Лука 17 - Наа Молҷағ

Хыҷаланыстардаңар

¹ Иисус ӱгренҷілеріне чоохтаан: – Кізіні чазыхха сухчатхан нимелер пол ла парчалар, че хыйал анзына, кемнең пастыра олар килчелер.

² Олаңай кічіг кізілернің піреезін дее андағ кізее чазыхха сухтыртар орнына, аны, мойнына теербен тазын палғап алып, талайзар тастабысса, чахсы поларҷых.

³ Постарыңны сизініңер! Харындазың синнең тоғыр пірее чазых ит салза, хырыс аны, пыросынза, тізең, пырозын таста.

⁴ Пір кӱнде синнең тоғыр читі хати чазых ит салза, анаң полған на сай, синзер киліп, «Пыросынчам» тіп турза, син аның пырозын ідӧк тастап тур.

Киртіністеңер паза чоох истерінеңер

⁵ Андада илҷілер Хан-пиге тееннер: – Киртінізібісті хос пир.

⁶ Хан-пиг теен: – Сынап сірер, горчицаның ӱренінҷе дее киртініп, пу смоковница ағазына «Мыннаң ходырылып, талайда одыртыл пар!» тіп чоохтанған ползаңар, ол чооғыңарны истерҷік.

⁷ Сірернің хайзыңар, хыра тартхан алай хой хадарған соонда, чазыдаң ибзер айланған чалҷыны «Табырах кил, стол кистіне одыр» тіп хығырар?

⁸ Іди чоохтанар орнына «Чіҷең ниме тимнеп пир, анаң, арығ сӱбӱрек алныңа палғанып алып, чіп-ізіп алғанымҷа, хыримда хайын чӧр, соонаң позың чіп-ізіп аларзың» тібес пе ни?

⁹ Чалҷызын, чахығларны толдырған ӱчӱн, алғыстир ба ни? Чох, сағынминчам.

¹⁰ Сірер дее, прай чахаан нимелерні толдыр салып, чоохтаныңар: «Піс олаңай ла чалҷыларбыс. Иділҷең нимелерні ле ит салдыбыс».

Он кізіні ходырлығ ағырығдаң имнебіскені

¹¹ Иисус, Иерусалимзер парчадып, Самар чирінең Галилей чирінің аразынҷа ирткен.

¹² Пір аалзар кір париғанында, Ағаа чызығ палығлығ он кізі тоғас парған. Олар, Иисусты кӧр салып, оортахта турыбысханнар.

¹³ Анаң хысхырғаннар: – Иисус Ӱгретчі! Айадах піске! –

¹⁴ Парыңар, абыстарға кӧзідіңер постарыңны! – чоохтанған Иисус, оларны кӧріп. Париғаннарында, тізең, иттері арығ паза хазых пол парыбысхан.

¹⁵ Оларның пірсі, позының чазыл парғанын кӧріп, нандыра айлан киліп, хысхырып ала, Худайны саблаан.

¹⁶ Иисустың алнында тӱңдере тӱзіп, Аны алғыстаан. Ол самар кізі полған.

¹⁷ Андада Иисус чоохтанған: – Он кізі чазыл парған нимес пе зе? Тоғызы чи хайдадыр?

¹⁸ Ноға пу мындағы нимес кізідең пасха пірдеезі Худайны алғыстирға нандыра айланмады?

¹⁹ Анаң самар кізее чоохтанған: – Турып, пар. Киртінізің сині арачылап халды.

Худай хан-чирінің килерінеңер

²⁰ Хай пірее фарисейлер Иисустаң Худай хан-чирі хаҷан килер тіп сурғаннар. Иисус оларға нандырған: – Худай хан-ӱлгӱзі пасхазына пілдіртпин килер.

²¹ Пірдеезі тібес: «Мына, мында ол» алай «Тігіне, тігде ол». Худай хан-ӱлгӱзі сірернің істіңерде.

²² Ідӧк Ол ӱгренҷілеріне теен: – Килер андағ тус, хаҷан сірер Кізі Оолғының пірее кӱнін кӧріп аларға сағынарзар, че кӧр полбассар.

²³ Кізілер сірерге тирлер: «Мына мында» алай «Тігіне тігде», че андар-мындар чӱгӱр чӧріп, сӱріспеңер.

²⁴ Хайди сағын тигірні пір хыринаң паза пір хырина читіре чарыт парыбысча, ідӧк полар Кізі Оолғы килген кӱнде.

²⁵ Че пастап Ол, кӧп чобалып, амғы тӧлге сӱрдіртерге кирек.

²⁶ Нойның тузында хайди полған, ідӧк полар Кізі Оолғының тузында.

²⁷ Нойның позының илбек кимезіне одырыбысханына читіре, паза суғның, тазып, прайзын хырыбысхан тузына теере, олар прайзы, чіп, іскеннер, ипчі алып, ирге парғлааннар.

²⁸ Лоттың тузында даа ідӧк полған. Кізілер, чіп, іскеннер, садып, алғаннар, одыртып, пӱдіргеннер.

²⁹ Че, Лот Содом саардаң сых парыбысхан кӱн, тигірдең кӧйчеткен от паза сералығ наңмыр чаап, прайзын чох идібіскен.

³⁰ Кізі Оолғы килген кӱн ідӧк полар.

³¹ Ол кӱнде тура хырындағы кізі ибінзер ниме-нооларын аларға тӱспезін, чазыдағы кізі дее нанмазын.

³² Лоттың ипчізін сағысха киріңер.

³³ Позының тынын ал халарға кӱстенген кізі тыны чох халар, че позының тынын чідірген кізі, тынын хайраллап халар.

³⁴ Тіпчем сірерге, ол хараазын пір тӧзектегі ікі кізінің пірсі алылар, паза пірсі, тізең, халғызылар.

³⁵ Теербеннең ун тартчатхан ікі ипчінің пірсі алылар, паза пірсі, тізең, халғызылар.

³⁶ Чазыда тоғынар ікі кізінің пірсі алылар, паза пірсі халғызылар.

³⁷ Андада ӱгренҷілері Хан-пигінең сурғаннар: – Хайда полар пу ниме? – Хайда сӧӧк, андар хусхуннар чыылызарлар, – нандырған оларға Иисус.