс парғаннар, тобырағы анда халын полбааннаңар, тӱрче полбинаң ӧсклеп килгеннер.

⁶ Кӱн сых килгенде, тізең, хулғалар, чилегелері чохта, салығып, хуруп парғаннар.

⁷ Піреезі тігенек аразына тӱс парған. Тігенектер, ӧс киліп, оларны чабыра пазыбысханнар.

⁸ Піреезі, чахсы чирге тӱс парып, ниміс пирген: хайзы чӱс хати, хайзы алтон хати, хайзы отыс хати кӧп.

⁹ Хулаа пар кізі, иссін!

Кип-чоохтарның тузазы

¹⁰ Ӱгренҷілері, Иисуссар чағын пас киліп, сурғаннар: – Ноға Син оларға кип-чоохтарнаң чоохтапчазың?

¹¹ Ол оларға піди нандырған: – Сірерге Тигір хан-чирінің чазыттарын пілерге пирілген, оларға, тізең, андағ ӱлӱс тӱспеен.

¹² Кемнің пар, ағаа хоза пирілер. Ани уламох кӧп полар. Кемнің чоғыл, аның пар даа нимезін алып аларлар.

¹³ Олар, кӧрзе дее, кӧр полбинчалар, иссе дее, ис полбинчалар, піл тее полбинчалар. Аннаңар Мин оларға кип-чоохтарнаң чоохтапчам.

¹⁴ Оларда Исаийнің ухаанҷы чооғы толча: «Хулахнаң истерзер, че піл полбассар, харахнаң кӧрерзер, че кӧр полбассар.

¹⁵ Ол кізілернің чӱректері хат парғаннар, хулахтарынаң чадап искеннер, харахтары чабыл парғаннар. Андағ полбаан полза, харахтарынаң кӧрерҷіктер, хулахтарынаң истерҷіктер, чӱректерінең оңнирҷыхтар. Андада Минзер, постарын имнебіссін тіп, айланарҷыхтар».

¹⁶ Сірер, тізең, харахтарың кӧрчеткеннеңер паза хулахтарың исчеткеннеңер, часкалығзар.

¹⁷ Сынны сірерге тіпчем, кӧп ухаанҷыларның паза арығ чӱректіг кізілернің сірер кӧрчеткен нимені кӧрерлері килген, че кӧрбееннер, сірер исчеткен нимелерні истерлері килген, че испееннер.

Таарығҷыдаңар кип-чоохты піліп аларынаңар

¹⁸ Сірер, тізең, таарығҷыдаңар кип-чоохтың нимені таныхтапчатханын истіп алыңар.

¹⁹ Тигір хан-чирінеңер сӧсті истіпчеткен, че аны піл полбинчатхан полған на кізізер сайтан киліп, чӱреенде таарылған сӧсті ал чӧрібісче. Мына мындағ кізілер чол хазында таарылған тамахха тӧӧйлер.

²⁰ Тастығ чирге тӱскен тамах, тізең, сӧсті истӧк, ӧрініп, аны позына чағын алчатхан кізіні таныхтапча.

²¹ Аның ӧзені чохтаңар паза пик сағыстығ ниместеңер, сӧс ӱчӱн хыйыхтатсох алай сӱрдір сыхсох, ол сӧстең хыйа полыбысча.

²² Тігенектер аразына тӱскен тамах, тізең, сӧсті исчеткен кізіні таныхтапча. Че ол кізі, чуртасха сағыссырап паза ис-пайға чабыланып, ол сӧсті чабыра пазыбысча. Сӧс, тізең, тузазы чох хала парча.

²³ Чахсы чирге тоолаан тамах, тізең, сӧсті исчеткен паза піл полчатхан кізіні таныхтапча: ол ӱрен пирче, піреезі чӱс хати, пасхалары алтон алай отыс хати кӧп.

Пуртах оттардаңар кип-чоох

²⁴ Анаң Иисус хоза пір кип-чоох чоохтап пирген: – Тигір хан-чирі хыразында маңат ӱреннер таарып салған кізее тӧӧй.

²⁵ Пу кізінің ыырҷызы, прай чон узупчатхан туста киліп, пуғдай аразына пуртах оттың ӱренін чайа тастап, чӧрібіскен.

²⁶ Пуғдай, ӧзіп, пазахтаныбысханда, пуртах оттар хадох кӧдірілібіскеннер.

²⁷ Хыра ээзінің нымысчылары, аныңзар киліп, чоохтааннар: «Ээзі кізі! Син позыңның хыраңда чахсы ӱреннер таараан полбадың ма? Пуртах оттар анда хайдаң ӧс килділер?»

²⁸ Ол нымысчыларына нандырған: «Аны ыырҷы иткен». Нымысчылары тееннер: «Піс, парып, ол пуртах оттарны чулыбызибыс па?»

²⁹ Че ээзі теен: «Чох, сірер пуртах оттарнаң хада пуғдайны даа оңнабин чулыбызарзар.

³⁰ Ас кизеріне теере мынзы даа паза анзы даа хада ӧссіннер. Ас кисчетсе, мин тоғынҷыларға чоохтирбын: пуртах оттарны ӧртебізер ӱчӱн, оларны чыып, поомнарға палғабызыңар. Пуғдайны, тізең, аңмарымзар чыып салыңар».

Горчица ӱренінеңер кип-чоох

³¹ Анаң Иисус пазох пасха кип-чоох чоохтап пирген: – Тигір хан-чирі кізі позының хыразында таарып салған горчица ӱреніне тӧӧй.

³² Горчица ӱрені прай ӱреннердең иң кічіг дее полза, че хаҷан ӧс парза, прай тамахтардаң улуғ полча паза ағас осхас полыбысча. Тигірдегі хустар, учух киліп, аның салааларында тӱнепчелер.

Ачытхыдаңар кип-чоох

³³ Анаң оларға пазох пір кип-чоох чоохтаан: – Тигір хан-чирі ачытхаа тӧӧй. Ипчі кізі, пір улуғ сапчахча унға ачытхыны салыбызып, хойытхы турғызыбысча, анзы, тізең, ачып, кӧдірілче.

³⁴ Иисус прай пу нимелерні чонға кип-чоохтарнаң чоохтаан, кип-чоохтар чох, тізең, оларға чоохтабаҷаң.

³⁵ Ухаанҷы пастыра чоохтааны тол парар ӱчӱн, іди полған. Ол піди тіпчедір: «Сірернең кип-чоохтарнаң чоохтазарбын. Тилекей пӱткеннең пеер, полған чазыттығ нимелерні чоохтирбын».

Пуртах оттаңар кип-чоохты піліп аларынаңар

³⁶ Кізілерні позыдыбызып, Иисус туразар кір килген. Аның ӱгренҷілері, пас киліп, сурғаннар: – Хырадағы пуртах оттардаңар кип-чоохты піске чарыт пир.

³⁷ Иисус оларға піди нандырған: – Маңат ӱреннерні таарыпчатханы – Кізі Оолғы.

³⁸ Хыра – чир ӱстӱ, чахсы ӱреннер – Тигір хан-чирінің ооллары, пуртах оттар, тізең, – сайтанның ооллары.

³⁹ Пуртах оттарны таараан ыырҷы – сайтан, ас кискені – амғы тустың тоозылғаны, ас кисчеткеннер – ангеллер.

⁴⁰ Хайди пуртах оттарны, чыып, ӧртепчелер, амғы тус тоозылчатса, сах іди полар.

⁴¹ Кізі Оолғы Позының ангеллерін ызыбызар, олар чазыхтарға сухханнарны паза чабал нимелер иткеннерні, Аның хан-чирінең чыып, ал парыбызарлар.

⁴² Оларны ізіг песке тастирлар. Анда сыыт паза тіс хыҷыразы полар.

⁴³ Андада Пабазының хан-чирінде прай арығ чӱректіг кізілер, кӱн чіли, чарып турарлар. Кемнің исчең хулаа пар, иссін! –

Ис-пайдаңар кип-чоохтар

⁴⁴ Тигір хан-чирі чазыда кӧӧм салған алтын-кӱмӱске тӧӧй. Кізі, аны таап алып, хатап чазырып, ӧрінгенінең позының прай ниме-ноозын садыбызып, ол чазыны садызып алча.

⁴⁵ Тигір хан-чирі аарлығ нинҷіні тілеп чӧрчеткен садығҷаа даа тӧӧй.

⁴⁶ Пір аарлығ нинҷіні таап алып, ол, прай позының ниме-ноозын садыбызып, ол нинҷіні садып алча. –

Сӧзірбедеңер

⁴⁷ Тигір хан-чирі талайзар тасталған паза аймах-пасха палыхтарны сӱӱп алған улуғ сӧзірбее дее тӧӧй.

⁴⁸ Тол парған сӧзірбені чарға сығара тартып алып, чахсы палыхтарны хапчыхтарзар тееріп, хомайларны, тізең, оортах тастабысханнар.

⁴⁹ Тӱгенҷі тус килзе, ідӧк полар. Ангеллер, сығып, чабалларны, арығ чӱректіг кізілернің аразынаң таллап алып,

⁵⁰ ізіг песке тастирлар. Анда сыыт паза тіс хыҷыразы полар.

⁵¹ Анаң Иисус олардаң сурған: – Сірер прай пу нимені піл полдыңар ба? – Йа, Хан-пигібіс! – тіп нандырғаннар олар.

⁵² Анаң оларға піди теен: – Аннаңар Тигір хан-чирінің ӱгредиин піліп алған Моисей Чахииның полған на пілігҷізі позының пайын чыыпчатхан орыннаң иргі паза наа нимелерні сығарчатхан кізее тӧӧй.

Иисусха тӧреен саарында куртінмеені

⁵³ Иисус, пу кип-чоохтарны чоохтирын тоозып, аннаң парыбысхан.

⁵⁴ Позының чуртапчатхан саарынзар киліп, орындағы синагогада кізілерні ӱгреткен. Кізілер, таңнап, чоохтасханнар: – Хайдаң полҷаң Аның андағ хыйғазы паза хайхастар итчең кӱзі?

⁵⁵ Ол ағас узанҷаң кізінің оолғы нимес пе зе? Аның іҷезі Мария нимес пе зе? Харындастары Иаков, Иосий, Симон паза Иуда ниместер бе зе?

⁵⁶ Аның пицелері прайзы пістің арабыста чуртапчалар нимес пе зе? Хайдаңдыр Аның прай пу оңдайлары?

⁵⁷ Аннаңар Аны нимее салбааннар. Иисус оларға теен: – Ухаанҷыны прай чирде улуғлидырлар, че тӧреен чирінде паза Позының ибінде ле улуғлир чоғыллар.

⁵⁸ Олар іди киртінминчеткеннеңер, Иисус анда хайхастығ ниме кӧп итпеен.