Марк 3 - Наа Молҷағ

Холы хуруп парған кізіні субботада имнебіскені

¹ Иисус пазох синагогазар килген. Анда холы хуруп парған кізі полған.

² Иисус субботада имнир бе ни тіп, хай піреезі Аны пыролирға китеен.

³ Иисус холы хураан кізее теен: – Чон алнына сых!

⁴ Кізілерге, тізең, чоохтанған: – Суббота кӱнде чахсы алай чабал ниме идерге кирек пе? Кізі тынын ал халарға алай чох ит саларға ба аны? Олар сым на турғаннар.

⁵ Иисус, улуғ ӧкпеде оларзар кӧрібізіп, тас чӱректіг пол парғаннарына ачырғана, ағырығ кізее теен: – Холың алнынзар сун! Ол кізі холын сунғанда, ағырығ холы, пірсіӧк чіли, хазых пол парған.

⁶ Фарисейлер, тізең, сых парыбызып, Ирод ханға чағын кізілернең Иисусты чох ит саларға сах андох чӧптес сыхханнар.

Иисустың кӧл хазында имнеені

⁷ Иисус позының ӱгренҷілерінең хада кӧл хазынзар пас парған. Аның ай соонҷох Галилей чирінең, Иудей чирінең,

⁸ Иерусалимнең, Идумей чирінең паза Иордан суғның озаринаң, Тир, Сидон саарлар ибіре чуртапчатхан кӧп кізі парған, Иисустың иткен киректерін истіп, Аныңзар чон сӱрееліг чыылысхан.

⁹ Иисус, ол чонға хыстырбасха тіп, ӱгренҷілеріне Позына киме тимнеп саларға чахаан.

¹⁰ Кӧп чонны айдастырғаннаңар андар ағырығ кізілер, кибіне хол даа теертіп аларға тіп, сыынғаннар.

¹¹ Айналар даа, Аны кӧр салып, Аның алнында тӱңдере тӱзіп, хысхырысханнар: – Син Худай Оолғызың.

¹² Че Иисус оларны Позының кем полчатханын таратпасха хатығлаан.

Иисус он ікі ӱгренҷізін таллапча

¹³ Анаң Ол, таға сығып, хынған кізілерін Позынаң хада хығырған. Олар Аныңзар килгеннер.

¹⁴ Оларның аразынаң, Позынаң хада поларларын паза чонға Аның ӱгредиин тарадарларын таллап, он ікі кізі турғысхан.

¹⁵ Оларға ағырығ кізілерні чазылдырарға паза чабал хуттарны сығарарға ӱлгӱ пирген.

¹⁶ Ол таллаан: Симонны (Иисус ағаа Пётр тіп сола пирген),

¹⁷ Зеведей оолғын Иаковты паза Иаковтың харындазы Иоанны (оларға Воанергес алай «Кӱгӱрт ооллары» тіп сола пирілген),

¹⁸ Андрейні, Филиппті, Варфоломейні, Матфейні, Фоманы, Алфей оолғы Иаковты, Фаддейні, Симон Кананитті

¹⁹ паза соонаң Иисусты садыбысхан Иуда Искариотты.

Айна позын хайди сӱрер?

²⁰ Иисус ӱгренҷілерінең хада тураа кіргенде, чон пазох ла, Ағаа паза ӱгренҷілеріне азыранарға даа оңдай пирбин, тураа сыыспин чыыл парған.

²¹ Аны истіп, туғаннары «Иисус алҷаахча» тіп, Аны апарыбызарға килгеннер.

²² Иерусалимнең килген Моисей Чахии пілігҷілері, тізең, «Аның істінде Веельзевул, ол чабал хуттарны айналар ханының кӱзінең сығарча» тееннер.

²³ Иисус, оларны хығыртыбызып, оларға, сайтан сайтанны хайди сығарар тіп, кип-чоохтарнаң ӱгреде чоохтап сыххан: –

²⁴ Хан-чирі позы позында ікі пӧліл парза, ол ӱлгӱ тур полбас

²⁵ паза ибдегілер удур-тӧдір чаалас сыхсалар, андағ иб тур полбас.

²⁶ Хаҷан сайтан пос позынаң тоғыр парза, ікі чара полыбысса, ол аның тоозылғаны полар.

²⁷ Кӱстігнің туразына кіріп, турадаң пір ниме сығар полбас, ээзін пурун палғабысса ла, ол тураны тонап полар.

²⁸ Сынны чоохтапчам сірерге, ноо даа аар чазых, Худайдаң тоғыр хайдағ даа чоох ӱчӱн кізілерге пыро тасталар,

²⁹ че кем Худай Худынаңар хомай чоохтанар, аның пырозы хаҷан даа тасталбас, ол саңайға чарғыладар.

³⁰ Анзын Ол, Позына чабал хут кір парған тіп чоохтасчатханнарында, іди теен.

Иисустың іҷезі, паза харындастары

³¹ Анаң Иисустың іҷезі паза харындастары килгеннер. Тастында турып, Аны хығыртып, кізі ысханнар.

³² Иисустың ибіре чон одырған. Ағаа тееннер: – Мына Синің іҷең, харындастарың паза пиҷелерің тастында турлар, Сині сурчалар. –

³³ Кемнердір Минің іҷем паза Минің харындастарым? – нандырған Ол.

³⁴ Анаң, ибіркілерзер кӧрібізіп, теен: – Мына Минің іҷем паза Минің харындастарым.

³⁵ Худай кӧңнін толдырчатханнар Мағаа харындас, пиҷе паза іҷе нооза.