Лука 7 - Наа Молҷағ

Чӱс чааҷы пазының нымысчызының чазыл парғаны

¹ Прай пу нимелерні Позын исчеткен кізілерге чоохтирын тоос салып, Иисус Капернаумзар парған.

² Ол саарда Рим сирігінің чӱс чааҷының пазы полған. Аның аарлапчатхан нымысчызы, уғаа тың ағырыбызып, ӧлер пазы чатчатхан.

³ Ол чӱс чааҷының пазы Иисустаңар ис салып, нымысчызын имнирге килзін тіп, Андар Иудей ах сағалларын сурынарға ысхан.

⁴ Ах сағаллар, Иисуссар киліп, Аннаң тың сурынғаннар: – Чӱс чааҷының пазы Синің полызығ пиреріңе турыстығ кізі.

⁵ Ол пістің чонға хынча паза піске синагога пӱдір пирген.

⁶ Иисус оларнаң хада парған. Чӱспазының ибіне чидіп одырғанда, ол кізі Иисусха удур арғыстарын піди чоохтирға ысхан: – Хан-пигім, сағыссыраба! Турама кіреріңе мин турыстығ нимеспін,

⁷ аннаңар позымны даа Синзер килерге турыстығ нимеспін тіп санадым. Син чахығ ла пирібіс, нымысчым хазыхтан парар.

⁸ Минің дее позымнаң пӧзік пастыхтарым пар, позымның даа холында чааҷылар пар. Чааҷыларымның піреезіне «пар» тізем, анзы парадыр, пасхазына «кил» тізем, ол киледір; нымысчыма «мыны ит» тізем, ол идедір.

⁹ Аны истіп, Иисус хайхап парып, соонҷа килчеткен чонға чоохтанған: – Тіпчем сірерге, мындағ киртіністі Мин Израильде дее кӧрбеем.

¹⁰ Иисуссар ысхан кізілері, пастыхтың ибінзер айлан киліп, ағырығ нымысчының хазыхтан парғанын кӧр салғаннар.

Ӧкіс ипчінің оолғының тірілгенінеңер

¹¹ Мының соонаң Иисус Наин тіп саарзар парған. Аның соонҷа илееде кӧп ӱгренҷі паза чон парған.

¹² Саарның хаалхазына чит килгеннерінде, оларға удур пір ӧкіс ипчінің чалғыс оолғының сӧӧгін сығарчатханнар. Кӧп чон ол сӧӧктің соонҷа саардаң парчатхан.

¹³ Хан-пиг ол ипчіні кӧр салып, айап парып, теен: «Ылғаба»,

¹⁴ анаң пас киліп, хомдаа холынаң теңен. Сӧӧкті апарчатхан кізілер турыбысханнар, Ол, тізең, теен: – Оол! Тіпчем сағаа – тур!

¹⁵ Ӧліг оол, тур киліп, одырыбызып, чоохтан сыххан, Иисус, тізең, аны іҷезіне айландыр пирген.

¹⁶ Прайзы, хорых парып, Худайны саблап, чоохтанған: «Пістің арабыста Илбек Ухаанҷы», «Худай Позының чонынзар килтір».

¹⁷ Иисустаңар пу тылаас прай Иудей чирінҷе паза прай ибіркі чирлерҷе тараан.

Кіреске тӱзірҷең Иоанның ӱгренҷілері

¹⁸ Иоанның ӱгренҷілері Иисустаңар тылаасты Иоаннға чоохтап пиргеннерінде,

¹⁹ ол, ӱгренҷілерінің ікізін позынзар хығырып алып, оларны Иисуссар піди сурарға ысхан: – Пістің сағыпчатхан кізібіс Синзің ме алай піске пасхазын сағирға кирек пе? –

²⁰ Кіреске тӱзірҷең Иоанн пісті Синзер ызып, піди сурарға чахаан: «Пістің сағыпчатхан кізібіс Синзің ме алай піске пасхазын сағирға кирек пе?» – тееннер олар, Иисуссар киліп.

²¹ Ол тусха Иисус, кӧп кізіні ағырығлардаң, сағ чохтаныстаң паза чабал хуттарынаң позыдып, харах чох кӧп кізее харах одын айландырған.

²² Иисус, тізең, оларға нандырып, теен: – Парыңар, Иоаннға кӧрген паза искен нимелердеңер чоохтап пиріңер: харах чохтар кӧр сыхчалар, ахсахтар пас сыхчалар, чызығ палығлығлар арығланып алчалар, туныхтар ис сыхчалар, ӧліглер тіріл килчелер, чох кізілерге Чахсы Хабарны искірчелер.

²³ Миннең хыйа полбинчатханы, часкалығ!

²⁴ Иоанның ӱгренҷілері парыбысхан соонда, Иисус Иоаннаңар кізілерге чоохтап сыххан: – Ниме кӧрерге хуу чазызар чӧргезер? Чилге чайхал турған хамысты ба?

²⁵ Ниме кӧрерге чӧргезер? Пай кип-азахтығ кізіні бе? Че іди тонан чӧрчеткеннер паза пай чуртапчатханнар хан ӧргелерінделер.

²⁶ Ниме кӧрерге чӧргезер? Ухаанҷыны ба? Йа, ол ухаанҷы, тіпчем сірерге, ухаанҷыдаң даа улуғ.

²⁷ Анзы ол, кемнеңер піди пазылған: «Мына Синің алныңҷа Синің чолыңны тимнир илҷімні ысчам».

²⁸ Тіпчем сірерге, пу чир ӱстӱнде тӧреен кізілердең Кіреске тӱзірҷең Иоаннаң улуғ ухаанҷы чоғыл. Че Худай хан-чирінің иң кічии дее аннаң улуғ.

²⁹ Иисусты искен кізілернің прайзы, албан чығҷаңнар даа, Иоаннаң пастыра кіреске тӱзіп, Худайны саблаан.

³⁰ Че фарисейлернең Моисей Чахии пілігҷілері, Худай кӧңнін постарынаң хыйа идіп, Иоаннаң пастыра кіреске тӱзерінең тоғыр полғаннар.

³¹ Андада Иисус чоохтанған: – Пу тӧлнің кізілерін кемнең тиңнестірим? Кемге олар тӧӧйлер?

³² Олар, тасхар одырып, удур-тӧдір хысхырысчатхан палаларға тӧӧйлер: «Піс сірерге хобырахнаң ойнаабыс, че сірер плесет салбаазар. Піс сірерге хомзыныстығ сарыннар сарнаабыс, че сірер ылғаспаазар».

³³ Кіреске тӱзірҷең Иоанн, киліп, ораза тутхан паза пір дее араға іспеен. Сірер, тізең, «Кізіні айнаа хаптырған», – тіпчезер.

³⁴ Кізі Оолғы, киліп, чиис тее чіпче, араға даа ісче. Сірер тіпчезер: «Кӧріңер, пу чиирге дее, араға даа ізерге хынчатхан кізіні, ол албан чығҷаңнарнаң паза чазыхтығларнаң нанҷыласча».

³⁵ Худайның хыйға сағызы, тізең, прай палаларынаң киречілелче.

Чазыхтығ ипчінің пырозын тастааны

³⁶ Пір фарисей Иисусты позынаң хада азыранып аларға хығырған. Иисус, аның ибінзер киліп, стол кистінзер азыранарға одыр салған.

³⁷ Ол саарда, тізең, чазыхта чуртапчатхан ипчі полған. Иисусты фарисейнің туразында азыранчатханын истіп, андар тадылығ чыстығ миро хайахтығ алавастр ідіс ағыл килген.

³⁸ Ол ипчі, Иисуссар кистінзертін пас киліп, азағына тӱзіп, ылғап, Аның азахтарына харах частарын тӧгіп, састарынаң оларны хуруда чысхлаан. Анаң Аның азахтарын, охсанып, тадылығ чыстығ миро хайахнаң сӱртклеп сыххан.

³⁹ Анзын кӧріп, Иисусты хығырған фарисей позы алынҷа чоохтан салған: «Пу кізі, сыннаң ухаанҷы полған полза, азахтарына теепчеткен ипчінің кем полчатханын пілерҷік, ол чазыхтығ ипчі нооза».

⁴⁰ Иисус, андар айланып, теен: – Симон! Мин сағаа пір ниме чоохтап пирерге сағынчам. – Чоохта, Ӱгретчі, – нандырған анзы.

⁴¹ Иисус теен: – Пір пайға ікі кізі алымнығ полтыр. Пірсінің пирҷең алымы пис чӱс динарий полтыр, ікінҷізінің, тізең, – иліг динарий.

⁴² Че олар ахча чох полғаннарынаңар, пай кізі алымнарын чох идібістір. Чоохта, ол ікӧлеңнің хайзы пай кізее артых хынар? –

⁴³ Сағынчам, хайзыни кӧп позыдылған, анзы артых хынар, – нандырған Симон. – Орта сағынчазың, – теен ағаа Иисус.

⁴⁴ Анаң ипчізер алдыра айланып, Симонға теен: – Син пу ипчіні кӧрчезің ме? Мин синің тураңзар килгем, че син азах чуғҷаң суғ пирбеезің. Пу ипчі, тізең, харах чазын азаама тӧгіп, састарынаң чысхлабысхан.

⁴⁵ Син Мині, удурлап, охсанмаазың, че пу ипчі килгеннең пеер Минің азахтарымны тохтабин охсанча.

⁴⁶ Син пазымны хайахнаң сӱртпеезің, пу ипчі, тізең, Минің азахтарымны аарлығ миро хайахнаң сӱртклеен.

⁴⁷ Аннаңар Мин сағаа тіпчем, улуғ хынысты кӧзіткені ӱчӱн, пу ипчінің кӧп чазыхтары позыдылды. Кемни асхынах позыдылча, анзы асхынах хынча.

⁴⁸ Ипчее, тізең, теен: – Чазыхтарың позыдылча. –

⁴⁹ Кем полҷаң пу, чазыхтарны даа позытчатхан? – тіп, постары алынҷа чоохтасхлааннар мында хада одырчатхан кізілер. –

⁵⁰ Киртінізің сині арачылады, амыр-хазыхнаң пар, – теен ол ипчее Иисус.