Лука 20 - Наа Молҷағ

Хайдағ ӱлгӱнең?

¹ Пірсінде Иисус, храмда кізілерні ӱгредіп, Чахсы Хабар искірчеткенде, улуғ абыстар паза Моисей Чахии пілігҷілерінең хада ах сағаллар чағын пас киліп,

² тееннер Ағаа: – Чоохтап пир піске, киректеріңні хайдағ ӱлгӱнең итчезің? Кем пирген Сағаа пу ӱлгӱні?

³ Иисус оларға нандырған: – Мин дее сірердең пір ниме сурып аларға сағынчам. Чоохтаңардах мағаа:

⁴ Иоанның кіреске тӱзіргені кізілердең ме алай Худайдаң ма?

⁵ Олар, пос аразында ӱзӱріп, чоохтасханнар: – «Худайдаң» тізебіс, «Андағда ноға сірер Иоаннға киртінмеезер?» сурар Ол.

⁶ «Кізілердең» тіп чоохтанзабыс, андада чон пісті таснаң чаалир. Олар Иоанның ухаанҷы полчатханын ікінҷілебинчелер, нооза.

⁷ Аннаңар олар нандырғаннар: «Пілбинчебіс, хайдағ ӱлгӱнең».

⁸ Андада Иисус оларға теен: – Мин дее сірерге чоохтабаспын пу нимелерні хайдағ ӱлгӱнең итчеткенімні.

Виноград ӧскірҷеңнердеңер кип-чоох

⁹ Анаң Иисус чонға пу кип-чоохты чоохтап сыххан: – Пір кізі, виноград одыртып салып, аны виноград ӧскірчеткен кізілерге пирібістір, позы ибдең ӱрге парыбыстыр.

¹⁰ Тузы чит килгенде, ол чалҷызын виноград ӧскірчеткеннерзер позының ӱлӱзін ағыл килерге ызыбысхан. Че виноград ӧскірчеткеннер ол чалҷыны, сох салып, пір дее ниме пирбин, нандыра ызыбыстырлар.

¹¹ Ол кізі пазох пір чалҷызын андар ысхан, че виноград ӧскірчеткеннер, пу даа чалҷызын ідӧк соғып-сӧклеп, пір дее ниме пирбин, ибзер нандыра ызыбысханнар.

¹² Анаң ӱзінҷі чалҷызын ысхан, че анзын даа, палығлап, сӱрібіскеннер.

¹³ Андада виноградниктің ээзі чоохтанған: «Хайди итчең? Хынчатхан оолғымны ызим, аны кӧрзе, китенерлер».

¹⁴ Че виноградникті ӧскірчеткен кізілер, аны кӧр салып, пос аразында чоохтасханнар: «Пу пабазының пайын холға кирҷең чалғыс оолғы. Парып, ӧдірібізееңер аны, андада халған анығ піске халар».

¹⁵ Анаң аны, виноградниктең оортах иде апарып, ӧдір салғаннар. Ам виноградниктің ээзі ол кізілерні хайди идер ни?

¹⁶ Киліп, виноградник ӧскірчеткеннерні ӧдір салып, виноградникті пасха кізілерге кӧрерге пирібізер. Пу чоохты искен кізілер тееннер: – Андағ ниме полбас!

¹⁷ Иисус, тізең, оларзар кӧріп, теен: – «Пӱдірігҷілернің хыйа тастаан тазы соонаң иң кирек, тура пулиин тутчаң тас пол парған», – тіп пазылғаны нимені таныхтапча?

¹⁸ Ол тасха тӱскен полған на кізі чоо тӱс парар, ол тас, тізең, пірее кізінің ӱстӱне тӱс парза, аны чоо чабыра пазыбызар.

Рим Хағаныға албан тӧлирге кирек пе?

¹⁹ Олох туста, Моисей Чахии пілігҷілері паза улуғ абыстар пу кип-чоохтың постарына чарыдылғанын сизініп, Иисусты хаап аларға иткеннер, че чоннаң хорыхханнар.

²⁰ Олар, Иисусты китеп, сурығларнаң хазалып, пірее чарабас сӧзі ӱчӱн пастыхтарның паза ханның ӱлгӱзіндегілернің холына пирібізерге полып, Андар киртінеечік полчатхан чойырхостарны ысханнар. –

²¹ Ӱгретчі! Синің, орта чоохтап, пірдеезіне чойырхабин, Худайның чолынҷа парарға сын ӱгретчеткеніңні пілчебіс.

²² Піске чи Рим хағаныға албан тӧлирге кирек пе, чох па? – сурғаннар олар Аннаң.

²³ Иисус, тізең, оларның кӧйтіктенчеткеннерін сизініп, теен: – Нимее мині сынап одырзар?

²⁴ Мағаа динарий ахчаны кӧзіт пиріңер. Кемнің омазы паза ады анда? – Хағанни, – нандырғаннар олар. –

²⁵ Андағда хағаннин – хағанға, Худайнин Худайға пир турыңар, – чоохтанған оларға Иисус.

²⁶ Іди олар чон алнында Иисусты сӧзінең тут полбин, Аның нандыриина чапсып, паза пір дее ниме тібееннер.

Тірілердеңер чоох

²⁷ Андада ӧлім соонда кізі тірілбинче тіпчеткен саддукейлердең нинҷе-де кізі, пас киліп, Иисустаң сурған: –

²⁸ Ӱгретчі! Моисей піди пасхан: «Хоных хонған пірее кізі, пала чох чуртап, ӱреп парза, аның туңмазы, ипчізін ал салып, ӱреен харындазының тӧлін узаратсын».

²⁹ Читі харындас полтыр. Улуғ харындастары, ипчі алып, пала чох ӱреп партыр.

³⁰ Ипчізін ікінҷі харындазы алып, ідӧк пала чох ӱреп партыр.

³¹ Ол ипчіні ӱзінҷі харындазы алып, ӱребӧк парған. Іди прай читі харындас, ол ипчінең чуртап, палалары чох ӱрептір.

³² Прайзының соонаң ол ипчі дее ӱреп парған.

³³ Амды олар прайзы тіріл килзелер, ол ипчі хайзыни полар? Читі харындастың прайзы ол ипчінең чуртаан нооза.

³⁴ Иисус оларға нандырған: – Пу чуртастағы кізілер, ипчі алып, ирге парчалар.

³⁵ Че тіріл киліп, килер чуртасха турыстығ иреннернең ипчілер алыспастар.

³⁶ Олар, ангеллер осхас пол парып, ӱребестер. Олар, Худай тірілдіргеннеңер, Аның палалары полчалар.

³⁷ Ӱреен кізілернің тіріл килерін Моисей дее кӧзіткен: успас отнаң кӧйчеткен ағазахтаңар чоохта Хан Худайны Авраамның даа, Исаактың даа, Иаковтың даа Худайы тіп адапча.

³⁸ Худай – тіріглернің Худайы, ӧліглерни нимес, Ағаа прайзы тіріглер нооза. –

³⁹ Ӱгретчі! Син маңат чоохтадың, – тееннер Моисей Чахии пілігҷілерінің хай піреезі.

⁴⁰ Паза Иисустаң пір дее ниме сурастырғлирға тідінмееннер. Иисус, тізең, оларға теен: –

Мессий-Христос кемнің тӧлі?

⁴¹ Ноға Мессий-Христосты Давидтің тӧлі тіпчелер?

^42-43 Давид, тізең, позы Ырлар киндеде чоохтапча: «Ӧӧркі Чайаачы Хан-пигіме теен: „Мин Синің прай ыырҷыларыңны азааң алтына тастаанҷа, мында Минің оң саримда одыр тур“».

⁴⁴ Іди Давид Аны «Хан-пигім» тіп адапча, хайди андағда Мессий-Христос Давидтің тӧлі полҷаң?

Моисей Чахии пілігҷілерінең китеніңер

⁴⁵ Иисус, Аны прай чон истіп турчатханда, ӱгренҷілеріне теен: –

⁴⁶ Китеніңер Моисей Чахии пілігҷілерінең: олар, узун киптеріне чазан салып, чон кӧп чирлерде чӧрерге паза постарын алғыстаснаң удурладарға хынчалар. Олар синагогаларда алнындағы орыннарда, той-пайларда даа тӧрде одырарға хынадырлар.

⁴⁷ Ӧкіс ипчілерні ӱреге кир саладырлар, анаң чон алнында ӱр пазыраачых поладырлар. Худай чарғызы оларға артых тӱзер.