Марк 13 - Наа Молҷағ

Иерусалимнің иңзерілерін ухаанҷылааны

¹ Иисус храмнаң сыхчатханда, Аның ӱгренҷілерінің пірсі Ағаа теен: – Ӱгретчі! Кӧрдек пу килкім тастардаң иділген улуғ тураларны.

² Иисус Ағаа нандырған: – Пу улуғ тураларны кӧрчезің ме? Прай ниме иңзерілер мында, тас ӱстӱнде тас халбас.

³ Хаҷан храмнаң тоғыра Елеон тағда одырчатханнарында, тізең, Пётр, Иаков, Иоанн паза Андрей, ағылахти халып, Аннаң сурғаннар: –

⁴ Хаҷан полар ол ниме? Хайдағ танығ кӧрербіс піс аның алнында?

⁵ Иисус оларға нандырған: – Китеніңер, пірдеезіне алаахтыртпаңар.

⁶ Кӧп кізі Минің адымнаң аданып килер, «Мин Мессий-Христоспын» тіп аданып, илеедезін алаахтыр саларлар.

⁷ Чағынғы паза ыраххы чаалардаңар ис салзаңар, хорыхпаңар. Прай ол полҷаң ниме, че анзы ам даа тӱгенҷізі нимес.

⁸ Чон чоннаң, хан ханнаң тоғыр кӧдірілер. Анда-мында чир тітірир, хорылыс, ӧзӧгіс пол сығар. Прай пу нимелер пала тӧрирде пасталчатхан тулғахтар осхастар.

Ирее паза чобағ полар

⁹ Сірер, тізең, китеніңер. Сірерні ах сағалларның чарғызына тартарлар паза синагогаларда соғарлар. Миннең ӱчӱн сірерні хан-пиглернің алнында Миннеңер киречілирге турғызарлар.

¹⁰ Іди прай чоннарны Чахсы Хабарға пурнада ӱгрет саларға кирек.

¹¹ Хаҷан сірерні, тудып алып, чарғаа апарчатсалар, ниме чоохтирынаңар азынада сағыссырабаңар. Ол туста сірерге пирілген сағысты чарлаңар. Аны, сірер нимес, Худай Худы чоохтанар.

¹² Харындазы харындазын, пабазы палаларын ӧлімге пирер. Палалары, паба-іҷедең тоғыр кӧдіріліп, ӧлімге пирерлер оларны.

¹³ Минің адымның ӱчӱн сірерні прайзы хырт кӧрер. Че тоозазын сыдас парыбысхан на кізі арачылан халар.

¹⁴ Чиркестіг нименің ызых орында турчатханын кӧр салзар, аннаңар ухаанҷы Даниил чоохтаан полған (хығырған кізі пілер аны), андада Иудей чиріндегілер тағларзар тиссіннер.

¹⁵ Тура хырында турған кізі, аннаң тӱзіп, ибінзер пірее ниме алып аларға тіп кірбезін.

¹⁶ Хырада полғаны кип-азаана айланмазын.

¹⁷ Ол кӱннерде тойлығ паза час палалығ ипчілерге хыйал-чобағ тӱзер.

¹⁸ Пу киректер хысхы туста пол парбазын тіп, пазырыңар.

¹⁹ Ол кӱннерде Худай чир-чайаанны пӱдіргеннең ала пу тусха теере кӧрбеен ӧзелісті кӧрерлер. Паза андағ хорғыстығ ниме полбаан, полбас.

²⁰ Хан Худай ол хорғыстығ кӱннерні хызырбаан полза, пір дее тіріг ниме арачылан полбасчых. Че Позы таллап алған кізілері ӱчӱн ол кӱннерні хызырған.

²¹ Андада сірерге піреезі: «Мына Мессий-Христос мында» алай «Ол тігде» тізе, киртінмеңер.

²² Кӧп чой мессий-христостар паза чой ухаанҷылар сыға саларлар нооза. Худайның таллап алған кізілерін алаахтыр поларлар ба тіп, танығлар паза хайхастар идіп, кӧзідерлер.

²³ Сірер, тізең, китеніңер. Мин азынада чоохтап пирдім сірерге.

²⁴ Ол ӧзеліс кӱннерінде кӱн пӱлестел парар, ай чарыбас.

²⁵ Тигірдең чылтыстар тӱс парарлар. Тигірнің кӱстері тітіри тӱзерлер.

²⁶ Олох арада Кізі Оолғын илбек кӱзінде паза сабланыста пулуттарҷа пас парғанын кӧр саларлар.

²⁷ Ол, тиксі-тилекейнің тӧрт саринзар – чир чағазынаң тигірнің ӱстӱ-хырина читіре – Позының ангеллерін ызып, Позының таллап алған кізілерін чыып алар.

Ол кӱн хаҷан полар?

²⁸ Сірерге смоква ағазы кӧзідім ползын: аның салаалары, нымзап, пӱрлен сыхсалар, чайғы чидіп одырғанын пілчезер.

²⁹ Сірер дее ідӧк, Мин чоохтааны толчатханын кӧріп, Аның мындазын, ізік хыринда, чағын килгенін піліңер.

³⁰ Сынны чоохтапчам сірерге, прай пу ниме амғы тӧл ӱзілгелеккеӧк полар.

³¹ Тигірнең чир чіт парарлар, Минің сӧзім, тізең, халар.

³² Ол кӱн, ол тус хаҷан поларын пірдеезі, тигірдегі ангеллер дее, Оолғы даа пілбинче. Аны Пабам на пілче.

³³ Ол тус хаҷан чит килерін пілбинчеткенде, кӧріңер, узубаңар, пазырыңар.

³⁴ Кізі ибдең ырах чорыхха сыхчатса, позының нымысчыларына ӱлгӱ пиріп, полғанына ла ниме идерге, хадағҷызына, тізең, сиргек тудынарға чахаан чіли,

³⁵ ана ідӧк сірер дее сиргек полыңар. Пілбинчезер нооза тура ээзі хаҷан чиде тӱзер: иирде, орты хараада ба алай питук тапсир туста, алай кӱн сығызында.

³⁶ Кинетін чиде тӱзіп, сірер узупчатханын тудып албазын.

³⁷ Сірерге чоохтапчатхан нимені прайзына чоохтапчам: узубаңар.