Марк 10 - Наа Молҷағ

Чарылыстаңар

¹ Иисус, андартын чол сығып, Иордан суғның озаринзар, Иудей чирінзер, килген. Иисуссар пазох кізілер чыылысханнар. Ол пазох оларны ӱгреде чоохтаан.

² Аныңзар фарисейлер пас киліп, сыни-кити сурғаннар: – Ирепчі кізее чарылызарға чарадылча ба?

³ Иисус оларға теен: – Моисей сірерге ниме чахаан? –

⁴ Ирі ипчізіне чарылыс пічиин пас салза, Моисей чарылызарға чаратхан, – нандырғаннар олар.

⁵ Андада Иисус оларға теен: – Сірернің хатығ чӱректеріңні піле, пу чахиин пасхан ол.

⁶ Чир пастап пӱтчеткенде, Худай иреннең ипчіні чайап салған.

⁷ Аннаңар ир кізі, паба-іҷезінең чарылып,

⁸ ипчізінең пірік парар. Олар ікӧлең пір кізі осхас пол парарлар: ікі кізі полбин, пір кізі пол парчалар.

⁹ Худай піріктір салғанны, тізең, кізі чар полбас.

¹⁰ Соонаң, тураа кіргеннерінде, ӱгренҷілері Иисустаң аннаңар хатабох сурғаннар.

¹¹ Иисус оларға чоохтап пирген: – Ир кізі, ипчізінең чарылызып, пасха ипчіні ал салза, ол анынаң оралысханға килісче.

¹² Ипчізі дее, ирінең чарылызып, пасха ирге пар салза, ол анынаң оралысханға килісче.

Иисус олғаннарны алғапча

¹³ Кізілер палаларын Иисуссар, алғабыссын тіп, ағылғаннар. Че ӱгренҷілері оларны кӧксееннер.

¹⁴ Аны кӧре, Иисус, тарын парып, оларға чоохтанған: – Палаларға Минзер иртерге чарадыңар, харығ полбаңар оларға. Худай хан-чирі пала осхас кізілерни полар.

¹⁵ Сынны чоохтапчам сірерге, Худай хан-ӱлгӱзін олған чіли удурлабааннары Худай хан-чирінзер хаҷан даа кір полбастар.

¹⁶ Анаң, олғаннарны хуҷахтап, пастарына холларын салып, оларны алғаан.

Пай кізінең чоохтасханы

¹⁷ Иисус чорыхха тимненчеткенде, хайдағ-да кізі, ойлап киліп, Аның алнына тізекке тӱскен: – Чахсы ӱгретчі! Мӧгі чуртас алар ӱчӱн мин ниме идерге кирекпін?

¹⁸ Иисус ағаа теен: – Син ноға Мині чахсы тідің? Пірдеезі чахсы нимес, чалғыс Худай ла андағ.

¹⁹ Чахығларын пілчезің ме? Ӧдірбе, оралыс чӧрбе, оғырлаба, чой киречілебе, кізіні хыйыхтаба, пабаң-іҷеңні улуғла. –

²⁰ Ӱгретчі, мин чииттең іди чуртаам, – нандырған ол кізі.

²¹ Иисус, ол кізізер кӧрібізіп, аны чӱрекке алынып, теен ағаа: – Пір ниме сағаа читпинче: парып, прай пар-чох нимеңні садыбыс, ахчаңны чох кізілерге ӱлебіс, андада пайың тигірде полар. Анаң Минзер киліп, кірезің алып, соомҷа пар.

²² Пу сӧстерні истіп, ол кізі арын парыбысхан. Пайы улуғдаңар, ол мӧңіс кӧңніліг хыйа пастыра халған.

²³ Иисус, ибіре харахсыныбызып, Позының ӱгренҷілеріне теен: – Пай кізілерге Худай хан-ӱлгӱзінзер кірері хайдағ сидіктір.

²⁴ Ӱгренҷілері ол сӧстерге хайхааннар. Иисус, тізең, оларға хатабох чоохтанған: – Палаларым! Ис-пайға ізенчеткеннерге Худай хан-ӱлгӱзінзер кірері хайдағ сидіктір.

²⁵ Пай кізі Худай хан-ӱлгӱзінзер кіргенҷе, тибее іңе ӱдінең ӱтіп аларға оой полар.

²⁶ Ӱгренҷілері, тізең, улам хайхазып, пос алынҷа чоохтасханнар: – Андағда кем арачылан полар ни?

²⁷ Иисус, оларзар кӧрібізіп, теен: – Кізілер ит полбас ниме ол, Худай ла идер аны. Худай прай ниме ит полар.

²⁸ Андада Пётр Ағаа чоохтаныбысхан: – Мына піс, прай нимебісті тасти, Синің сооңҷа чӧрчебіс.

²⁹ Иисус нандырған ағаа: – Сынны чоохтапчам сірерге, Минің паза Чахсы Хабарның ӱчӱн иб-чуртын, харындас-пиҷелерін, паба-іҷезін, палаларын, хыраларын тастааннары прай нимее чидіп аларлар.

³⁰ Сағам даа, сӱрдірчеткеннерінде, чӱс хатап кӧп тураларға, харындас-пиҷелерге, паба-іҷелерге, палаларға паза хыраларға чидерлер. Килер туста, тізең, оларға мӧгі чуртас пирілер.

³¹ Че пастағыларының кӧбізі соонда пол парар, соондағыларның кӧбізі, тізең, алнында пол парар.

Иисус ӧлімінеңер паза тірілерінеңер пазох ухаанҷылапча

³² Хаҷан олар Иерусалимзер чол тутчатханнарында, Иисус алнында париған. Ӱгренҷілері, тізең, Аның соонҷа улуғ ӱрӱгісте, хорығып ала, пастырғлааннар. Иисус, он ікі ӱгренҷізін хығырып алып, Позынаң ниме поларынаңар пазох оларға чоохтап сыххан: –

³³ Мына піс Иерусалимзер парирбыс. Анда Кізі Оолғын, садып, улуғ абыстарның паза Моисей Чахии пілігҷілерінің холына пирібізерлер. Олар Аны, ӧлімге чарғылап, пасха худайлығларның холына пирібізерлер.

³⁴ Ағаа кӱлерлер, чаба тӱкӱрерлер, соғарлар анаң ӧдір саларлар. Че ӱзінҷі кӱнінде Ол тіріл парар.

Зеведей оолларының сурынызы

³⁵ Андада Зеведей ооллары Иаков паза Иоанн, Иисуссар пас киліп, тееннер: – Ӱгретчі! Піс Сині пір ниме толдыр пирерге сурынчабыс. –

³⁶ Ниме идерге кирекпін Мин сірерге? – сурған олардаң Иисус. –

³⁷ Синің ӱлгӱң килзе, пірсібіске Синің ӱлгӱ сірееңнің оң сариңда, пірсіне сол саринда одыр саларға чарат, – нандырғаннар Ағаа олар.

³⁸ Че Иисус оларға теен: – Ниме сурчатханнарыңны пілбинчезер. Мин ісчеткен чірчедең іс поларзар ба? Мин кіреске тӱскенни кіреске тӱс поларзар ба? –

³⁹ Пол поларбыс, – нандырғаннар олар. Иисус, тізең, оларға теен: – Мин іскен ідістең ізерзер, Минӧк чіли кіреске тӱзерзер.

⁴⁰ Миннең оң ма, сол ба саринда одырары, тізең, Миннең полбас, кемге тимнелген, олар одырарлар.

⁴¹ Аны истіп, он ӱгренҷізі Иаковнаң Иоаннға тарых парған.

⁴² Иисус, тізең, оларны хығырып алып, чоохтанған: – Сірер пілчезер, чоннаң устапчатханнар чонға хан-пиг полчалар паза чонның пастыхтары ағаа чарғы-чахаан салчалар.

⁴³ Сірернің араңарда андағ ниме полбазын: кем улии поларға харасча, анзы нымысчы ползын сірерге.

⁴⁴ Кем араңарда пастағызы поларға сағынча, анзы хул ползын.

⁴⁵ Кізі Оолғы даа кізілерні Позының алны-кистіне чӧргізерге нимес, че пасхаларына нымысха чӧріп, кӧп кізі ӱчӱн, толығ полып, Позының тынын пирібізерге килген.

Харах чох Вартимейнің кӧр сыхханы

⁴⁶ Анаң олар Иерихонзар читкеннер. Хаҷан Иисус Позының ӱгренҷілерінең паза хооп чӧрген илееде чоннаң хада Иерихоннаң сыхчатханнарында, чол хазында харах чох Вартимей, Тимейнің оолғы, кіленіп одырчатхан полған.

⁴⁷ Назареттегі Иисустың иртчеткенін ис салып, ол хысхырыбысхан: – Давид тӧлі Иисус, айадах мағаа.

⁴⁸ Аны тығырғаннар, че ол улам хысхыр сыххан: – Давид тӧлі, айадах мағаа.

⁴⁹ Иисус, тохтап, чоохтанған: – Хығыр киліңер аны. Харах чох кізіні хығырып, тееннер ағаа: – Че, ӧрін. Турып, пас пеер. Ол сині хығырча.

⁵⁰ Ол, турып, тастындағы кибін суурып, Иисуссар пас килген.

⁵¹ Иисус аның чоохтанғанына нандырып: – Миннең ниме киректір сағаа? – тіп сурған. – Ӱгретчім, кӧрерге, – нандырған анзы.

⁵² Иисус ағаа чоохтанған: – Пар, киртінізің сині арачылады. Олох туста ол кізі кӧріп пастаан паза Иисустың соонҷа пар сыххан.