Марк 15 - Наа Молҷағ

Иисус Пилаттың алнында

¹ Иртеніндӧк, улуғ абыстар, ах сағаллар, Моисей Чахии пілігҷілері паза прай ӧӧркі чарғы чӧптескен соонда, Иисусты, палғаттырып, Пилатсар апарғаннар.

² Пилат Иисустаң сурған: – Синзің ме, Иудей ханы? Иисус ағаа нандырған: – Син тідің аны.

³ Улуғ абыстар Иисусты кӧп нименің ӱчӱн пыролап сыхханнар.

⁴ Пилат пазох Иисустаң сурған: – Пір дее ниме нандырбинчазың ма? Кӧр, синнең тоғыр хайдағ кӧп киречілестер.

⁵ Иисустың пазох пір ниме дее тапсабаанына, тізең, Пилат таңнаан.

⁶ Ӱлӱкӱн сай Пилат чон сурынғаны хоостыра харибдең пір кізі позыдыбысчаң полған.

⁷ Харибде сайбағ салғаннарнаң хада ол туста Варавва теен кізі полған. Олар сайбағлар тузында кізі ӧдір салғаннар.

⁸ Чыылған чон Пилаттаң кибірні толдырарға сурынған.

⁹ Пилат оларзар айланған: – Иудей ханын позыдим ма сірерге?

¹⁰ Ол улуғ абыстар, Иисусха істі чохтанып, аның холына пирібіскеннерін сизінген.

¹¹ Че улуғ абыстар, Иисустың орнына Варавваны позытсын тіп, сурынарға чонны кӧӧктіргеннер.

¹² Пилат пазох оларзар айланған: – Сірер Иудей ханы тіпчеткен кізіні хайди идим? –

¹³ Кіреске хазирға аны! – хысхырыс сыхханнар кізілер. –

¹⁴ Хайдағ хомай ниме иткен ол? – теен оларға Пилат. Че кізілер улам тың хысхырғаннар: – Кіреске хазирға аны!

¹⁵ Андада Пилат, чонның кӧңнін алып, Варавваны позыдыбысхан, Иисусты, тізең, соғып, кіреске хазап саларға чахаан.

Иисусты кіреске хазааны

¹⁶ Чааҷылар Иисусты пастых ӧргезінің сиденінзер апарып, халған чааҷыларын андарох чыып килгеннер.

¹⁷ Анаң Ағаа узун хызыл кӧгенек, пазына, тізең, тігенек ӱрімін кизіртібіскеннер.

¹⁸ Анаң Ағаа хысхыр сыхханнар: – Изен ползын Иудей ханы!

¹⁹ Чааҷылар Аны пазынаң сымыхнаң саап, чаба тӱкӱргеннер паза, кӱрленіп ала, тізекке тӱзіп, Ағаа пазыраачых полғаннар.

²⁰ Іди Ағаа кӱліп алып, хызыл кӧгенекті суурыбызып, Позының кип-азаан кизіртібізіп, Аны кіреске хазирға апарғаннар.

²¹ Чазыдаң Киринейдегі Симон, Александрнаң Руфтың пабазы, париған полған. Чааҷылар аны Иисустың кірезін апардырғаннар.

²² Иисусты Голгофа теен тигейзер ағыл килгеннер. «Голгофа» – Хуу пас теені полча.

²³ Иисусха смирна хайахтығ араға ізерге пиргеннер, че Ол іспеен.

²⁴ Анаң, Иисусты кіреске хазаан соонда, чааҷылар, пос аразында Аның кип-азаан ӱлеп, ӱлӱске тас тастааннар.

²⁵ Аны кіреске хазаан туста кӱн сыхханнаң ӱс час тузы полған.

²⁶ Иисусты пыролап, чардыда «Иудей ханы» тіп пазып, хазап салғаннар.

²⁷ Иисуснаң хада ікі тонағҷыны хазааннар: пірсін Аның оң саринда, пірсін, тізең, сол саринда.

²⁸ Іди Худай Пічиинде «Тонағҷыларға тиңнелген» тіп пазылғаны тол парған.

²⁹ Чол париғаннар, пастарын чайхап ала, Иисусты сӧклеп, тееннер: – Храмны иңзерібізіп, ӱс кӱнге пӱдірібісчең кӱзің пар полза,

³⁰ кірестең тӱзіп, позыңны арачыла.

³¹ Улуғ абыстар паза Моисей Чахии пілігҷілері ідӧк хатхырысханнар, удур-тӧдір чоохтасханнар: – Пасхаларын арачылаан, позын, тізең, арачылап полбинча!

³² Израиль ханы Мессий-Христос ам кірестең позып алзын. Андада, аны кӧріп, ағаа киртінербіс піс. Хада хазалған сайбағҷылар даа Аны сӧклееннерӧк.

Иисустың ӧлімі

³³ Кӱн ортызында прай чир ӱстӱ харасхы пол килген. Іди ӱс час изере турған.

³⁴ Кӱнӧрте, тоғыс час тузында, Иисус тың хысхыра тӱскен: «Элои, Элои! Лама сабахтани?» Анзы «Худайым, Худайым! Ноға Син Мині тастадың» теені полча.

³⁵ Хости турған кізілер, ол сӧстерні истіп, пос аразында чоохтасханнар: – Мына, Илияны хығыр тур.

³⁶ Пір кізі, тізең, чӱгӱр парып, сӱбӱректі хуйаң арағада ӧллебіскен. Анаң аны, сырғайға хаптырып алып, Иисусха сунып, теен: – Кӧрербіс, Илия кірестең суурарға килер бе ни зе?

³⁷ Иисус, тізең, хысхыр киліп, тынын позыдыбысхан.

³⁸ Олох туста храмда кӧзеңе ӱстӱнең алтынзар алдыра ікі чара талал чӧрібіскен.

³⁹ Иисустаң тоғыр турған чааҷылар пастығы Аның іди, хысхырып, тоозыл парғанын кӧріп, чоохтанған: – Пу кізі сынап таа Худай Оолғы полтыр.

⁴⁰ Мындох ипчілер оортахтын кӧр турғаннар. Оларның аразында Мария Магдалина, Кічіг Иаков паза Иосий харындастарның іҷезі Мария паза Саломий полғаннар.

⁴¹ Олар Иисустың соонҷа Галилей чирінең сығара килгеннер паза Ағаа полыс пир турҷаңнар. Олардаң даа пасха Иерусалимзер Иисуснаң хада килген илееде ипчі турған.

Иисусты чығаны

⁴² Суббота кӱннің алнындағы пятница иирі пол килгеннеңер,

⁴³ Пастыхтарның саблығ кізізі Аримафей саардағы Иосиф чиде салған. Ол позы даа Худай хан-ӱлгӱзі килерін сахтаан. Пилатсар ол, туртухпин кіріп, аннаң Иисустың сӧӧгін сурған.

⁴⁴ Пилат Иисус іди табырах ӱреп парғанына таңнаан. Чааҷылар пастиин хығырыбызып, аннаң сурған: – Ӱрде тоозыл парды ба ол?

⁴⁵ Чааҷылар пастығының нандыриин истіп алып, ол Иисустың сӧӧгін Иосифке пирібіскен.

⁴⁶ Иосиф, ис садып алып, Иисусты кірестең суурып, ол иске ораабысхан. Анаң хайада кирт салған хую істінде Аны чатыр салған, хую ахсын чоон таснаң пазыр салған.

⁴⁷ Мария Магдалина паза Иосийнің іҷезі Мария Иисусты хайада чығаннарын кӧргеннер.