Лука 8 - Наа Молҷағ

Иисуснаң хада парчатхан ипчілер

¹ Аның соонаң Иисус, саарларҷа паза аалларҷа Худай хан-ӱлгӱзінеңер Чахсы Хабарны искір чӧріп, ӱгреткен. Анынаң хада он ікі ӱгренҷізі полған.

² Оларнаң хада Иисус чабал хуттардаң паза ағырығлардаң имнебіскен ипчілер полғаннар. Оларның аразында істінең читі чабал хут сығардырған Магдалина тіп солалығ Мария полған.

³ Иродтың туразынаң устапчатхан Хузаның ипчізі Иоанна даа, Сусанна даа, аннаң даа пасха кӧп ипчілер полғаннар. Олар Иисусха прай пар нимелерінең полыс турғаннар.

Таарығҷыдаңар кип-чоох

⁴ Аймах саарлардаң кізі кӧп чыылыс парғанда, Иисус оларға кип-чоохтар чоохтап сыххан: –

⁵ Таарығҷы кізі ӱрен таарирға сыххан. Таарыпчатханда, ӱреннернің хай піреезі чол хазына тӱсклеп парған. Иртчеткен кізілер оларны типсеп салғаннар паза тигірдегі хустар хахлабысханнар.

⁶ Пасха ӱреннері тастығ чирге тӱскеннер. Олар, ӱт ле киліп, сых читпин, хуруп парғаннар.

⁷ Піреелері тігенек аразына тоолааннар. Тігеннер, ӧзіп, оларны чабыра пазыбысханнар.

⁸ Паза пасхазы чахсы чирге тӱскен. Олар, ӧзіп, полғаны ла чӱс хати кӧп ниміс пиргеннер. Пу кип-чоохты чоохтап, Иисус піди тоосхан: – Хулаа пар кізі, иссін! –

⁹ Нимені таныхтапча пу кип-чоох? – сурғаннар Иисустаң ӱгренҷілері.

¹⁰ Иисус піди нандырған: – Сірерге Худай хан-чирінің чазыттарын пілерге пирілген, пасхаларына, тізең, кип-чоохтар ла пирілген. Аннаңар олар, кӧрзе дее, кӧрбинчелер, иссе дее, піл полбинчалар.

¹¹ Мына нимедеңер чоохтапча пу кип-чоох. Ӱреннер – ол Худай сӧзі полча.

¹² Чол хазында тӱскен ӱреннер Худай сӧзін исчеткен кізілер полчалар. Сайтан, тізең, киліп, оларны киртінмезіннер паза арачылан полбазыннар тіп, ол сӧсті кізілернің чӱректерінең ал чӧрібісче.

¹³ Тастығ чирге тӱскен ӱреннер чи? – Анзы Худай сӧзін, истіп, чӱректеріне ӧрчіліг алчатхан кізілер, че чилегелері чохтаңар, ӱр нимес ле киртінчелер, анаң, сыныхтаға урунзаларох, киртіністерін тастабысчалар.

¹⁴ Тігенектер аразына тӱскен ӱреннер, тізең, – Худайның сӧзін исчеткен кізілер, че сағыссырастарға, пайға, чуртастың чырғалларына пастырып, пір дее туза ит полбин салчалар.

¹⁵ Чахсы чирге тӱскен ӱреннер, тізең, – Худайның сӧзін истіп, аны чағбан паза арығ чӱректерінде хайраллапчатхан кізілер. Сидіктерге сыдазып, улуғ туза ағылчалар. Іди чоохтап, Иисус піди тоосхан: – Исчең хулаа пар кізі, иссін! –

¹⁶ Пірдеезі чарытхыны, чарыдып алып, ідіснең чаппинча алай орған алтына турғыспинча. Че кірген кізілер чариин кӧрзіннер тіп, аны кӧріндіре чирде турғыс саладырлар.

¹⁷ Ілезіне сыхпаҷаң пір дее чазыт чоғыл, чазырғаны истіліп, тастына сыхпин пола чоғыл.

¹⁸ Аннаңар сиргек полыңар: кемде пар, ағаа хоза пирілер; кемде чоғыл, анзының пар ползын тіп сағынчатхан нимезі дее алылар.

¹⁹ Иисуссар іҷезінең харындастары килгеннер, че ибіре кізі кӧп полғаннаңар, Иисусха чағын кір полбааннар.

²⁰ Андада кем-де Иисусха искір пирген: – Іҷеңнең харындастарың тасхар турчалар, Синнең тоғазып аларға хынчалар. –

²¹ Іҷемнең харындастарым Худайның сӧзін, истіп, толдырчатхан кізілер, – нандырған ағаа Иисус.

Кӧлдегі хазыр чилні амыратханы

²² Пірсінде Иисус, ӱгренҷілерінең хада кимее одырып, теен: – Кӧлнің тігі саринзар кис парыбызааңар. Олар кис сыхханнар.

²³ Іди кис париғаннарында, Иисус узубысхан. Ол туста кӧлде улуғ чил пол сыххан. Салғахтар азыра саап, кимее суғ тол париған. Оларның киректері хорғыстығ полған.

²⁴ Олар, Иисуссар пас киліп, Аны усхурыбызып, тееннер: – Ӱгретчі! Ӱгретчі! Піс суға саайлан парарға чӧрбіс. Че Иисус, тур киліп, чилнең салғахтарға амырап парарға чахыбысхан. Олар тохтап парғаннар, ибіре ап-амыр пол парған.

²⁵ Андада Иисус оларға теен: – Хайдадыр сірернің киртіністерің? Ӱгренҷілері, таңнап, хорых парып, удур-тӧдір сурастырғаннар: – Кемдір Ол андағ, чилге дее, салғахтарға даа чахығлар пирчеткен? Анзылары, тізең, Аның чахиин исчелер?

Алҷааххан кізідең чабал хуттарны сығара сӱргені

²⁶ Олар Галилей чирінең тоғыр чатхан Гадарин чирінзер кис килгеннер.

²⁷ Иисус чарға сых килгенде, Ағаа саардаң килген пір кізі тоғас парған. Ол кізі, ӱрдең пеер чабал хуттарға хаптыртып, пір дее кип-азах кис чӧрбинчеткен паза, турада чуртабин, сыыраттардағы кізі чығҷаң хуюларда полҷаң.

²⁸ Ол кізі, Иисусты кӧр салып, хысхыра тӱскен, анаң, алнында тізекке тӱзіп, тыыда чоохтан сыххан: – Ниме кирек Сағаа миннең, Иисус, Ӧӧркі Худай Оолғы? Иреелебе мині, алданчам.

²⁹ Аның алнында Иисус чабал хутха ол кізідең сых парыбызарға чахаан полған нооза. Чабал хут кізіні ӱр иреелеен. Ол кізіні, хадарып, ілҷірбенең палғап салҷаңнар, че анзы, ілҷірбелерні ӱзе тартхлабызып, чабал хутха сӱрдіріп, хуу чазызар чӱгӱре халҷаң. –

³⁰ Адың кемдір? – сурған ол кізідең Иисус. – Тӱбен, – нандырған ол. Істіне кӧп чабал хут кіргеннеңер, ол іди адантыр.

³¹ Ол чабал хуттар, постарын тӱбі чох чирзер сӱрбезін тіп, Иисусха алданғаннар.

³² Мындох сосхаларның улуғ ӧӧрі тағда оттап чӧрген. Чабал хуттар постарын ол сосхаларзар кирібізерге чаратсын тіп, сурынғаннар. Иисус оларға чаратхан.

³³ Чабал хуттар, ол кізідең сых киліп, сосхаларға кір парғаннар. Сосхалар ӧӧрі, сах андох пӧзік чардаң кӧлзер сегірібізіп, суға пат парған.

³⁴ Аны кӧр салып, сосха хадарған кізілер, саарзар паза аалларзар ойлап, прай полған нимедеңер чоохтап пиргеннер.

³⁵ Ниме пол парғанын кӧрерге идіп, Иисуссар кізілер чыыл сыхханнар. Олар чабал хуттар сых чӧрібіскен кізінің Иисустың азаа хыринда одырчатханын кӧр салғаннар: ол тонаных, иптіг сағыстығ одырған. Анзын кӧріп, олар прайзы тың хорых парғаннар.

³⁶ Мыны кӧрген кізілер алҷаахчатхан кізінің хайди имненіп алғанын пасхаларына чоохтап пиргеннер.

³⁷ Аны истіп, Гадарин чиріндегі кізілер, прайзы тың хорых парып, Иисустаң постарының чирінең парыбызарға сурынғаннар. Иисус, кимее одырып, нандыра айланған.

³⁸ Чабал хуттарын сығара сӱрдірген кізі Иисуснаң хада поларға сурынған, че Иисус чаратпаан: –

³⁹ Ибіңзер парып, кізілерге чоохта, хайдағ улуғ ниме ит пирген сағаа Худай. Ол кізі, нанып, Иисустың позына ниме иткенін прай саарҷа чоохтап чӧрген.

Иаирнің хызының тірілгені

⁴⁰ Кізілер Иисустың килерін сағааннарынаңар, Иисус нандыра айлан килгенде, кӧп кізі Аны удурлаан.

⁴¹ Мына Иисуссар Иаир теен кізі килген. Ол синагоганың пастығы полған. Иаир Иисустың азағына тӱзіп, позының ибінзер кірерге сурынған.

⁴² Иаирнің он ікі частығ чалғыс хызыҷаа, тың ағырып, ӱрир пазы чат чатхан. Иисус Иаирнің туразынзар парчатханда, Аннаң ибіре кӧп кізі, ітклезіп ала, хада субалысхан.

⁴³ Оларның аразында он ікі чыл ханы ағып ағырчатхан ипчі полған. Ол нинҷе пар ниме-ноозын прай имҷілерге хорат салған полған, че пірдеезі аны имнеп полбаан.

⁴⁴ Ол ипчі, Иисуссар кистінең пас киліп, Аның кип-азаана холын теертібіскен. Сах андох хан ахханы тохтап парған. –

⁴⁵ Кем Мағаа теңді? – сурған Иисус. Теңен кізі табылбаанда, Пётр паза Аннаң хада полған кізілер теенер: – Ӱгретчі, Синнең ибіре кізілер, ітклезіп, парчалар. Син, тізең, кем Мағаа теңді тіп сурчазың. –

⁴⁶ Кем-де Мағаа теңді, кӱзімнің сыхчатханын сизін салдым, – теен Иисус.

⁴⁷ Ол ипчі, сизіндірт салғанын кӧріп, халтырап ала, Иисуссар пас килген. Аның алнында тізекке тӱзіп, Иисусха ноға теңенін паза сах андох чазыл парғанын прайзының кӧзіне чоохтап пирген. –

⁴⁸ Хорыхпа Хызым! Киртінізің сині арачылады. Амыр-хазыхнаң пар, – теен ағаа Иисус.

⁴⁹ Ол іди чоохтанған арада, синагога пастығының туразынаң кізі килген. – Хызың ӱреп парды. Ӱгретчіні тикке сағыссыратпа, – теен ол Иаирге.

⁵⁰ Че Иисус, аны истіп салып, Иаирге чоохтанған: – Хорыхпа, киртін не одыр, андада хызың хазыхтанып алар.

⁵¹ Иаирнің туразынзар читкенде, Иисус Пётрдаң, Иоаннаң, Иаковтаң паза хызыҷахтың паба-іҷезінең пасха пір дее кізее туразар кірерге чаратпаан.

⁵² Прайзы ол хызыҷахха ылғап-сыхтасхан. Че Иисус чоохтанған: – Ылғабаңар, ол ӱребеен, че узупча.

⁵³ Че кізілер, хызыҷахтың ӱреенін пілгеннеңер, Иисусха кӱлгеннер.

⁵⁴ Иисус, прайзын турадаң сығарыбызып, хызыҷахты холынаң тудып алып, чоохтанған: – Тур, хызыҷах!

⁵⁵ Хызыҷахтың худы айлан килген, сах андох ол тур килген. Иисус аны азырабызарға чахаан.

⁵⁶ Хызыҷахтың паба-іҷезі уғаа тың таңнап парғаннар, че Иисус оларға мында полған нимедеңер пірдеезіне чоохтабасха чахаан.