Лука 19 - Наа Молҷағ

Закхей

¹ Соонаң Иисус, Иерихонзар кіріп, саарҷа париған.

² Ол саарда албан чығҷаңнарның пастығы полчатхан Закхей тіп пір пай кізі чуртаан.

³ Иисусты, кем полҷаң тіп, кӧріп аларға иткен, че чабыс сыны ӱчӱн, кізілер кистінең кӧр полбинчатхан.

⁴ Анаң, Иисусты кӧріп аларға тіп, алнынзар чӱгӱріп, Ол парҷаң чолның хазындағы смоковница ағазына сых парған.

⁵ Иисус, ол чирге чидіп, аны кӧр салып, чоохтанған: – Закхей! Тӱс табырах ағастаң. Пӱӱн Мағаа синің тураңда поларға кирек.

⁶ Ол, табырах ла тӱзіп, Иисусты ӧрчіліг удурлаан.

⁷ Анзын кӧргеннернің прайзы, Иисусты чазыхтығ кізізер кірче тіп, тарығып чоохтасхлаан.

⁸ Закхей, тізең, тура тӱзіп, Хан-пиге чоохтанған: – Хан-пигім! Мин чох кізілерге пайымның чарымын пир саларбын. Пірее дее кізіні хыйыхтаан ползам, ағаа тӧрт анҷа нандырарбын.

⁹ Иисус ағаа теен: – Пӱӱн пу тураа арачыланыс килді. Пу даа кізі Авраам тӧлі нооза.

¹⁰ Кізі Оолғы, чіткенін таап, арачылирға килген.

Кӱмӱс ахчадаңар кип-чоох

¹¹ Мыны истіпчеткеннерге Иисус хоза кип-чоох чоохтап пирген. Иисус Иерусалимнең ырах нимес полғаннаңар, прайзы Худай хан-чирі тӱрче полбинаң азыл парарға кирек тіп сағынған.

¹² Иисус мындағ ниме чоохтаан: – Пір саблығ сӧӧктең сыххан кізі, ыраххы чирдегі ханның ӱлгӱзін холға киріп, нандыра айлан килерге тимненчедіп,

¹³ позынзар он чалҷызын хығырып алып, оларға, пірер кӱмӱс ахча пиріп, теен: «Мин айланғанҷа, пу ахчаны постарыңа тузалығ тудыныңар».

¹⁴ Че мындағы кізілер ағаа хыртыстанҷаңнар, аннаңар ол парыбысхандох, аның соонҷа кізілерні ызып, піди чахыбысханнар: «Аны, пістің ханыбыс ползын тіп, хынминчабыс».

¹⁵ Ол кізі, хан-ӱлгӱзін холға киріп, позының чирінзер айлан килген. Анаң, пирген ахчанаң хайди тузаланғаннарын пілерге полып, ахча пирген чалҷыларын позынзар хығыртыбысхан.

¹⁶ Пастағы чалҷызы, кір киліп, чоохтанған: «Ээзім! Синің пір кӱмӱс ахчаңны он кӱмӱс ахчаа читірдім».

¹⁷ «Чахсы, кӱстенҷік чалҷым! Син, кічіг киректе ізестіг полғаның ӱчӱн, амды он саарның пазы поларзың», – нандырған ағаа ээзі.

¹⁸ Ікінҷі чалҷызы, кір киліп, чоохтанған: «Ээзім! Синің пір кӱмӱс ахчаңнаң пис кӱмӱс ахча идіп алғам».

¹⁹ «Син андағда пис саарның пазы пол», – нандырған мынзына даа ээзі.

²⁰ Паза пірсі, кір киліп, чоохтанған: «Ээзім! Мына синің кӱмӱс ахчаң. Мин аны, сӱбӱрекке ораап, хайраллаам.

²¹ Син хатығ кізізің: салбаан даа нимені алып алчазың, таарыбаан даа асты кизіп алчазың, аннаңар мин синнең хорыххам».

²² Ээзі ағаа нандырған: «Мин сині синіңӧк сӧстеріңнең чарғылирбын, чабал чалҷы! Минің хатығ кізі полчатханымны, салбаан даа нимені алып алчатханымны, таарыбаан даа асты кизіп алчатханымны пілгезің.

²³ Андағда ноға мині, киліп, артых ахча алып алзын тіп, ахчамнаң артых парыс кірер иде тудынмаазың?»

²⁴ Анаң хости турчатхан чалҷыларына чахаан: «Аның кӱмӱс ахчазын, алып алып, он кӱмӱс ахчалығ чалҷаа пирібізіңер».

²⁵ Че олар ағаа нандырғаннар: «Ээбіс! Аның он кӱмӱс ахчазы пар нооза».

²⁶ Че ээзі теен: «Тіпчем сірерге, ниме-ноолығ кізее хозылар, ниме-ноозы чох кізінің, тізең, пар даа нимезі алылар.

²⁷ Мині постарының ханы идерге хынмаан ыырҷыларымны, пеер ағыл киліп, минің алнымда соғыбызыңар».

Иисустың Иерусалимзер кіргені

²⁸ Мыны чоохтирын тоозып, Иисус аннаң андар Иерусалимзер алдыра чорых тутхан.

²⁹ Ол, Елеон тағдағы Виффагий паза Вифаний аалларзар чит киліп, Позынаң пурун ікі ӱгренҷізін ызып,

³⁰ оларға теен: – Тігі сариндағы аалзар парыңар, андар кіріп, пағда турчатхан хаҷан даа кізі мӱнмеен чиит эштекті таап, систіп алып, пеер ағыл киліңер.

³¹ Пірее кізі «Ноға систіпчезер?» тіп сурза, «Аны Хан-пигібіс киректепче» тіп нандырыңар ағаа.

³² Ысхан кізілері, парып, прай нимені хап-орта, Иисус чоохтаанни, таап алғаннар.

³³ Олар эштектің паан сисчеткеннерінде, аның ээлері олардаң сурғаннар: – Ноға пу эштекті систіпчезер? –

³⁴ Аны Хан-пигібіс киректепче, – нандырғаннар олар.

³⁵ Анаң аны Иисуссар ағыл килгеннер. Эштектің арғазына кип-азахтарын тӧзеп, Иисусты мӱндірібіскеннер.

³⁶ Иисус іди париғанда, Аның чолына кип-азахтар тӧзеп одырғаннар.

³⁷ Ол Елеон тағдаң инҷең чирге чит килгенде, нинҷе пар ӱгренҷілері прайзы кӧрген хайхастары ӱчӱн Худайны, ӧрчіліг хысхырып, саблап сыхханнар: –

³⁸ Хан Худайның адынаң Килчеткенге алғас ползын! Тигірде амыр хоных паза Худайға сабланыс ползын!

³⁹ Чон аразындағы хай пірее фарисейлер Иисусха чоохтанғаннар: – Ӱгретчі! Ӱгренҷілеріңе амыразыннар тіп чоохта. –

⁴⁰ Тіпчем сірерге, олар сым пол парзалар, тастар хысхыр сығарлар, – нандырған оларға Иисус.

Иисус Иерусалимге ылғапча

⁴¹ Иисус, саарзар чағдап киліп, андар кӧріп ала, ылғап, чоохтанған: –

⁴² Пӱӱн дее пілген ползаң, Иерусалим, амыр чуртасха ниме кирек полчатханын! Че сағам ол синің харахтарыңа кӧрінмес иде чабых!

⁴³ Килер андағ тус, хаҷан ыырҷыларың сині туйухти ниме-ноолар ӱӱп, ибірібізіп, сині прай саринаң хысти пазарлар.

⁴⁴ Анаң сині прай изеп салып, чуртағҷыларыңны синдӧк ӧдір саларлар. Худай синзер килген тусты пілбин халғаның ӱчӱн, тас ӱстӱнде тас халғыспастар.

Храмны арығлааны

⁴⁵ Анаң храм сиденінзер кір киліп, анда садығ итчеткеннернең ниме-ноо алчатханнарны сығара сӱр сыххан. –

⁴⁶ Пазылған полған: «Минің храмым – пазырҷаң тура», сірер, тізең, аны тонағҷылар ордазына айландыр салғазар, – чоохтанған оларға.

⁴⁷ Анаң Ол храм чирінде кӱннің сай кізілерні ӱгреткен. Улуғ абыстар, Моисей Чахии пілігҷілері паза ах сағаллар Иисусты ӧдірер сылтағ тілееннер.

⁴⁸ Че, прай чон Аның чооғын искеннең истіп ле турғаннаңар, анзын толдырар оңдай пір дее таап полбинчатханнар.