Лука 21 - Наа Молҷағ

Ӧкіс ипчі салған ӱлӱс

¹ Иисус, ибіре кӧріп, пай кізілернің постарының сыйыхтарын сыйых салҷаң ідіссер салчатханнарын кӧр салған.

² Саңай чох чуртапчатхан ӧкіс ипчінің андар ікі оох ахча сал салғанын кӧрібӧк салған.

³ Иисус чоохтанған: – Сынны тіпчем сірерге, чох чуртапчатхан пу ӧкіс ипчі прайзынаң кӧп ахча сал салды.

⁴ Тігі кізілер постарының пайларының артханың Худайға сыйых салдылар, пу ӧкіс ипчі, тізең, позының чуртаҷаң пар-чох ахчазын андар салды.

Храмның иңзерілерінеңер паза тӱгенҷі тустаңар

⁵ Хай піреезі Храм сіліг тастарнаң чазалған паза аарлығ сыйыхтарнаң иділген тіп чоохтасхан. Иисус теен: –

⁶ Килер тус, хаҷан тастың ӱстӱнде тас халбас, сірер мында кӧрчеткен нимелернің прайзы иңзеріл парар. –

⁷ Ӱгретчі! Хаҷан полар ол ниме? Ол нименің поларына хайдағ танығ полар? – сурғаннар олар.

⁸ Иисус нандырған: – Китеніңер, алаахтыртпас ӱчӱн. Кӧп кізі, Минің адымнаң аданып киліп, «Мин Мессий-Христоспын!», «Ол тус чағыннап килді» тир, андағ кізілернің соонҷа парбаңар.

⁹ Чағынғы паза ыраххы чаалардаңар ис салып, хорыхпаңар. Пастап андағ нимелер пол парарға киректер, че анзы тӱгенҷізінің сах андох полары нимес.

¹⁰ Аннаң андар теен: – Чон чоннаң, Хан Ханнаң тоғыр кӧдірерлер.

¹¹ Анда-мында чир тітірир, ӧзӧгістең паза ағырығлардаң хырылыс полар, андағ-мындағ хорғыстығ нимелер паза улуғ танығлар тигірдең кӧрінерлер.

¹² Че прай пу нимедең пурун сірерні, Миннең ӱчӱн хаап, сӱрерлер, синагогаларда чарғылап, хариблерге чабарлар, Миннең ӱчӱн ханнарнаң пиглернің алнына сығарарлар.

¹³ Анзы сірерге Миннеңер чоохтирға пирілген оңдай полар.

¹⁴ Істіңерде чарғыда ниме чоохтирдаңар азынада сағынмасха пӧгін салыңар.

¹⁵ Мин сірерге ыырҷыңарның пірдеезі нандыр полбас, тоғырлан таа полбас сӧстер паза кӱлӱк сағыс пирербін.

¹⁶ Паба-іҷеңер дее, харындастарың даа, туғаннарыңнаң арғыстарың даа сірердең хыйа полыбызарлар. Сірернің піреелерін ӧдір тее саларлар.

¹⁷ Минің адым ӱчӱн сірерні прайзы хырт кӧрер.

¹⁸ Че сірернің пастарыңнаң пір сас таа тӱспес.

¹⁹ Сыдазыңар, андада тыныңарны арачылап халарзар.

Танығлар паза хорғыстар

²⁰ Чааҷыларның Иерусалимні ибір салғанын кӧр салзаңар, аның иңзерілер тузының чит килгенін піліңер.

²¹ Андада Иудей чиріндегілер тағларзар тиссіннер, саардағылар аның тастынзар сығара ойлазыннар, тастындағылары, тізең, саарзар кірбезіннер.

²² Анзы, Худай Пічиинде пазылған нимелернің прайзы тол парар ӱчӱн, хатығлатчаң кӱннер полар.

²³ Ол кӱннерде тойлығ паза час палалығ ипчілерге хыйал-чобағ тӱзер! Илбек саай полар пу чирде, паза Худайның чабалланғаны чидер ол чонға.

²⁴ Оларның хайзылары хылыстарнаң ӧдіртіп, пасхалары андағ-мындағ чоннарзар сӱрдірт парыбызарлар. Иерусалимні, тізең, Худайы чохтар, тустары тоозылғанҷа, типсирлер.

²⁵ Кӱнде, айда, чылтыстарда таңнастығ нимелер пол турарлар. Чир ӱстӱндегі нинҷе пар чоннарның прайзы ізеніс чох ах-тик чӧрер. Талай, тізең, суулап, чабалланар.

²⁶ Чир-чарыхха килчеткен саайларны сахтап, кізілер хорыхханнарына таларлар. Тигірнің кӱстері тітіри тӱзерлер.

²⁷ Олох арада Кізі Оолғының илбек кӱзінде паза сабланызында пулуттарҷа пас париғанын кӧр саларлар.

²⁸ Пу нимелер пол сыхсалар, чіке турып, пастарыңны чоғар кӧдіріңер, арачыланыстарың чағыннапча нооза.

Ол кӱн хаҷан полар?

²⁹ Анаң оларға пу кип-чоохты чоохтап пирген: – Кӧріңер пу смоковницаны, пасха даа ағастарны.

³⁰ Оларның пӱрленчеткенін кӧріп, чайғының чағдап килгенін постарың піліп алчазар.

³¹ Сірер дее ідӧк, Минің чоохтаанымның толчатханын кӧріп, Худай хан-ӱлгӱзінің чағдапчатханын піліңер.

³² Сынны чоохтапчам сірерге, прай пу ниме амғы тӧл ӱзілгелеккеӧк полар.

³³ Тигірнең чир чіт парарлар, Минің сӧзім, тізең, халар.

Узубаңар

³⁴ Ол кӱн сірер сағыбаанға орта килібіспезін тіп, сиргек тудыныңар, иртіре чырғап, чуртастың оох-теек нимелеріне пастырбаңар.

³⁵ Ол кӱн, сӧзірбе чіли, чир ӱстӱндегілернің прайзына чидер.

³⁶ Че, сыбыра сиргек полып, пазыр чӧріңер, андада, прай полар саайлардаң ос халып, Кізі Оолғының алнында турарзар.

³⁷ Иисус, кӱнӧрте храмда кізілерні ӱгредіп, хараазын, тізең, Елеон тағда иртірҷең.

³⁸ Иртенӧк прай чон Аны истерге храмзар чыылысчаң.