Марк 6 - Наа Молҷағ

Иисусха Назарет саарда киртінмееннері

¹ Аннаң сығып, Иисус Позының чиріне читкен. Аннаң хада ӱгренҷілері полғаннар.

² Суббота кӱн читкенде, Иисус синагогада ӱгредіп пастаан. Аны кӧп кізі искен. Олар, чапсызып, чоохтасханнар: – Анзы чи хайдаңдыр анда? Хайдағ хыйға пирілді ағаа? Пу хайхастар аның холларынаң хайди иділчелер ни зе?

³ Ол Марияның оолғы ағас узы нимес пе зе? Харындастары аның Иаков, Иосий, Иуда паза Симон. Пиҷелері даа пістіңӧк арабыстаң нимес пе? Аннаңар Аны нимее салбааннар.

⁴ Иисус, тізең, оларға теен: – Ухаанҷыны прай чирде улуғлидырлар, тӧреен чирінде ле туғаннар паза ибдегілер нимее салар чохтар.

⁵ Аннаңар мында Ол хайхастар даа ит полбаан, піреезін не, хол салып, чазылдырған

⁶ паза пу чонның киртіс чоғына хайхаан. Соонаң ибіркі аалларҷа чӧріп, ӱгреткен.

Иисустың он ікі ӱгренҷіні ӱгредерге ысханы

⁷ Анаң он ікі ӱгренҷізін хығыртыбызып, оларны ікілердең чолға ысхлап сыххан. Оларға айна сығарарға ӱлгӱ пирген.

⁸ Иисус оларға тайахтаң пасха паза пір дее ниме албасха чахаан: халас таа, ахча даа, сӱӱмек тее,

⁹ олаңай ӧдік кизіп, алыстырар кӧгенек тее албин чӧрерге.

¹⁰ Піди теен Ол ӱгренҷілеріне: – Пірее тураа кірзеңер, ол чирдең сыхханҷа, андох орнығыңар.

¹¹ Пірее чирде сірерні удурлирға алай истерге хынмазалар, ол турадаң сығып, азахтарыңнаң тозынны хахтабыс турыңар. Анзы олардаң тоғыр киречілир. Сынны чоохтапчам сірерге: тӱгенҷі кӱн чарғызында Содом паза Гоморраа пу саардаң хай-хай артых полар.

¹² Ӱгренҷілер, парып, кізілерні, Худайға айланып, чазыхтары ӱчӱн пыросынарға ӱгреткеннер.

¹³ Айна кіргеннердең чабал хуттарын сығарғаннар, ағырығ чонны, хайах сӱртіп, чазылдырғаннар.

Кіреске тӱзірҷең Иоанның ӧдірткені

¹⁴ Ирод хан, Иисустаңар тылаасты истіп, – Иисустың ады прай чонға тарап парған полған – чоохтаан: – Ол Кіреске тӱзірҷең Иоанн, ӧлімінең тіріл парып, килген, аннаңар ам хайхастар ит чӧрче.

¹⁵ Пасхалары «Ол Илия полар», хайзылары, тізең, «Ол пурунғы ухаанҷылар осхас ухаанҷы полар» тіп чоохтасхлааннар.

¹⁶ Ирод, тізең, аны истіп, теен: – Мин мойнын кизе саптыртхан Иоанн полар ол, ам ӧлімнең тіріл килген.

^17-18 Алында, Ирод Филипп харындазының ипчізін Иродиаданы ал салғанда, Иоанн ағаа нигеҷізін аларға чарабас тееннеңер, ол, Иоанны тудып, харибге чаап саларға чахаан.

¹⁹ Иродиада, тізең, Иоаннға чабалланып, аны ӧдірерге хыҷанған, че оңдай латаппаҷаң.

²⁰ Ирод, Иоанның арығ чӱректіг, Худайның ах-арығ кізізі полчатханын піліп, аннаң хорыххан паза хайраллаҷаң аны. Ол Иоанның сӧзінҷе кӧп ниме итчең паза аның чоохтарын хынып исчең.

²¹ Хаҷан Ирод позының тӧреен кӱнінде пайлар-пиглерге, чааҷылар пастыхтарына, Галилей чирінің ах сағалларына той-пай салчатханда, Иродиадаа килістіре кӱн пол парыбысхан.

²² Иродиаданың хызы, телбек салып, Иродтың паза аалҷыларның кӧңніне кірген. Хан ағаа теен: – Хынған на ниме сур, пирем сағаа.

²³ «Ноо даа ниме, хан-чирімнің чарымын даа сурзаң, пирем» тіп молҷап салған.

²⁴ Анзы, сығып, іҷезінең ниме кілирін сурған. Иродиада, тізең, нандырған: – Кіреске тӱзірҷең Иоанның пазын сур.

²⁵ Хыс, сах андох ханзар айланып, теен: – Син мағаа Кіреске тӱзірҷең Иоанның пазын сағамох табахта ағылдыр пир.

²⁶ Хан, изі чоохтанза даа, чон алнында сӧске турызарға тіп, хысха тоғырлан полбаан.

²⁷ Ол, сах андох тирігліг чааҷызын ызып, Кіреске тӱзірҷең Иоанның пазын ағылдырған.

²⁸ Тігізі, парып, харибдӧк аның пазын кизе саап, табахта аны ағыл киліп, хысха пирген. Хыс, тізең, іҷезіне пирібіскен.

²⁹ Иоанның ӱгренҷілері, ол тылаасты истіп, андар килгеннер. Иоанның сӧӧгін, алып, чыып салғаннар.

Пис муң кізіні тосхырғаны

³⁰ Иисустың илҷілері, чӧрген чирлерінең айланып, Аныңзар чыылыс килгеннер. Олар ниме иткеннерін паза хайди ӱгреткеннерін прай Ағаа чоохтағлааннар.

³¹ Иисус оларға теен: – Кізі чох чирзер парып, анда ағылахти кӧмес тынанып алыңар. Олар тохтаан ибде, чон кірдің-сыхтың полып, азыранып алар оңдай даа, маң даа чох полған.

³² Иисус ӱгренҷілерінең хада, кимее постары ла одырып, кізі чох чирге парғаннар.

³³ Прай чирдең килген чон, оларның париғаннарын кӧріп, оларны танып салып, киме чӱсчеткен орынзар кӧл хастада чӱгӱр парған. Кізілер, андар пурун чидіп, Аны сахтап, чыылыс парғаннар.

³⁴ Иисус, кимедең тӱзіп, чон кӧбін кӧріп, кізілер хадарҷы чох халған хойларға тӧӧй полғаннаңар, оларны айап парып, кӧп нимее ӱгрет сыххан.

³⁵ Илееде тус иртіп парғанда, Иисустың ӱгренҷілері, Аныңзар пас киліп, чоохтанғаннар: – Мында ээн чазы чир, ам орай пол парир.

³⁶ Кізілерні позыдыбыс. Пу чағынғы аалларзар парып, халас садып алзыннар, чіҷең нимелері чоғыл нооза.

³⁷ Иисус оларға нандырған: – Сірер оларға чіҷең ниме пиріңер! Ӱгренҷілері Ағаа тееннер: – Арса, піс, парып, ікі чӱсче динарийге халас алып, оларға ӱлеп пирҷебіс пе?

³⁸ Иисус, тізең, олардаң сурған: – Сірернің нинҷе халас пар? Парып кӧр киліңер. Олар, кӧр киліп, тееннер: – Пис халас паза ікі палых пар.

³⁹ Андада Иисус кізілерні кӧк отта кизекти одыртырғлап саларға чахаан.

⁴⁰ Олар чӱзерлеп, илігерлеп изере одырғлабысханнар.

⁴¹ Иисус, ол пис халасты паза ікі палыхты алып, ӧӧре кӧріп ала, алғабысхан. Анаң халасты, сындырып, чонға ӱлезіннер тіп, ӱгренҷілеріне пирген. Ікі палыхты ідӧк ӱлеп пирген.

⁴² Прайзы, чіп, тос парған.

⁴³ Анаң халған халастарны паза палыхтарны чыыбысханнарында, он ікі торасха толдыра пол парған.

⁴⁴ Прайзы пис муңа чағын ир кізі азыранған анда.

Суғҷа чӧргені

⁴⁵ Аның соонда Иисус ӱгренҷілерін Позынаң пурун кӧлнің аархы саринзар, Вифсаидазар, ызыбысхан, Позы, тізең, чонны нандырарға тіп, халған.

⁴⁶ Чонны позыдыбызып, Иисус тағзар пазырарға парған.

⁴⁷ Иирде киме кӧл ортызына читкен, Ол, тізең, чар хазында чалғызан хала парған.

⁴⁸ Чил удур саап, кимедегілер чӱс полбин, майығып, ирееленчеткеннерін кӧріп, Иисус таң алнында, ӱс-алты час аразы туста, оларзар суғҷа пас килген. Ол иртіре парарға итчеткенінде,

⁴⁹ ӱгренҷілері, Аның суғ ӱстӱнҷе чӧрчеткенін кӧріп, сӱне тіп сағынып, хысхырыза тӱскеннер.

⁵⁰ Аны кӧріп, прайзы хорых парған. Иисус оларға андада тапсабысхан: – Махачы тудыныңар! Минмін. Хорыхпаңар!

⁵¹ Анаң кимее одырыбысхан. Чил тохтап чӧрібіскен. Ӱгренҷілері пос алынҷа чапсысханнар паза тың хайхасханнар.

⁵² Чӱректері тас осхастаңар, олар Иисус пис халасты анҷа кізее ӱлеен хайхасты даа оңар полбааннар.

Геннисаретте имнеені

⁵³ Кӧлні кис парыбызып, олар Геннисарет чирінде чарға сыхханнар.

^54-55 Кимедең тӱскеннерінде, андағы чуртағҷылар Иисусты танып салғаннар. Аның килгенінеңер прай ибіре сағба тарадыбысханнар. Иисус полған чирзер ағырығ кізілерні тӧзектігӧк ағыл сыхханнар.

⁵⁶ Иисус килген не чирде, саарда алай аалда ба, Андар ағырығ кізілерні ағылып, ачых чирде салып, Аның кип-азаана хол даа теертіп аларға сурынғаннар. Ағаа теңеннері чазылғаннар.