Марк 5 - Наа Молҷағ

Иисустың чабал хутха хаптырған кізіні чазылдырғаны

¹ Анаң, кӧлнің озаринзар кизіп, олар Гадарин чирінзер читкеннер.

² Иисус кимедең тӱс килгенде, олох арада Ағаа удур хуюдағы сыыраттардаң чабал хут кірген кізі чағдаан.

³ Ол кізі сыыраттарда чуртаан. Аны ілҷірбенең дее пірдеезі палғап полбаҷаң:

⁴ кӧп хати аны ілҷірбее паза кинҷее одыртханнар, че ол ілҷірбені ӱзе тарт салҷаң, кинҷелерні оода сабысчаң. Пірдеезі аны амырат полбаҷаң.

⁵ Ол хараа-кӱнӧрте сыыраттарда, тағлар аразында хысхыр чӧрҷең паза тастарға сабынҷаң.

⁶ Иисусты ырахтынох кӧр салып, ол, Аныңзар чӱгӱр киліп, алнына азахха тӱскен

⁷ паза чабал табыснаң аахтаан: – Ниме кирек Сағаа миннең, Иисус, Ӧӧркі Худай Оолғы? Худайнаң алданчам Сағаа, иреелебе мині.

⁸ Иисус ағаа теен полған нооза: – Сых пу кізідең, чабал хут!

⁹ Иисус сурған аннаң: – Адың синің кемдір? Чабал хут нандыр пирген: – Піс кӧптеңер адым минің Тӱбен.

¹⁰ Анаң ол кізідегі чабал хуттар оларны пу чирдең сығара сӱрбеске чоо сурынғаннар.

¹¹ Тағ хабырғазында сосхаларның улуғ ӧӧрі оттап чӧрген.

¹² Чабал хуттар прайзы Аннаң сурынғаннар: – Пісті сосхаларзар ызыбыс, піс оларзар кір парибыс.

¹³ Иисус сах андох оларға чаратхан. Айналар, кізідең сыға салып, сосхаларға кір парғаннар. Сосхалар ӧӧрі (анда ікі муңҷа пас полған полар), пӧзік чардаң кӧлзер сегірібізіп, суға пат парған.

¹⁴ Сосха хадарҷаңнар, тізең, ойлазыбызып, саар-аалларда кӧрген нимедеңер чоохтағлааннар. Андағы чуртағҷылар андада ниме пол парғанын кӧрерге пар сыхханнар.

¹⁵ Олар Иисуссар пас килгеннер. Пайаағы алҷааххан тӱбен айналығ кізі иптіг тонан салып одырчатхан. Ол позының сағызында полған. Аны кӧріп, килген чон хорых парған.

¹⁶ Пайаағы алҷааххан кізінің паза сосхаларның хайди пол парғанын кӧрген чон пуларға прай чоохтағлап пирген.

¹⁷ Андада прайзы Иисусты постарының чирінең парыбызарға сурын сыххан.

¹⁸ Хаҷан Иисус кимее одырыбысханында, пайаағы алҷааххан кізі Аннаң хада парарға сурынған.

¹⁹ Че Иисус, ағаа чаратпин, теен: – Ибіңзер парып, Хан Худай сағаа ниме иткенін паза сағаа Ол хайди айаанын кізілеріңе чоохтап пир.

²⁰ Ол кізі, парып, Он саар чирінде Иисус аннаң ниме иткенін чонға чоохтап чӧрген. Аның чооғына прайзы чапсысхан.

Иаирнің хызының тірілгені паза ағырығ ипчінің хазыхтанғаны

²¹ Иисус кӧл озаринзар хатап кис парғанда, Аныңзар чон сӱрееліг чыыл килген. Ол кӧл хазында полған.

²² Анаң оларзар синагога пастыхтарының пірсі Иаир пас килген. Иисусты кӧр салып, ол, Аның азаана тӱзіп,

²³ алданып ала сурынған: – Хызыҷаам минің ӧлерге чӧр. Ол, чазылып, тіріг халар ӱчӱн, парып, холларың андар сал пир.

²⁴ Иисус анынаң хада парған. Оларның сооларынҷа, Аны хызып ала, чон кӧп субалысхан.

²⁵ Оларның аразында, ханы ағып, он ікі чыл ағыр салған ипчі парған.

²⁶ Кӧп имҷілерде полып, кӧп ирее кӧрген ол. Прай пар-чох нимезін хоратхан, че туза кӧрбеен, улам хомайланған.

²⁷ Иисустаңар искеннеңер, ол, чон аразында парып, Аныңзар кистінең пас киліп, кип-азаана холын теертібіскен.

²⁸ Істінде ол «Кип азаана даа теңзем, чазыл парарбын» тіп сағын салған.

²⁹ Ханы ахханы сах андох тохтап парған. Ипчі ағыриинаң чазылғанын піл салған.

³⁰ Андадох Иисус, Позынаң кӱс сыхханын сизін салып, чонға айланып, сурған: – Кем минің кип-азаама теңді?

³¹ Ӱгренҷілері Ағаа тееннер: – Кӧрчезің нооза чон Сині хысча, Позың, тізең, «Кем мағаа теңді?» тіп сурчазың.

³² Че Иисус, теңен кізіні кӧрглеп, ибіре хараан.

³³ Ол ипчі, позынаң ниме полғанын піле, хорыхханына халтырап ала, Иисустың алнында тізекке тӱзіп, Ағаа сынны чоохтап пирген.

³⁴ Иисус, тізең, теен ағаа: – Хызым! Киртінізің сині арачылады. Амыр-хазых чӧр, ағырииңнаң чазыл пар.

³⁵ Ол іди чоохтанған арада, синагога пастығына аның ибінең килген кізілер тидірлер: – Синің хызың ӱреп парды, Ӱгретчіні нимее тик тутчазың.

³⁶ Че Иисус, пу сӧстерні истіп, синагога пастығына теен: – Хорыхпа, киртін.

³⁷ Анаң Пётрны, Иаковты паза Иаковтың харындазы Иоанны Позынаң хада алып,

^38-39 Иисус синагога пастииның ибінзер парған. Тураа кір киліп, анда ылғап-сыхтап, ӱрӱкклеп парған кізілерні кӧр салып, теен оларға: – Нимее ӱрӱгісклеп, сыхтазып, ылғасхлап турзар? Хызыҷах ӱребеен, ол узупча.

⁴⁰ Кізілер Ағаа хатхырыс сыхханнар. Че Иисус, прайзын сығарыбызып, Позынаң хада хызыҷахтың іҷе-пабазын паза хада полған ӱгренҷілерін не халғызып, хызыҷах чатхан орынзар апарған.

⁴¹ Анаң, хызыҷахты холынаң тудып алып, теен ағаа: – Талифа куми. Анзы «Хызыҷах, сағаа тіпчем, тур», теені полған.

⁴² Хызыҷах сах андох тур килген, анаң пас чӧр сыххан. Ағаа он ікі час полған. Кӧрген кізілер тың хайхасханнар.

⁴³ Иисус оларны, пу нимедеңер пірдеезі пілбезін тіп, хатығлаан паза хызыҷахты азырап саларға чахаан.