Лука 22 - Наа Молҷағ

Иисустаң тоғыр чӧптезіг

¹ Па́сха тіп адалчатхан Ачытпаан халас пайрамы чағдапчатхан.

² Моисей Чахии пілігҷілерінең улуғ абыстар Иисусты чох идерге оңдай тілееннер, че чоннаң хорыхханнар.

³ Ол туста он ікі ӱгренҷі аразындағы пір ӱгренҷінің істінзер, Искариот тіп солалығ Иудазар, сайтан кір парған.

⁴ Іди Иуда улуғ абыстарзар паза храм хадағҷыларының пастыхтарынзар Иисусты садыбызардаңар чӧптезерге парған.

⁵ Олар, ӧрін парып, ағаа ахча пирерге чарат салғаннар.

⁶ Иуда даа, сӧс пиріп, кізілерге пілдіртпес иде Иисусты холларына туди пирер оңдайны хадарған.

Ӱлӱкӱн чиизін тимнеені

⁷ Ачытпаан халас пайрамы чит килгенде, Па́схаа салылған хурағанны соғарға кирек полған.

⁸ Иисус, Пётрнаң Иоанны ызып, теен: – Парып, піске Па́сханың чиизін тимнеп салыңар. –

⁹ Чиисті хайда тимнеп салибіс тіп сағынчазың? – сурғаннар олар Иисустаң.

¹⁰ Иисус оларға нандырған: – Саарзар кірер арада, сірерге суғлығ ыраға апарчатхан кізі тоғас парар. Аның соонҷа парып, ол кірген тураа кіріңер.

¹¹ Анаң тура ээзіне чоохтирзар: «Ӱгретчі, ӱгренҷілерінең хада Па́сха чиизін чіҷең орын хайдадыр тіп, сурча».

¹² Ол кізі сірерге ӧӧркі хадылдағы улуғ пӧлікте орын кӧзіт пирер. Анда тимнеп салыңар.

¹³ Олар парып, прай нимені Иисус чоохтаанни таап алып, Па́сха чиизін тимнеп салғаннар.

Иирдегі чиис

¹⁴ Тузы читкенде, Иисус он ікі илҷізінең хада азыранарға одырған.

¹⁵ Иисус оларға чоохтанған: – Пу Па́сха чиизін, ирееленгелекке, сірернең хада чіп аларым уғаа тың килген!

¹⁶ Тіпчем, нооза, сірерге, Худай хан-чирінде прай ол ниме тол парбаанда, Мағаа пу чиисті паза чиирге киліспес.

¹⁷ Анаң Ол, чірче алып, Худайны алғыстап, чоохтанған: – Мыны алып, ӱлезіп алыңар.

¹⁸ Тіпчем сірерге, Худай хан-чирі пеер килбеенде, пу виноград арағазын паза іспеспін.

¹⁹ Анаң Ол, халас алып, Худайны алғыстап ала, сындырып, ӱгренҷілеріне пирген: – Мына пу сірернің ӱчӱн пирілчеткен Минің ит-сӧӧгім. Мынзын, Мині сағысха киріп, ит турыңар.

²⁰ Азыранып алған соонда, чірченең дее ідӧк идіп, чоохтанған: – Пу чірче – сірернің ӱчӱн тӧгілчеткен ханымнаң таныхталған Наа Молҷағ.

²¹ Мына пу, тізең, стол кистінде Миннең хада одырып, Мині сатчатханының холы.

²² Итсе-де Кізі Оолғы пӧгіл парған оңдайҷа парча, че хыйал анзына, кем Аны сатча!

²³ Андада ӱгренҷілері, хайзылары андағ ниме идерге итче полҷаң ни тіп, удур-тӧдір сурастырғлааннар.

Кем улуғдыр

²⁴ Анаң араларында оларның хайзы улии полчатханынаңар талас парыбысхан.

²⁵ Иисус оларға теен: – Ханнар чоннарға ӱлгӱ полчалар, оларны холда тутчатханнар, тізең, постарын чонның арғыстары тіп адатчалар.

²⁶ Че сірернің араңарда іди полбазын: иң улииңар иң кічии осхас ползын, пастых, тізең, позын чалҷы чіли тудынзын.

²⁷ Хайзы улуғ: стол кистінде одырчатханы ба алай аның ибіре хайын чӧрчеткені бе? Стол кистінде одырчатханы нимес пе зе? Мин, тізең, сірернің араңарда нымысчы осхаспын.

²⁸ Прай аар сыныхтағларымда сірер Миннең хада полғазар.

²⁹ Хайди Пабам Мағаа Позының хан-ӱлгӱзін пирген, Мин дее ідӧк сірерге аны пирчем.

³⁰ Сірер, Минің хан-чирімде столым кистіне одырып, ізіп чиирзер. Ӱлгӱ сіреелерінде одырып, Израиль чонының он ікі сӧӧгін чарғылирзар.

Иисус Пётрның хыйа поларынаңар ухаанҷылапча

³¹ Анаң Хан-пиг чоохтанған: – Симон! Симон! Сайтанға сірерні, пуғдайны чіли, илгебізерге чарадылған.

³² Че Мин, киртінізіңнің кӱзі син парбазын тіп, синің ӱчӱн пазырғам. Син дее, соонаң Минзер хатап айланып, харындастарыңның киртінізін тыыдарға кирексің. –

³³ Хан-пигім! Мин Синнең хада харибге дее, ӧлімге дее парарға тимдебін, – теен Ағаа Пётр. –

³⁴ Тіпчем сағаа, Пётр, пу хараазын, питук тапсаанҷа, син Миннең ӱс хати, пілбинчем тіп, хыйа полыбызарзың, – нандырған ағаа Иисус.

Ікі хылыс

³⁵ Анаң ӱгренҷілеріне чоохтанған: – Хаҷан сірерні ахча хапчығы даа, сӱӱмек тее, ӧдік тее чох ысханымда, сірер пірее нимее хызылғазар ба? – Чох, пір дее нимее хызылбаабыс, – нандырғаннар олар.

³⁶ Андада Иисус оларға теен: – Че амды кемде ахча хапчығы ба, сӱӱмегі бе пар, алып ал аны, чох полза, тізең, кип-азааң садып, хылыс садызып ал.

³⁷ Тіпчем, нооза, сірерге «Сайбағҷыларнаң пір пол парды» тіп, Миннеңер пазылғаны тол парарға кирек. Миннеңер пазылған нимелернің прайзы тол парарға чӧр нооза. –

³⁸ Хан-пигібіс! Мына мында ікі хылыс, – тееннер ӱгренҷілері. – Чидер, – нандырған оларға Иисус.

Гефсиман садында пазырғаны

³⁹ Иисус, саардаң сығып, пазох Елеон тағзар чол тутхан. Ӱгренҷілері соонҷа парғаннар.

⁴⁰ Кирек орынға чит киліп, оларға чоохтанған: – Хыҷаланыстарға пастырбас ӱчӱн, пазырыңар.

⁴¹ Позы, тізең, хыйа тасталған тас синінҷе оортах парып, тізекке тӱзіп, пазыр сыххан: –

⁴² Пабам! Пу хыйаллығ чірчені Миннең хыйа апарыбызарға чаратхан ползаң! Итсе-де, Минің кӧңнімҷе нимес, Сининҷе ползын.

⁴³ Тигірдең ангел Андар тӱс киліп, Аның кӧңнін тыытхан.

⁴⁴ Тыны тар полып, Иисус уламох тың пазырған, тирі, тізең, хан тамҷыхтары чіли, чирзер тоолаан.

⁴⁵ Пазырып алып, тур килбинең, Иисус ӱгренҷілерінзер айланған. Кӧрзе, олар, аар сағыстарға пастырып, узубыстырлар.

⁴⁶ Андада Иисус оларға теен: – Ноға узупчазар? Турып, хыҷаланыстарға пастырбас ӱчӱн, пазырыңар.

Иисусты тудып алғаннар

⁴⁷ Ол іди чоохтанчатхан аразында, кізілер кӧріне тӱскеннер. Прайзының алнында Иуда тіп ады-солалығ он ікі ӱгренҷінің пірсі килиген. Иуда, «Кемні охсанам, Анзы полар» тіп, кізілерге танығ пирерінеңер чоохтаан полған. Амды, Иисусты охсаныбызарға полып, Андар пас килген.

⁴⁸ Иисус, тізең, ағаа теен: – Иуда! Син Кізі Оолғын охсаныснаң сатчазың ма?

⁴⁹ Иисуснаң хада полғаннар, ниме поларға итчеткенін кӧріп, Аннаң сурғаннар: – Хан-пигібіс! Хылыстарнаң сабибыс па?

⁵⁰ Оларның пірсі, тізең, хылыс сығара тартып, иң улуғ абыстың нымысчызының оң хулаан ӱзе сабысхан.

⁵¹ Андада Иисус тібіскен: – Тохтаңар, чидер. Ол, нымысчының хулаана холын теертіп, имнебіскен.

⁵² Анаң Иисус Позын тударға килген улуғ абыстарға, храм хадағҷыларының пастыхтарына паза ах сағалларға теен: – Сірер хылыстарнаң паза ӧзектернең Мині, сайбағҷыны ла чіли, тударға килдіңер бе!

⁵³ Мин сірернең хада кӱннің сай храмда полҷаңмын, че сірер Минзер холларың кӧдірбеҷеңзер. Амды – сірернің тузыңар паза харасхының ӱлгӱзі.

Пётр Иисустаң хыйа полча

⁵⁴ Иисусты, тудып алып, иң улуғ абыстың туразынзар ағыл килгеннер. Пётр оларның соонҷа оортахта парған.

⁵⁵ Анаң олар, сиден істінде от одынып, ибіре одырғлабысханнар. Пётр оларның аразындох одыр салған.

⁵⁶ Пір чалҷы ипчі, аның от хазында одырчатханын кӧр салып, андар хази кӧріп, чоохтанған: – Пу даа кізі Иисуснаң хада полған. –

⁵⁷ Мин Аны пілбинчем, – теен ол ипчее Пётр, Иисустаң хыйа полып.

⁵⁸ Тӱрче полбинаң, пазох пір кізі, Пётрны кӧр салып, теен: – Син дее оларның пірсізің. Че Пётр ол кізее нандырған: – Чох.

⁵⁹ Пір часча ирт парғанда, пазох пір кізі хатығ чоохтанған: – Ікінҷілес чоғыл, пу даа кізі Иисуснаң хада полған. Ол даа Галилей чирінең нооза.

⁶⁰ Че Пётр, ол кізее нандырып, теен: – Нимедеңер чоохтапчатханыңны пілбинчем. Ол іди чоохтан париғандох, питук тапси тӱскен.

⁶¹ Андада Хан-пиг Пётрзар, айланып, кӧрібіскен. Пётр, тізең, Аның «Питук тапсаанҷа, син Миннең ӱс хати хыйа полыбызарзың» теен сӧстерін сағысха кир килген.

⁶² Пётр, сых парыбызып, ачығ ылғап сыххан.

Иисус ӧӧркі чарғы алнында

⁶³ Иисусты хадарчатхан кізілер Аны, сӧклеп ала, сохханнар.

⁶⁴ Анаң Аны, сӱбӱрекнең пӱргебізіп, сырайынаң сапхан саанаң «Ухаанҷы ползаң, чоохта, кем Сині сапты?» тіп сурғаннар.

⁶⁵ Паза кӧп аймах-пасха сӧстернең Аны сӧклееннер.

⁶⁶ Таң чарып килгенде, ах сағаллар, улуғ абыстар паза Моисей Чахии пілігҷілері, чыыл киліп, Иисусты постарының ӧӧркі чарғызына ағыл килгеннер. –

⁶⁷ Чоохтадах піске, Мессий-Христос Синзің ме? – сурғаннар Аннаң. Иисус оларға нандырған: – Чоохтап пирзем, сірер Мағаа киртінмессер.

⁶⁸ Сурығлар сурзам, тізең, сірер суриима даа нандырбассар, Мині дее позытпассар.

⁶⁹ Мының соонаң Кізі Оолғы Илбек Худайның оң саринда одырар. –

⁷⁰ Андағда Син Худай Оолғызың ма? Иисус оларға нандырған: – Анзын, Минмін тіп, позыңар чоохтадыңар.

⁷¹ Олар, тізең, тееннер: – Хайдағ киречілес піске ам даа кирек? Позының чоохтаанын истібіс нооза.