Лука 23 - Наа Молҷағ

Иисус Пилаттың алнында

¹ Анаң прайзы, тур киліп, Иисусты Пилатсар апарып,

² пыролап, чоохтанғаннар: – Пу кізінің, хағанға албан тӧлеттірбин, Позын Мессий-Христоспын, ханмын тіп аданып, чонны ардатчатханын кӧргебіс.

³ Андада Пилат Иисустаң сурған: – Синзің ме Иудей ханы? – Син тідің аны, – нандырған ағаа Иисус.

⁴ Пилат улуғ абыстарға паза чонға чоохтанған: – Мин Пу Кізіде пір дее пыро таппинчам.

⁵ Че олар, уламох хатығланып, чоохтанғаннар: – Ол прай Иудей чирінҷе, Галилей чирінең пасти пу чирге теере, чонны, ӱгрет чӧріп, путхапча.

⁶ Пилат, Галилей чирінеңер истіп салып, сурған: – Ол Галилей чирінең ме?

⁷ Пилат, Иисустың Ирод ханның чирінең полчатханын піл салып, Аны Иродсар ызыбысхан, анзы ол туста Иерусалимдӧк полған.

⁸ Ирод хан, Иисустаңар кӧп истіп, хаҷанох Аны кӧрері килген, аннаңар, кӧр салып, уғаа тың ӧрін парған паза пірее таңнастығ ниме кӧріп аларға ізенген.

⁹ Ирод кӧп сурығлар сурған, че Иисус ағаа пір дее нандырбаан.

¹⁰ Улуғ абыстарнаң Моисей Чахии пілігҷілері, мындох турып, ӧкпеленіп, Аны пыролааннар.

¹¹ Ирод позының чааҷыларынаң хада, Иисусты пір дее нимее салбин, Ағаа кӱліп, пай кип-азах кизіртіп, Пилатсар нандыра ызыбысхан.

¹² Ол кӱн Пилатнаң Ирод нанҷылар полыбысханнар. Мының алнында, тізең, олар ыырлығ полғаннар.

Кіреске хазирға чарғылааннары

¹³ Пилат, улуғ абыстарны, пастыхтарны паза чонны чыып алып,

¹⁴ оларға чоохтанған: – Сірер минзер Пу Кізіні, чонны ардатча тіп, ағыл килгезер. Мин, тізең, сірернің кӧзіңерге, сурастырғлап, тӱптестірдім, че сірернің пыролапчатхан нимелеріңнің пірдеезін Анда таппадым.

¹⁵ Мин Аны Иродсар ысхамох нооза, че Ирод хан даа Аның ӧлімге чарғыладар андағ-мындағ пырозын таппиндыр.

¹⁶ Аннаңар мин Аны, соғарға чахып, позыдыбызарбын.

¹⁷ Ағаа ӱлӱкӱнге орта харибдең піреезін позыдыбызарға кирек полтыр.

¹⁸ Че прай чон хысхыр сыххан: – Ӧлім Ағаа! Варавваны позыт піске!

¹⁹ Варавва, саарда хорылыстар идіп, кізі ӧдіріп, харибге кірген полған.

²⁰ Пилат Иисусты позыдыбызарға хатабох полып, тыыда чоохтанған.

²¹ Че кізілер «Хазирға! Хазирға Аны!» тіп хысхырысханнар.

²² Андада Пилат оларға ӱзінҷізін чоохтанған: – Ол хайдағ хомай ниме ит салған? Мин Аны ӧлімге чарғылаҷаң пір дее ниме таппадым, аннаңар Аны, хатығлап-сохтырып, позыдыбызарбын.

²³ Че олар, уламох тың хысхырызып, Иисусты кіреске хазирға хысханнар. Оларның аах-уух тӱскеннері улуғ абыстарнинаң асхан.

²⁴ Андада Пилат ол кізілернің сурынызы хоостыра идерге чарат салған.

²⁵ Пилат, кізілер сурғаннары ӱчӱн, сайбах-хорылыстар иткен паза кізі ӧдірген Варавваны харибдең позыдыбысхан. Иисусты, тізең, оларның холына пирібіскен.

Голгофазар чол

²⁶ Кізілер, Иисусты апарчадып, чолда хырадаң саарзар айланчатхан Киринейдегі Симонны тохтадып, ағаа кіресті, Иисустың соонҷа апарзын тіп, чӱктендірібіскеннер.

²⁷ Иисустың соонҷа кӧп кізі парчатхан; оларның аразында, Иисусха айап, ылғап, сыхтапчатхан ипчілер полғаннар.

²⁸ Иисус, ипчілерзер айланып, чоохтанған: – Иерусалимдегі ипчілер! Мағаа нимес, постарыңа паза палаларыңа ылғаңар.

²⁹ «Часкалығлар тӧлі чохтар, пала тӧрітпееннер паза азырабааннар» тіп чоохтанҷаң кӱннер чағыннапчалар.

³⁰ Андада кізілер тағларға «Ӱстӱбіске иңзеріліңер!», тӧңнерге, тізең, «Пӱрги чабызыңар пісті!» тирлер.

³¹ Кӧгерчеткен ағасты іди итчетселер, хуруғ ағаснаң чи ниме полар?

Иисусты кіреске хазааны

³² Кізілер Иисуснаң хада ікі сайбағҷыны ӧдірерге апарғаннар.

³³ Хуу пас тіп адалчатхан тас тигейліг тӧңзер чит килгенде, Иисусты кіреске хазап салғаннар, ікі сайбағҷыны даа, пірсін Иисустың оң саринда, паза пірсін сол саринда хазабох салғаннар.

³⁴ Иисус, тізең, чоохтанған: – Пабам! Пу кізілернің пыроларын таста, ниме итчеткеннерін пілбинчелер нооза. Анаң чааҷылар, ӱлӱске тас тастап, Иисустың кип-азаан ӱлескеннер.

³⁵ Чон мындох кӧр турған. Оларнаң хада Иисусха пастыхтар даа кӱл турғаннар: – Пасха кізілерні арачылаан, Худай таллаан Мессий-Христос полчатса, Позын арачылазын.

³⁶ Чааҷылар даа, Иисусха чағын киліп, хуйаң арағаны сыындырып, кӱліп,

³⁷ ідӧк чоохтан турғаннар: – Син сынап Иудей ханы полчатсаң, Позыңны арачыла.

³⁸ Иисустың пазы ӱстӱнде, кіреске грек, Рим паза еврей тіллерінең «Пу Иудей ханы» тіп пазылых чарды хазал парған полған.

³⁹ Хости хазаттыртхан сайбағҷыларның пірсі ідӧк, Иисусты чабаллап, чоохтанған: – Син, Мессий-Христос полчатсаң, Позыңны паза пісті арачылап хал!

⁴⁰ Че сайбағҷыларның паза пірсі, анзын тызып, чоохтанған: – Син Худайдаң хорыхпинчазың ма? Сині позыңны даа ідӧк хазап салғаннар нимес пе зе?

⁴¹ Пісті орта хазап салғаннар. Піс позыбыс иткен нимелерібіске турыстығ нандырығ тутчабыс. Ол, тізең, пір дее хомай ниме итпеен.

⁴² Анаң Иисусха теен: – Позыңның хан-чиріңе читсең, Хан-пигім, мині сағыста тут! –

⁴³ Сынны сағаа чоохтапчам, син пӱӱнӧк Миннең хада Худай садында поларзың, – нандырған ағаа Иисус.

Иисустың ӧлімі

⁴⁴ Кӱн ортызында, прай чир ӱстӱнде кинетін чыплама харасхы пол чӧрібізіп, ӱс часча іди турған.

⁴⁵ Кӱн чох пол парған. Храмдағы кӧзеңе ортызынҷа талал чӧрібіскен.

⁴⁶ Иисус тың табыснаң хысхыра тӱскен: – Пабам! Синің холыңа Позымның худын пирчем! Іди чоохтанып, Ол тынын позыдыбысхан.

⁴⁷ Чӱспазы, пу полчатхан нимені кӧріп, Худайны сабландырып, чоохтанған: – Пу Кізі сыннаң даа арығ чӱректіг полтыр!

⁴⁸ Пу нимее чыылысхан чонның прайзы, полған нимені кӧріп, иблерінзер кӧксілерін сабынып ала айланған.

⁴⁹ Иисусты пілгеннернің прайзы, Аның соонҷа Галилей чирінең пеер килген ипчілер, тастыхти турып, ниме полчатханын кӧрчеткеннер.

Иисусты чығаны

⁵⁰ Ӧӧркі чарғыда чағбан, арығ чӱректіг Иосиф тіп пір кізі

⁵¹ Иудей чиріндегі Аримафей саардаң полған, Худай хан-ӱлгӱзінің килерін сағыпчатхан кізі пу чӧптезігде паза киректерде араласпаан полған.

⁵² Ол, Пилатсар киліп, Иисустың сӧӧгін сурап алған,

⁵³ анаң Иисусты, кірестең тӱзіріп, улуғ иснең ораабызып, хайада хую чіли киртілген паза пірдеезін чығбаан хомдыда чыып салған.

⁵⁴ Ол кӱн пятница полған, суббота чидіп одырған.

⁵⁵ Иосифтің соонҷа Галилей чирінең пеер Иисуснаң хада килген ипчілер парғаннар. Иисусты хайда паза хайди чығанын кӧргеннер.

⁵⁶ Анаң, туразар айланып, тадылығ чыстығ хайахтар паза чухтар тимнееннер. Суббота кӱнде, чахығ хоостыра, пір дее ниме итпин, тынанғаннар.