Марк 14 - Наа Молҷағ

Иисустаң тоғыр чӧптезіг

¹ Па́сха тіп ӱлӱкӱнге паза Ачытпаан халас пайрамына ікі хоных халған полған. Улуғ абыстар паза Моисей Чахии пілігҷілері, Иисусты харанға тудып алып, Аны ӧдірібізерге сағыныбысханнар.

² Че чонда хорығ сығарбасха тіп, ӱлӱкӱнде аны итпеске чарат салғаннар.

Иисус Вифанийде

³ Иисус Вифанийде чызығ палығлығ Симон тіп аттығ кізінің туразында стол кистінде одырғанында, андар алавастр ідіс тудына пір ипчі кір килген. Ідізінде аның нард ӧзімінең сығарған аарлығ миро хайах полған. Ипчі, ідістің ахсын талап, Иисуссар пас киліп, хайахты пазына урған.

⁴ Анда одырғаннарның хай-піреелері, ӧкпелеп парып, пос аразында чоохтасханнар: – Ол аарлығ хайахты ноға іди ӱретче?

⁵ Аны ӱс чӱс динарийдең дее аарлыға садыбызып, ахчазын чох кізілерге ӱлеп саларҷых, – тіп перініскеннер.

⁶ Че Иисус оларға теен: – Хадылбаңар ағаа. Ноға хырысчазар аны? Ол Мағаа чахсы итті.

⁷ Чох кізілер сірернің хыриңарда хаҷан даа поларлар. Хаҷан хынза, анда оларға полыс пир турарзар. Че Мин сірернең хада тӧӧле полбаспын.

⁸ Пу ипчі идер нимені ит салды. Мині чыырға тимнеп, азынада Мағаа аарлығ хайах сӱртті.

⁹ Сынны чоохтапчам сірерге, прай чир-чалбахта Чахсы Хабар тарадылар, ноо даа чирде пу ипчі ундулбас ӱчӱн, ол иткен нимедеңер чоохталар.

Иуда улуғ абыстарда

¹⁰ Ол арада Иуда Искариот, он ікі ӱгренҷізінің пірсі, Иисусты садыбызарға тіп, улуғ абыстарзар парған.

¹¹ Аны истіп, улуғ абыстар ӧрін парғаннар паза ағаа ахча пирер пол салғаннар. Иуда, тізең, Иисусты оларның холына пирібізер оңдай тілеп сыххан.

Ӱлӱкӱн чиизін тимнеені

¹² Ачытпаан халас пайрамының пастағы кӱнінде, тайыға хурағанны соғыбысханда, ӱгренҷілері Иисустаң сурғаннар: – Син иирде хайда азыранарзың? Піс, андар парып, чиис тимнебізибіс.

¹³ Иисус, ікі ӱгренҷізін ысчатханда, оларға чоохтаан: – Саарзар парыңар. Сірерге суғлығ ыраға апарчатхан кізі тоғас парар. Аның соонҷа пазып,

¹⁴ ол кірген тураа хадох кіріп, иб ээзіне чоохтирзар: «Ӱгретчі ӱгренҷілерінең хада Па́сха чиизін чіҷең орын хайдадыр тіп сурапча».

¹⁵ Ээзі сірерге ӧӧркі хадылында, улуғ пӧлікте, орын кӧзіт пирер. Анда прай ниме тимде полар. Андох піске чіҷең ниме тимнеп салыңар.

¹⁶ Ӱгренҷілері, саарзар парып, прай нимені Иисус чоохтаан хоостыра хап-орта таап алғаннар. Анда ӱлӱкӱн тамағын тимнебіскеннер.

Иирдегі чиис

¹⁷ Иир читкенде, Ол он ікі ӱгренҷізінең хада андар килген.

¹⁸ Олар, стол кистіне одырып, азыранчатханнарында, Иисус теен: – Сынны чоохтапчам сірерге, сағам Миннең хада азыранчатхан сірернің пірсі Мині садыбызар.

¹⁹ Ӱгренҷілері, хомзын парып, пірде пірсі сур сыххан: – Ол кізі мин нимеспін, йа?

²⁰ Иисус ӱгренҷілеріне нандырған: – Ол холын Миннең хада пір айахха сунған он ікі ӱгренҷінің пірсі.

²¹ Итсе-де, Кізі Оолғы Аннаңар Худай Пічиинде пазылғаны хоостыра ӧл парар. Че Кізі Оолғын сатчатхан кізее хыйал! Ол кізее тӧрібеске артых поларҷых.

²² Олар азыранчатханнарында, Иисус, халас алып, алғабысхан. Анаң, сындырып, ӱгренҷілеріне пирген аны: – Алыңар, чіңер. Пу Минің ит-сӧӧгім.

²³ Анаң, чірче алып, алғап, ӱгренҷілеріне пирген. Прайзы ол чірчедең іскен.

²⁴ Иисус теен оларға: – Пу чірчеде Наа Молҷағны таныхтапчатхан ханым, кӧп кізінің ӱчӱн тӧгілер ол.

²⁵ Сынны чоохтапчам сірерге, Худай хан-чирінде наа виноград арағазын іскенімҷе, Мин виноград арағазын паза іспеспін.

Пётрның хыйа поларын ухаанҷылааны

²⁶ Анаң олар, Худайны саблапчатхан ырны ырлап ала, Елеон тағзар парғаннар.

²⁷ Иисус оларға теен: – Пу хараазын сірер прайзыңар Мині тастирзар. Пазыл парған нооза: «Хадарҷыны ӧдірібізербін, хойлары тарасхлап парарлар».

²⁸ Че тірілген соонда Мин сірерні Галилей чирінде сағирбын.

²⁹ Пётр Иисусха чоохтанған: – Прайзы даа сині тастап парыбысса, мин тастабаспын.

³⁰ Андада Иисус ағаа теен: – Сынны чоохтапчам сағаа, пуох хараазын, питук ікі хати тапсаанҷа, Миннең ӱс хати тӧдір поларзың.

³¹ Че Пётр хатап-хатап чоохтанған: – Синнең хада ӧлімге дее парарға киліссе, мин Синнең хыйа полбаспын. Пасха даа ӱгренҷілері ідӧк тееннер.

Иисус Гефсиман садында

³² Анаң олар Гефсиман теен садсар читкеннер. Иисус Позының ӱгренҷілеріне чоохтанған: – Мин пазырып алғанҷа, мында одыр турыңар.

³³ Позынаң хада Ол Пётрны, Иаковты паза Иоанны алып алған. Ӧзеліп, ачырғанып ала,

³⁴ Иисус оларға теен: – Чобаам сині чох улуғ, ол Мині ӧдір парир. Узубин пол турыңар мында.

³⁵ Ырах нимес пас парыбызып, Иисус, чирге чаба чадып, полар оңдайы пар полза, пу килчеткен ӱлӱс хыйыс парзын тіп, пазырған.

³⁶ Піди чоохтанған Ол: – Авва Пабам! Прай ниме Синің холыңда: пу ӱлӱзімні хыйа ит пир Мағаа. Че, Мин хынғанни итпе, Позыңның кӧңнін толдыр.

³⁷ Нандыра киліп, кӧрзе, пайаағы ӱгренҷілері узупчалар. Андада Ол Пётрға теен: – Симон, син узупчазың ма? Пір час таа узубин пол полбадың ма?

³⁸ Хыҷыхха пастырбас ӱчӱн, узубаңар, пазырыңар. Кізі кӧңні кӱстіг, че ит-сӧӧгі порт.

³⁹ Пазох хыйа пас парыбызып, пайаағыох сӧстерні чоохтанып ала, пазыр сыххан.

⁴⁰ Анаң айланғанда, Иисус тігілернің хатабох узупчатханнарын кӧр салған. Олар харахтарын даа ас полбинчатханнар паза Ағаа ниме дее нандырҷаан пілбееннер.

⁴¹ Ол, ӱзінҷізін киліп, оларға чоохтанған: – Сірер, ам даа узуп, тынанчазар ба? Чидер ам. Тус чит килді. Кізі Оолғы чазыхтығларның холына пиріл парарға чӧр.

⁴² Турыңар, парааңар. Мині садыбысхан кізі чағдап килді.

Иисусты тудып алғаннар

⁴³ Иисус читіре чоохтанғалаххаох, он ікі ӱгренҷізінің пірсі Иуда паза анынаң хада хылыстар, ӧзектер тудынған кізілер чиде тӱскеннер. Оларны улуғ абыстар, Моисей Чахии пілігҷілері паза ах сағаллар ысханнар.

⁴⁴ Иисусты сатхан кізі оларға сизік пирерге чоохтас салған: – Мин, пас киліп, кемні охсанзам, ол Иисус полар. Аны, тудып, ипти апарарзар.

⁴⁵ Сах андох Иисуссар пас киліп: «Ӱгретчі! Ӱгретчі!» – теен. Анаң Аны охсаныбысхан.

⁴⁶ Тирігліг кізілер Иисусты, хаап алып, апар сыхханнар.

⁴⁷ Хости турған ӱгренҷілерінің пірсі, хылызын сығарып, улуғ абыстың нымысчызының хулаан кизе сабысхан.

⁴⁸ Андада Иисус оларға теен: – Сірер, тонағҷыны тударға килген чіли, Миннең тоғыр хылыстығ, ӧзектіг читтіңер.

⁴⁹ Мин сірернең хада кӱннің сай храмда полҷаңмын, сірерні ӱгреткем, сірер, тізең, Мағаа теңмеҷеңзер. Че Худай Пічиинде пазылғаны толзын.

⁵⁰ Иисустың ӱгренҷілері, Аны тасти, чӱгӱрісклебіскеннер.

⁵¹ Иисустың соонҷа иске сӱргенген пір оол ла парған. Чааҷылар аны тудыбох алғаннар.

⁵² Че ол, ораанған сӱбӱрегін оларның холларында халдыр салып, хуба чалаас чӱгӱре халған.

Иисус ӧӧркі чарғы алнында

⁵³ Иисусты улуғ абыссар ағыл килгеннер. Прай улуғ абыстар, ах сағаллар паза Моисей Чахии пілігҷілері пеер чыылыс парғаннар.

⁵⁴ Пётр сооларынҷа, оортах пазып, оларны хооп килген. Улуғ абыстың ибіне читкенде, сиден істіне кіріп, нымысчыларынаң хада отха чылынып одыр салған.

⁵⁵ Улуғ абыстар паза ӧӧркі чарғы, Иисустаң тоғыр пірее пыро таап, Аны ӧлімге чарғылирға харасханнар. Че пір дее сылтағ таап полбинчатханнар.

⁵⁶ Кӧп кізі Аннаң тоғыр чой киречілеен, че оларның киречілестері нимее чарабааннар.

⁵⁷ Хай піреелері, турып, Аннаң тоғыр тайма ниме чоохтааннар: –

⁵⁸ Піс Аның піди теенін искебіс: «Хол кӱзінең пӱдірген пу храмны иңзерібізіп, Мин ӱс кӱннің аразына кізі холы итпеен пасха храм пӱдір саларбын».

⁵⁹ Че пу даа тайма чоох читкіҷе полбаан.

⁶⁰ Андада улуғ абыс, Иисустың алнында турыбызып, сурған: – Синнең тоғыр киречілееннеріне ноға пір дее ниме нандырбинчазың?

⁶¹ Че Иисус, тапсабин, сым турған. Улуғ абыс пазох сурған: – Синзің ме Мессий-Христос, Худай Оолғы?

⁶² Иисус нандырған: – Йа, Минмін. Сірер Кізі Оолғын Чайаачының оң саринда одырчатханын паза тигірдегі пулуттарҷа килчеткенін кӧрерзер.

⁶³ Андада улуғ абыс, позының кип-азаан тали тартып, хысхырған: – Паза хайдағ киречі киректір піске?

⁶⁴ Худайны хайди нимее салбинчатханын истер бе сірер? Ам хайди идерге аны? Иисусты, прайзы пыролыға санап, ӧлімге чарғылааннар.

⁶⁵ Хайзылары Ағаа тӱкӱргеннер, хараан чаба палғап, Аны саап ала чоохтанғаннар: – Че, ухаанҷыла амды! Нымысчыларынаң ала Иисусты наахтааннар.

Пётрның тӧдір хылынғаны

⁶⁶ Пётр ол туста сиден істінде полған. Андар улуғ абыстың сӱмекчіні пас килген.

⁶⁷ Пётрның от хазында чылын турчатханын кӧріп, ол ипчі теен: – Син дее Назареттең сыххан Иисуснаң хада полғазың.

⁶⁸ Че Пётр, тоғыр саап, нандырған: – Син ниме теенін оңар полбадым, – іди тіп ала, хана ізиинзер пас чӧрібіскен. Ол туста питук тапсабысхан.

⁶⁹ Чалҷы ипчі, Пётрзар харах тастап, хости турған кізілерге пазох чоохтанған: – Пу кізі оларның пірсі полча.

⁷⁰ Пётр хатабох тоғыр сапхан, че тӱрче поларынаң анда турчатханнар Пётрға пазох чоохтанғаннар: – Син сыннаң даа оларның кізізі поларзың. Чооғың хоостыра даа Галилей чирінеңзің.

⁷¹ Пётр обалланған-пазырынған: – Сірер чоохтапчатхан кізіні пілбинчем мин.

⁷² Ол туста питук ікінҷізін тапсабысхан. Андада Пётр, Иисустың «Питук ікі хати тапсаанҷа, син Миннең ӱс хати тӧдір пазынарзың» теен чооғын сағысха киріп, ылғабысхан.