Лука 2 - Наа Молҷағ

Иисус Христостың тӧреені

¹ Ол кӱннерде Рим хағаны Август позының чиріндегі прай кізілерні, санға алып, пічікке кир саларға чахығ сығарыбысхан.

² Пу пастағы санағ Квириний Сирийнің пигі полчатхан туста иртірілген.

³ Полған на кізі позының тӧреен саарынзар пічікке пазынарға парған.

⁴ Иосиф, Давид тӧлінең паза сӧӧгінең полғаннаңар, Галилей чиріндегі Назарет тіп саардаң сығып, позының чирінзер, Иудей чирінзер, Давидтің Вифлеем тіп саарынзар парған.

⁵ Иосиф ол саарзар алызарға молҷасхан Мариянаң хада пічікке пазын саларға парған. Мария ол туста азах аар чӧрчеткен.

⁶ Олар Вифлеемде полчатхан туста Марияның пала табар тузы чит килген.

⁷ Хонҷаң турада орын чох полғаннаңар, Мария Тун Оолғын, тӧрідіп, сӱбӱректерге ораап алып, малға от салҷаң кӧлбее сал салған.

Ангеллер паза мал хадарҷаңнар

⁸ Олох чир ибіре мал хадарҷаңнар чазыдағы малларын хараазын хадарчатханнар.

⁹ Кинетін оларның алнында Хан Худайның ангелі тура тӱскен, Хан Худайның сабланызы, тізең, оларға чайылған. Олар уғаа тың хорых парғаннар.

¹⁰ Че ангел оларға теен: – Хорыхпаңар. Мин сірерге прай чонны ӧріндірер уғаа чахсы хабарны искірчем:

¹¹ пӱӱн Давидтің саарында сірерге Арачылағҷы тӧріді – Мессий-Христос Хан-пиг.

¹² Мына сірерге танығ: сірер сӱбӱректерге ораап салған Час Паланың малға от салҷаң кӧлбеде чатчатханын таап аларзар.

¹³ Кинетін ангелнің хыринзар тигірнің сиріглері кӧп иде сыға салбинаң, Худайны сабландырып, хыйғы салғаннар: –

¹⁴ Сабланзын тигірдегі Худай, амыр хоных ползын чир ӱстӱндегілерге, кемге Худай паарсапча!

¹⁵ Ангеллер, хыйа парып, тигірде чіт чӧрібіскеннерінде, мал хадарҷаңнар пос аразында чоохтасханнар: – Вифлеемзер парып, Хан Худай искірген нименің хайди полғанын кӧр кӧрееңер.

¹⁶ Олар, улуғ маңзытта Вифлеемзер киліп, Мариянаң Иосифті паза от салҷаңда чатчатхан Час Паланы таап алғаннар.

¹⁷ Аны кӧр салып, мал хадарҷаңнар пу Час Паладаңар искірілген нимені оларға чоохтап пиргеннер.

¹⁸ Аны искен кізілернің прайзы мал хадарҷаңнарның чоохтарына чапсаан.

¹⁹ Мария, тізең, ол сӧстернің прайзын, істінде пик тудып, хайраллаан.

²⁰ Мал хадарҷаңнар, искірілген хабарның искен-кӧргенни полғаны ӱчӱн, Худайны алғыстап, сабландырып, нандыра парыбысханнар.

Час Пала храмда

²¹ Сигізінҷі кӱнінде, сӱннет итчең тус чит килгенде, іҷезі тойлығ полғалаххаох, ангел пирген Иисус тіп атнаң Час Паланы адап салғаннар.

²² Мариянаң Иосиф, Моисей Чахии хоостыра, посты арығланҷаң кӱннер чит килгенде, Иисусты, Иерусалимзер Хан Худайға кӧзідерге ағыл килгеннер.

²³ Хан Худайның Чахии хоостыра тун ир паланың полғаны ла Худайға чарыдыларға кирек полған.

²⁴ Іди, Хан Худайның олох Чахии хоостыра, ікі сас алай ікі иб тахырах палазын тайыға саларға кирек полған.

²⁵ Ол туста Иерусалимде Симеон тіп кізі чуртаан. Ол Худайға киртінчеткен арығ чӱректіг кізі полған. Ол Худайның Израильге полызарын сахтапчатхан, Худай Худы, тізең, анда полған.

²⁶ Худай Худы ағаа, Мессий-Христос Хан-пигні кӧріп албаанда, ӱребессің тіп ухаанҷылаптыр.

²⁷ Худай Худының устаанынаң Симеон храмзар килген. Паба-іҷезі Час пала Иисусты, Моисей Чахииның кибірін толдырарға тіп, пеер ағыл килгенде,

²⁸ Симеон, Иисусты холына алып, Худайны алғап, чоохтанған: –

²⁹ Амды, Ӧӧркі Чайаачы, пирген сӧзіңні тудып, нымысчыңны амырнаң позытчазың.

^30-31 Син, прай чоннарның кӧзіне тимнеп, ысхан арачыланысты позымның хараамнаң кӧрдім:

³² Ол Синің Израиль чоныңа сабланыс ағылар паза прай пасха чоннарға піліс пирчеткен чарых полар.

³³ Симеонның Паладаңар чоохтаан нимелеріне Иосифнең Иисустың іҷезі тың чапсааннар.

³⁴ Симеон, оларны алғап, Марияа, Иисустың іҷезіне, чоохтанған: – Пу Час Паланың ӱчӱн Израильде кӧп кізі тӧбін дее тӱзер, пӧзік тее кӧдірілер, Аннаң ӱчӱн кӧп кізі, тартызып,

³⁵ істілеріндегі сағыстарын тастына сығарар. Синің дее кӧксіңҷе, Мария, ачырғас, чітіг хылыс чіли, иртер.

³⁶ Анда Асир тӧлінең сыххан Фануилнің хызы улғаат парған ухаанҷы ипчі Анна полған. Хоных хонып, ирінең читі ле чыл чуртаан,

³⁷ амды, тізең, сигізон тӧрт чазын апарчатхан ӧкіс ипчі, храмнаң парбин, ораза тудып, пазырып, Худайның ӱчӱн хараа-кӱнӧрте хайынған.

³⁸ Олох туста ол, оларзар пас киліп, Хан Худайны саблаан паза Иерусалимні арачылирын сағыпчатхан кізілерге Иисустаңар чоохтаан.

³⁹ Иосифнең Мария, прай нимені Хан Худайның Чахии хоостыра ит салып, саарларынзар – Галилей чиріндегі Назаретсер айлан килгеннер.

⁴⁰ Иисус, ӧзіп, кӧңні тыып, хыйғадаң хыйға полып одырған, Худайның паарсазы Анынаң хада полған.

Иисус Оолағас храмда

⁴¹ Чыл сай Иисустың паба-іҷезі Иерусалимзер Па́сха тіп ӱлӱкӱнге чӧрҷеңнер.

⁴² Иисусха он ікі час тол парғанда, олар ідӧк кибір хоостыра Иерусалимзер ӱлӱкӱнге парғаннар.

⁴³ Ӱлӱкӱн кӱннері тоозылғанда, Иисустың паба-іҷезі ибзер наныбысханнар, Иисус Оолағас, тізең, Иерусалимде халған. Иосиф паза Иисустың іҷезі анзын сизінмееннер.

⁴⁴ Олар Иисусты пасха кізілернең хада килче тіп сағынғаннар, кӱн тооза парып, олар Аны туған-таныстар аразында тілеп сыхханнар.

⁴⁵ Че кізілер аразында таппин, Аны тілеп ала, Иерусалимзер нандыра айланғаннар.

⁴⁶ Ӱзінҷі ле кӱнінде Иисусты храмда таап алғаннар. Ол, ӱгретчілер аразында одырып, оларны истіп, сурығлар сурастырғлаан.

⁴⁷ Иисусты истіпчеткеннернің прайзы Аның хыйғазына паза нандырығларына чапсаан.

⁴⁸ Иисусты кӧр салып, паба-іҷезі таңнап парғаннар. Іҷезі Ағаа чоохтанған: – Палам! Ноға Син пісті іди итчезің? Піс Пабаңнаң хада, Сині тілеп, уғаа тың сағыссырадыбыс. –

⁴⁹ Нимее Мині тілирге кирек полған? Мағаа Пабамның туразында поларға кирек полчатханын пілбеезер бе? – нандырған оларға Иисус.

⁵⁰ Че олар Иисустың чоохтанған сӧстерін піл полбааннар.

⁵¹ Иисус оларнаң хада, чолға сығып, Назаретсер айлан килген. Ол паба-іҷезінің чооғын исчең. Іҷезі, тізең, Иисустың прай сӧстерін чӱреенде хайраллаан.

⁵² Иисус, ӧскеннең ӧзіп, хыйғадаң хыйға полып одырған. Худайның даа, кізілернің дее кӧңніне кірген.