Лука 9 - Наа Молҷағ

Он ікі ӱгренҷіні ӱгредерге ысханы

¹ Иисус, он ікі ӱгренҷізін чыып алып, оларға прай чабал хуттарға ӱлгӱ-чарғы поларға паза кізілерні ағырығлардаң имнирге кӱс паза ӱлгӱ пирген.

² Анаң, оларны Худай хан-ӱлгӱзінеңер ӱгредерге паза ағырығ кізілерні имнирге ызып,

³ теен: – Чолға пір дее ниме албаңар: тайах таа, хапчых таа, халас таа, ахча даа, артых кип-азах таа.

⁴ Пірее тураа кирзелер, анда хатап чорыхха сыхханҷа халыңар.

⁵ Че пірее чирге сірерні кирбезелер, ол саардаң парчадып, азахтарыңдағы тозынны андох хахтабыс турыңар, анзы андағларға сизіндіріг ползын.

⁶ Ӱгренҷілері аалларҷа чӧр сыхханнар. Олар, Чахсы Хабардаңар чоохтап, полған на чирде кізілерні имнееннер.

Ирод ікінҷілесте

⁷ Галилей чирінің ханы Ирод, Иисустың итчеткен хайхастарынаңар истіп, таңнаан: хай піреезі Иисусты тіріл килген Иоанн полар тіп чоохтасхан;

⁸ пасхалары ухаанҷы Илия килген полар тееннер; паза пасхалары – мының алнындағыох ухаанҷыларның піреезі тіріл килген полар тееннер.

⁹ Ирод, тізең, теен: – Иоанның мойнын мин ӱзе сабысхам. Мынзы чи Кем полҷаң, Кемнеңер пу нимелерні исчем? Иисусты кӧріп алҷаң оңдай тілеп сыххан.

Пис муң кізіні тосхырғаны

¹⁰ Илҷілер, айлан киліп, иткен нимелерінеңер Иисусха прай чоохтап пиргеннер. Иисус, оларны Позынаң хада алып, Вифсаида саарның хыриндағы ээн чирзер парыбысхан.

¹¹ Че кізілер, аннаңар піл салып, Иисустың соонҷа парғаннар. Иисус, тізең, оларны удурлап, Худай хан-ӱлгӱзінеңер чоохтап, кирексееннерін ағырығлардаң имнеп салып одырған.

¹² Иир полыбысханда, он ікі ӱгренҷі, Иисуссар пас киліп, чоохтанған: – Піс ээн чирдебіс, аннаңар кізілерні позыдыбыс. Олар, чағынғы аалларзар парып, чіҷең ниме таап, мында хонып алзыннар. –

¹³ Сірер постарың оларға чіҷең ниме пиріңер, – теен оларға Иисус. – Пістің пис халастаң паза ікі палыхтаң пасха ниме чоғыл. Алай пу кізілернің прайзына чіҷең ниме ал килибіс пе? – нандырғаннар олар.

¹⁴ Анда пис муңа чағын ир кізі полған. – Парыңар, кізілерні илігердең изерістіре одырт салыңар, – теен ӱгренҷілеріне Иисус.

¹⁵ Ідӧк идіп, прайзын одырт салғаннарында,

¹⁶ Иисус, пис халаснаң ікі палыхты алып, тигірзер кӧріп ала, алғабысхан. Анаң халаснаң палыхты, сындырып, кізілерге ӱлеп пиріңер тіп, ӱгренҷілеріне пирібіскен.

¹⁷ Прайзы тосханҷа азыранып алғанда, артхан чиис он ікі торасха тол парған.

Пётр Иисусты Мессий-Христос тіп адапча

¹⁸ Пірсінде Иисус пір чирде чалғызан пазырчатхан, ӱгренҷілері, тізең, Аның хыринда полғаннар. – Кізілер Мині кемге санапчалар? – сурған олардаң Иисус. –

¹⁹ Хайзылары Кіреске тӱзірҷең Иоанн, піреелері Илия, паза пасхалары мының алнындағы ухаанҷыларның піреезі тіріл килген полар тіп санапчалар, – нандырғаннар ӱгренҷілері. –

²⁰ Сірер чи Мині кемге санапчазар? – сурған ӱгренҷілерінең Иисус. – Худайның Мессий-Христозы полчазың, – нандырған Пётр.

²¹ Андада Иисус аннаңар пірдеезіне чоохтабасха хатығ чахығ пирген. –

Иисус Позының, ӧліп, тірілерінеңер чоохтапча

²² Кізі Оолғына кӧп ирееленерге килізер: ах сағаллар, улуғ абыстар паза Моисей Чахии пілігҷілері Аны, постарынаң хыйа идіп, ӧдір саларлар, че ӱзінҷі кӱнінде Ол тіріл килер, – теен Ол.

²³ Анаң Иисус прайзына теен: – Кем Минің соомҷа парарға итче, ол позынаңар ундут салзын, кірезін алып, Минің соомҷа парзын.

²⁴ Кем позының тынын ал халарға итче, ол аны чідір салар. Кем тынын Минің ӱчӱн салар, ол аны ал халар.

²⁵ Прай чир-чалбахты холға алып, че позын чох иттірт алай хыйаллатырт салза, кізее пірее туза пар ба ни зе?

²⁶ Кем Миннең паза Минің сӧстерімнең уйадар, Кізі Оолғы даа, Позының, Пабазының паза ах-арығ ангеллерінің сабланызында киліп, ол кізідең уйадар.

²⁷ Сынны чоохтапчам сірерге, мында турчатханнарның хай-піреезі, ӧлгелеккеӧк, Худай хан-ӱлгӱзін кӧріп алар.

Иисустың хубулғаны

²⁸ Пу сӧстер соонда сигісче кӱн ирт парғанда, Иисус, Пётрны, Иоанны паза Иаковты Позынаң хада алып, тағзар пазырарға сыххан.

²⁹ Ол пазырчатхан туста Аның сырайы алыс парған, кип-азаа, тізең, чылтырама ах пол парыбысхан.

³⁰ Ол арада ікі ир кізі Аннаң чоохтасхан. Олар Моисейнең Илия полғаннар.

³¹ Сабланыста киліп, олар Иерусалимде полар киректеңер – Иисустың пу чирдең парыбызарынаңар чоохтасханнар.

³² Пётр паза аннаң хада килгеннер тирең уйғуда полғаннар, че усхун парып, сабланызында чарып турған Иисусты паза Аннаң хости турчатхан ікі иренні кӧр салғаннар.

³³ Иреннер Иисустаң оортах париғаннарында, Пётр Иисусха теен: – Ӱгретчі! Хайдағ чахсыдыр піске мында. Ӱс отах турғыс пирибіс: пірсін – Сағаа, пірсін – Моисейге паза пірсін – Илияа. Ол позы даа пілбеен, ниме чоохтанчатханын.

³⁴ Ол іди чоохтанчатхан аразында, пулут сых киліп, оларны чабысхан. Пулут алтына кір париғаннарында, ӱгренҷілері тың хорых парғаннар.

³⁵ Пулут істінең табыс истіле тӱскен: – Пу Минің хынчатхан Оолғым. Истіңер Аны.

³⁶ Ол табыс тохтап парғанда, Иисус чалғызан халған. Ӱгренҷілері сым полғаннар, кӧрген нимедеңер олар пірдеезіне ол кӱннерде чоохтабааннар.

Алҷааххан оолахты имнеені

³⁷ Пазағы кӱнде, хаҷан олар тағдаң ин килигеннерінде, Иисусты кӧп чон удурлаан.

³⁸ Кинетін чон аразынаң хайдағ-да кізі хысхырыбысхан: – Ӱгретчі! Алданчам Сағаа, оолғымны кӧр пирдек, ол минің чалғыс оолғым.

³⁹ Аны чабал хут кинетін хаап аладыр, оолғым хысхыра тӱсче, анаң ахсынаң кӧбік сыхханҷа иреелеп, чадап ла позытча.

⁴⁰ Мин ӱгренҷілеріңнең ол чабал хутты сығара сӱр пирерге сурынғам, че олар сыдабааннар. –

⁴¹ Йо-о, пу киртізі чох паза ардап парған тӧл! Нинҷезін Мин сірернең хада поларбын? Хаҷанға теере сірернең сыдазим? Ағыл пеер оолғыңны, – нандырған Иисус.

⁴² Оолах чағыннап одырғандох, айна аны, чирге аңдара сазып, сапхлап сыххан, че Иисус ағаа хатығ чоохтанып, оолахты имнебіскен, анаң пабазына пирібіскен.

⁴³ Прай кізілер Худай кӱзіне таңнаан. Чон Иисустың итчеткен нимелеріне хайхап турған аразында, Иисус ӱгренҷілеріне теен: –

Иисус Позының ӧлімінеңер хатап чоохтапча

⁴⁴ Пу сӧстер миистеріңе чахсы иде сиип парзын: Кізі Оолғы кізілер холына кірер.

⁴⁵ Че ӱгренҷілері Аны оңар полбааннар, Аның чазыт сағызы пілдістіг нимес полған. Иисустаң сурарға, тізең, тідінмееннер.

Кем улии тіп таласханы

⁴⁶ Ӱгренҷілеріне мындағ сағыс кір килген: кем иң улии полча?

⁴⁷ Иисус, тізең, оларның сағыстарын піліп, паланы алып, Позының алнында турғыс салып,

⁴⁸ оларға піди теен: – Мині аарлап, пу паланы позына чағын кирген кізі Мині дее позына чағын итче. Мині позына чағын иткен кізі Мині ысхан Худайны даа позына чағын итче. Кем сірернің араңарда иң кічіг, ол улии пол парар.

Кем сірердең тоғыр нимес, ол сірернең хада

⁴⁹ Андада Иоанн чоохтанған: – Ӱгретчі! Піс Синің адыңнаң айналарны сығара сӱрчеткен кізіні кӧргебіс. Ол пістің арабыстаң ниместеңер, піс ағаа чаратпаабыс. –

⁵⁰ Тохтатпаңар аны. Кем сірердең тоғыр нимес, ол сірернең хада, – теен ағаа Иисус.

Самар кізілер Иисусты постарына чағын кирбинчелер

⁵¹ Иисусты чирдең апарыбысчаң тус чағдап одырғанда, Ол Иерусалимзер парарға идібіскен.

⁵² Ол Позының алнынҷа илҷілерін ысхан. Олар, тізең, парып, Самар чиріндегі пір аалға, Иисустың килеріне прай ниме тимнеп саларға тіп, кіргеннер.

⁵³ Че ол аалда Иисусты, Иерусалимзер парчатхан кізі тіп, постарына чағын кирбееннер.

⁵⁴ Аны кӧріп, Иисустың ӱгренҷілері Иаковнаң Иоанн чоохтанғаннар: – Хан-пигібіс! Илия иткен чіли, тигірдең тӱскен от, пу кізілернің пазына тӱзіп, оларны чох идібіссін тіп чоохтабызибыс па?

⁵⁵ Че Иисус, оларзар айланып, андағ ниме идерге чаратпин, теен: – Хайдағ хуттығ полчатханнарыңны пілбинчезер.

⁵⁶ Кізі Оолғы кізі тынын чох идерге нимес, арачылирға килген. Анаң олар пасха аалзар пар сыхханнар.

Иисустың соонҷа парары

⁵⁷ Олар чолҷа парчатханда, кем-де Иисусха теен: – Хан-пигім! Син хайдар даа парзаң, мин сооңҷа андарох парарбын. –

⁵⁸ Тӱлгӱлернің іннері пар, тигірдегі хустарның – уйалары, че Кізі Оолғының, пазын хыйын салып, тынанып алҷаң орны чоғыл, – теен ағаа Иисус.

⁵⁹ Паза пірсіне Ол теен: – Соомҷа пар. – Хан-пигім! Пастап мағаа, парып, пабамны чыып саларға чарат, – нандырған анзы. –

⁶⁰ Ӧліглер ӧліглерін постары чығзыннар. Син, парып, Худай хан-ӱлгӱзінеңер хабарлап чӧр, – теен ағаа Иисус.

⁶¹ Паза пірсі теен: – Мин Синің сооңҷа парарбын, Хан-пиг! Че пастап мағаа ибдегілерімнең анымҷохтазып аларға чарат. –

⁶² Кем, холын салдаа сал салып, соонзар хайбағынча, анзы Худай хан-ӱлгӱзіне киліскек кізі нимес, – теен ағаа Иисус.