Лука 18 - Наа Молҷағ

Сын нимес чарғыҷыдаңар

¹ Анаң Иисус хаҷан даа пазырарға кирек полчатханнаңар паза ізеністі чідірбестеңер кип-чоох чоохтап пирген. –

² Пір саарда чарғыҷы чуртаптыр. Ол Худайдаң даа хорыхпаҷаң, кізілердең дее чалтанмаҷаң.

³ Олох саарда пір ӧкіс ипчі полған. Ол ипчі, чарғыҷызар чӧріп, сурынҷаң: «Арачыла мині миннең тоғыр полчатхан кізідең».

⁴ Ол чарғыҷы ниме идерге ӱр хынмаан. Анаң позы позына теен: «Мин Худайдаң даа хорыхпинчам, кізілердең дее чалтанминчам,

⁵ че пу ӧкіс ипчі миннең пір дее азырылбинча, арачылимдах аны, пеер киліп, хатап чархандырбазын тіп».

⁶ Анаң Хан-пиг чоохтанған: – Истіңер, ниме тіпче саба оңдайлығ чарғыҷы?

⁷ Худай чи, хараа-кӱнӧрте Позынаң полыс пирерге сурынчатхан таллап алған кізілерінің алнына турбас па? Полызарға маңзырабас па?

⁸ Тіпчем сірерге, Ол, тӱрче полбинаңох, арачылап сығар. Че Кізі Оолғы, киліп, чирде киртіністі табар ба ни?

Фарисей паза албан чығҷаң кізі

⁹ Анаң Иисус, постарын арығ чӱректіг кізібін тіп сананып, пасхаларын нимее салбинчатханнарға мындағ кип-чоох чоохтап пирген: –

¹⁰ Ікі кізі храмзар пазырарға кірген: пірсі фарисей, паза пірсі, тізең, албан чығҷаң кізі.

¹¹ Фарисей, турып алып, позы алынҷа піди пазырған: «Худай! Пасха кізілер осхас тонағҷы, хыйыхтағҷы, кізінең чӧреечі алай албан чығҷаң пу кізі осхас полбинчатханым ӱчӱн, алғыстапчам Сині.

¹² Мин, неделяда ікі хати ораза тудып, прай парыстың онынҷы чардығын Сағаа пирчем».

¹³ Албан чығҷаң кізі, тізең, оортах турып, тигірзер харахтарын кӧдірерге дее тідінмеен, че, кӧксін сабынып, чоохтанған: «Худай! Айадах мині, чазыхтығ кізіні!»

¹⁴ Тіпчем сірерге, мынзы, тігізінің хыринда артых ахтағлығ нанған. Позы позын кӧдірчеткен кізінің полғаны ла чабыс пастыртар, че позын чабыс тудынчатхан кізі ӧӧр кӧдірілер.

Иисус палаларны алғапча

¹⁵ Иисуссар, холын теерт пирзін тіп, палаларны даа ағыл турғаннар, ӱгренҷілері, ол нимені кӧріп, кізілерні хырысханнар.

¹⁶ Че Иисус, олғаннарны хығырып, чоохтанған: – Палаларға Минзер иртерге чарадыңар, харығ полбаңар оларға. Пала осхас кізілерни Худай хан-чирі полар.

¹⁷ Сынны чоохтапчам сірерге, кем позына Худай хан-ӱлгӱзін, олған чіли, чағын итпес, ол кізі хаҷан даа Худай хан-чирінзер кір полбас.

Пай оол мӧгі чуртастаңар сурча

¹⁸ Пастых полчатхан пір кізі Иисустаң сурған: – Чахсы полчатхан Ӱгретчі! Мӧгі чуртастығ полып алар ӱчӱн, мин ниме идерге кирекпін?

¹⁹ Иисус ағаа теен: – Син ноға Мині чахсы полчатхан тідің? Пірдеезі чахсы нимес, чалғыс Худай ла андағ.

²⁰ Син пілчезің чахығларны: «оралыс чӧрбе, кізі ӧдірбе, оғырлаба, чой киречілебе, паба-іҷеңні улуғла». –

²¹ Мин пу чахығларны чиит тустаң сығара толдырчам, – теен ол кізі. –

²² Сағаа ам даа пір ниме читпинче: нинҷе пар ниме-нооңны садыбызып, ахчаңны чох кізілерге ӱлебіс, андада син тигірде ис-пайлығ поларзың. Анаң, киліп, Минің соомҷа пар, – теен ағаа Иисус, аны истіп.

²³ Ол, уғаа пай полғаннаңар, аны истіп, сағыссырап сыххан.

²⁴ Иисус, аның іди сағыссырапчатханын кӧріп, чоохтанған: – Хайдағ сидіктір пай кізілерге Худай хан-ӱлгӱзінзер кіріп аларға!

²⁵ Пайның Худай хан-ӱлгӱзінзер кіріп аларының хыринда, тибее іңе ӱдінҷе ирт парыбызарға хай-хай оой.

²⁶ Аны искен кізілер сурғаннар: – Андағда кем арачылан полар ни? –

²⁷ Кізілер ит полбас нимені Худай ит полар, – нандырған Иисус.

²⁸ Андада Пётр чоохтанған: – Мына піс, прай нимебіс тасти, Синің сооңҷа чӧрчебіс.

²⁹ Иисус оларға теен: – Сынны чоохтапчам сірерге, Худай хан-ӱлгӱзі ӱчӱн позының туразын алай паба-іҷезін, харындастарын алай пиҷе-туңмаларын, ипчізін алай палаларын тастаан кізі

³⁰ амғы туста хай-хай кӧп алар, килер туста даа мӧгі чуртастығ полар.

Иисус ӧлерінеңер ӱзінҷізін ухаанҷылапча

³¹ Он ікі ӱгренҷізін оортах хығырып, Иисус оларға теен: – Мына піс Иерусалимзер парирбыс, анда ухаанҷыларның Кізі Оолғынаңар пасхан нимелері прайзы тол парар.

³² Аны Худайы чохтарға пирібізіп, кӱліп, сӧклеп, Ағаа чапсыра тӱкӱрерлер.

³³ Соғарлар Аны, анаң ӧдір саларлар. Че ӱзінҷі кӱнінде Ол тіріл килер.

³⁴ Че ӱгренҷілері ол нимелернің пірдеезін піл полбааннар; пу сӧстер пілдізі чох полған оларға, чоохтаан нимені, тізең, оңар полбааннар.

Харах чох кізіні имнебіскені

³⁵ Иисус Иерихонға чит килигенде, чол хазында харах чох пір кізі кіленіп одырған.

³⁶ Позының хыринҷа чонның ирт париғанын истіп, ол сурған: – Нимедір пу? –

³⁷ Назареттегі Иисус парир, – тееннер ағаа. –

³⁸ Иисус, Давид тӧлі! Айадах мағаа! – хысхырған харах чох кізі андада.

³⁹ Алнында парчатханнар аны, тызып, тымылдырарға харасханнар, че ол уламох тың хысхырған: – Давид тӧлі! Айадах мині!

⁴⁰ Иисус, тохти тӱзіп, ол кізіні Позынзар ағыл килерге чоохтаан. Харах чох кізі пас килгенде, аннаң сурған: –

⁴¹ Ниме кирек сағаа Миннең? – Хан-пигім! Харахтарым кӧрзіннер! – теен ол кізі. –

⁴² Кӧрзін харахтарың! Киртінізің сині арачылады, – теен ағаа Иисус.

⁴³ Сах андох ол кізі кӧр сыххан. Анаң, Худайны саблап, Иисустың соонҷа парған. Прай чон, пу нимені кӧріп, Худайны саблаан.