Лука 24 - Наа Молҷағ

Иисус Христостың тірілгені

¹ Неделяның пастағы кӱнінде иртен иртӧк ипчілер, азынада тимнеп салған тадылығ чыстығ хайахтарын тудына, Иисустың хомдызынзар читкеннер, оларнаң хада хай пірее кізілер полғаннарох.

² Кӧрзелер, хуюны чапхан улуғ тас хыйа іділ партыр.

³ Хую істінзер кіріп, Иисус Хан-пигнің сӧӧгін таппааннар.

⁴ Олар іди ниме пол парғанын піл полбин турчатханнарында, кинетін чылтырах кип-азахтығ ікі ирен алныларында тура тӱскен.

⁵ Ипчілер хорыхханнарына чирге тӱңдере тӱскеннерінде, тігілері чоохтанғаннар: – Сірер ноға тірігні ӧліглер аразында кӧрглепчезер?

⁶ Ол мында чоғыл: Ол тіріл килген; Галилей чиріндӧк сірерге чоохтаан нимені сағысха киріңер:

⁷ Кізі Оолғының, чазыхтығ кізілернің холына пиріліп, кіреске хазатыртып, ӱзінҷі кӱнінде тіріл килерге кирек полчатханын.

⁸ Андада олар, Иисустың сӧстерін сағысха киріп,

⁹ хуюдаң айлан киліп, он пір ӱгренҷее паза пасха даа кізілерге прай нимені чоохтап пиргеннер.

¹⁰ Ана олар: Мария Магдалина, Иоанна, Иаковтың іҷезі Мария паза оларнаң хада полған пасха даа ипчілер пу нимелердеңер илҷілерге чоохтап пиргеннер.

¹¹ Ипчілернің чооғына, олаңай тілбіресчелер тіп нимее салбин, киртінмееннер.

¹² Че Пётр, тура хонып, хуюзар чӱгӱр парған. Мӧкейіп, кӧрзе, хую істінде Иисусты ораан сӱбӱректер ле чатхлапчалар, анаң, позы алынҷа таңнап ала, нандыра айлан килген.

Еммаус аалзар парчатхан чолда

¹³ Олох кӱн ікі ӱгренҷізі, Иерусалимнең алтон стадийҷе тастыхти турчатхан Эммаус тіп аалзар парчадып,

¹⁴ пу полған тылаастардаңар чоохтазып одырғаннар.

¹⁵ Іди олар, чоохтазып, ӱзӱр париғаннарында, Иисус, Позы оларзар пас киліп, хада пар сыххан.

¹⁶ Че оларның харахтары таныбас иде пол парғаннар, аннаңар олар Аны таныбааннар. –

¹⁷ Нимедеңер чоохтас паризар паза нимее іди хомзын-ӧзелчезер? – теен оларға Иисус. –

¹⁸ Иерусалимзер килгеннернің аразында син не чалғыс позың пу кӱннерде анда ниме полғанын испеезің ме таң? – нандырған Ағаа ӱгренҷілерінің пірсі, Клеопа. –

¹⁹ Нимедеңер? – сурған Иисус. Олар Ағаа нандырғаннар: – Назареттең сыххан Иисустаңар. Ол Худайның даа, чонның даа алнында сӧзінең паза киректерінең кӱстіг Ухаанҷы полған.

²⁰ Пістің улуғ абыстар паза пастыхтар Иисусты ӧлімге чарғылирға пирібіскеннер, анаң Аны кіреске хазап салғаннар.

²¹ Піс, тізең, Ағаа, Израильні арачылаҷаң Кізі полар тіп, ізенгебіс. Ол ниме полғаннаң, пӱӱн ӱзінҷі кӱні пол парды.

²² Че пістің ипчілернің хай піреезі пісті хайхатты: олар, иртенӧк Аны чыған чирзер парып,

²³ Аның сӧӧгін таппиндырлар. Анаң, нандыра айланып, піссер ангеллер килгеннер, олар Ол тіріг тееннер тіп чоохтааннар.

²⁴ Анаң пістің кізілернің хай піреезі хуюзар парған, анда ипчілерӧк чоохтаанни полған, Аны кӧр таппааннар.

²⁵ Андада Иисус оларға теен: – О, сағыс читпестер, ухаанҷылар чоохтаан прай нимее киртін пілбес чӱректіглер!

²⁶ Мессий-Христосха, сабланызына кірер ӱчӱн, іди ирееленерге кирек полған ни?

²⁷ Анаң Ол, прай Худай Пічиинде, Моисей Чахиинаң пастади прай ухаанҷыларнинда Позынаңар ниме чоохталғанын пуларға изерістіре прай чарыт пирген.

²⁸ Олар парчатхан аалға чағдап килгеннерінде, Иисус аннаң андарох парарға идеечік полыбысхан.

²⁹ Че ӱгренҷілері, Аны тохтадып, тееннер: – Хал піснең хада; кӱн хонып, иир поларға чӧр. Иисус, аалзар кіріп, оларнаң хада халған.

³⁰ Оларнаң хада азыранарға одырып, Иисус халасты алып, алғабызып, сындырып, оларға пирген.

³¹ Андада ла оларның харахтары азыл чӧрібіскеннер. Олар, тізең, Иисусты танып салғаннар, че Ол сах андох оларның харахтарына кӧрінмес пол парған.

³² Олар, пос аразында чоохтазып ала, тееннер: – Ол, чолда піснең чоохтазып, Худай Пічиинеңер чарытчатханда, пістің чӱреебіс ачыбаан ма ни?

³³ Олар, сах андох тыхтанып, Иерусалимзер айланғаннар, анаң он пір ӱгренҷіні паза оларнаң хада чыылған кізілерні таап алғаннар.

³⁴ Анзылары «Сынап таа Хан-пигібіс тіріл килтір. Ол Симонға кӧрінтір» тіп чоохтанғаннар.

³⁵ Пулар даа чолда ниме полғанын, хайди, халас сындыр пиргенде, Аны танып салғаннарын чоохтап пиргеннер.

Иисустың ӱгренҷілерге кӧрінгені

³⁶ Пу нимелерні чоохтасчатхан арада, Иисус Позы, оларның аразында тура тӱзіп, теен: – Амыр хоных сірерге.

³⁷ Пулар, хорыхханнарына алаң ас парып, кізі худын кӧрчебіс тіп сағынғаннар.

³⁸ Че Иисус оларға теен: – Нимее хорых пардыңар? Ноға андағ сағыстар чӱректеріңе кірче?

³⁹ Кӧріңер Минің холларымны, азахтарымны: Мынзы Мин сын Позыммын: чахсы иде кӧріп, холларыңны теертіп кӧріңер. Хуттың сӧӧгі дее, иді дее чох поладыр нооза, Мини, тізең, кӧрчезер нимес пе зе, пар.

⁴⁰ Іди тіп, хол-азахтарын кӧзіткен.

⁴¹ Олар, ӧрінгеннеріне ам даа киртін полбин, чапсып турчатханнарында, Иисус оларға теен: – Сірернің мында пірее чіҷең ниме пар ба?

⁴² Олар ағаа хойғалаан палыхтаң пір кизек паза сота мӧӧтті сындыр пиргеннер.

⁴³ Иисус, чіҷең нимені алып, оларның кӧзіне чіп сыххан.

⁴⁴ Анаң оларға теен: – Сірернең хада полғанда, чоохтаан сӧстерім мынзын таныхтапча: Моисей Чахиинда, ухаанҷыларның пічіктерінде паза Ырларда Миннеңер пазылған прай нимелер тол парарға киректер.

⁴⁵ Анаң Худай Пічиинде пазылған нимелердеңер оңарылдыра чарыт пиріп,

⁴⁶ оларға чоохтанған: – Пазылғанға кӧре, Мессий-Христос, ирееленерге, анаң, ӧдірт салып, ӱзінҷі кӱнінде тіріл килерге кирек.

⁴⁷ Амды Аның адынаң, Иерусалимнең пастади, прай чоннарны, пыросынып, чазыхтардаң позирға ӱгредерге кирек.

⁴⁸ Сірер прай мынзына киречізер.

⁴⁹ Мин сірерге Позымның Пабам молҷаан нимені ысчам. Сірерге ӧӧртін кӱс пирілгенҷе Иерусалим саарда пол турыңар.

Иисус Христостың тигірзер ӧӧрлеені

⁵⁰ Анаң Иисус оларны, саардаң сығарып, Вифанийа теере апарған паза, холларын кӧдіріп, оларны алғабысхан.

⁵¹ Іди алғап, Ол, олардаң оортахтаң оортах ла полып, тигірзер ӧӧрлеп сыххан.

⁵² Ӱгренҷілері, Ағаа пазырған соонда, улуғ ӧрчіде Иерусалимзер айланғаннар.

⁵³ Анаң олар, Худайны сабландырып паза алғап, сыбыра храмда полғаннар. Аминь.