Лука 15 - Наа Молҷағ

Чіткен хойдаңар

¹ Албан чығҷаңнарның паза чазыхтығларның прайзы Иисусты истіп аларға килҷең.

² Фарисейлер паза Моисей Чахии пілігҷілері перінісклееннер: – Ол, чазыхтығларны позына чағын киріп, оларнаң хада азыранча.

³ Иисус, тізең, оларға мындағ кип-чоох чоохтап пирген: –

⁴ Сірернің хайзыңар, чӱс хойлығ полып, оларның пірсін чідір салып, тоғызон тоғыс хойын чазыда тастап, ол чіт парған чалғыс хойны, таап алғанҷа, тілеп чӧрбес?

⁵ Таап алза, тізең, ӧрінгеніне, аны иңніне салып алар,

⁶ ибінзер киліп, арғыстарынаң хонҷыхтарын чыып алып, оларға тир: «Ӧрініңер миннең хада: Мин чіт парған хойымны таап алдым».

⁷ Тіпчем сірерге, тигірде дее пыросынчатхан пір кізее ӧрініс, пыросынарын кирексібинчеткен тоғызон тоғыс арығ чӱректіг кізее ӧрінгенінең, хай хай улуғ полар.

Чіткен ахчадаңар

⁸ Алай хайдағ ипчі, он кӱмӱс ахчазының пірсін чідір салза, чарытхыны тамызып, туразын сыбырып, ол ахчаны, тапханҷа, тілебес?

⁹ Таап алза, тізең, ӧӧрелерінең хонҷых ипчілерні хығырып алып, оларға чоохтир: «Ӧрініңер миннең хада: чідір салған ахчамны таап алдым».

¹⁰ Ідӧк, тіпчем сірерге, Худай ангеллері пыросынчатхан чазыхтығ пір дее кізее ӧрінчелер.

Ікі оолдаңар паза оларның пабаларынаңар

¹¹ Анаң Иисус чоохтанған: – Пір кізінің ікі оолғы пар полтыр.

¹² Кічіг оолғы пабазына тіптір: «Пабам! Мағаа килісчеткен ӱлӱсті пирібіс». Андада пабазы оолларына ис-пайын ӱлестір пирген.

¹³ Нинҷе-де кӱн ирткенде, кічіг оолғы, прай ис-пайын чыып алып, ыраххы чирлерзер чӧрібіскен. Анда, кӱлетке ле сабылып, нинҷе пар нимезін прай хорат салтыр.

¹⁴ Нинҷе пар нимезін прай хорат салғандох, ол чирде илбек ӧзӧгіс пасталыбыстыр. Оол, хызылып пастабызып,

¹⁵ анда чуртапчатхан кізілернің пірсінзер килтір, анзы аны сосхалар хадарарға ызыбыстыр.

¹⁶ Оол сосхаларға пирчеткен чииснең харнын тосхырарҷых, че аны даа ағаа пирбееннер.

¹⁷ Анаң, сағыс хабынып, оол чоохтанған: «Пабамның чалҷыларының прайзына халас тосханҷа чиирге чидіп, халадыр, мин, тізең, мында, ӧзӧгіп, ӧлерге чӧрбін!

¹⁸ Ибзер нанып, пабама чоохтирбын: „Пабам! Мин тигірдең паза синнең тоғыр чазых ит салғам.

¹⁹ Синің оолғың тіп аданарға паза турыстығ нимеспін, чалҷаа даа алып ал“».

²⁰ Анаң, тыхтанып, ибінзер нан сыххан. Пабазы, оолғын ырахтынох кӧр салып, айап парған. Оолғынзар чӱгӱр киліп, хуҷахтап, охсанған.

²¹ Оолғы, тізең, пабазына теен: «Пабам! Мин тигірдең паза синнең тоғыр чазых ит салғам. Синің оолғың тіп аданарға паза турыстығ нимеспін».

²² Че пабазы чалҷыларына чахыбысхан: «Табырах, иң чахсы кип-азах ағылып, оолғымны тонандырыбызыңар. Хол салаазына пурба, азахтарына маймахтар кизіртібізіңер.

²³ Симіс пызоны ағыл киліп, соғыбызыңар. Чиис чіп, кӱлеттирбістер.

²⁴ Минің оолғым ӧліг полған, амды тіріл килді, чіт парған полған, амды табылды». Анаң кӱлеттеп сыхханнар.

²⁵ Улуғ оолғы, тізең, чазыда тоғынған. Ибінзер айланчадып, ибге чағыннап киліп, кізілернің, сарназып, кӱлеттепчеткенін ис салған.

²⁶ Анаң, чалҷыларның пірсін хығырып алып, сурған: «Ниме полча мында?»

²⁷ «Харындазың килді, пабаң, аның тіріг-хазых айланғанына ӧрініп, симіс пызо сохтырыбысты».

²⁸ Улуғ оолғы, тарын парып, тураа кірерге хынмаан. Андада пабазы, сых киліп, алданып, аны тураа кірерге хығырған.

²⁹ Че улуғ оолғы пабазына нандырған: «Мин, мынҷа чыл синде тоғын салып, хаҷан даа сағаа харыспаам, че син мағаа, арғыстарымнаң хада кӱлеттеп аларға, ӧскіҷекті дее сох пирбеезің.

³⁰ Че хаҷан пу оолғың, хайда-да ипчілернең кӱлеттеп чӧріп, ис-пайыңны ӱрет салып, айлан килгенде, син ағаа симіс пызо сох пирдің».

³¹ Пабазы, тізең, улуғ оолғына чоохтанған: «Оолғым! Син сыбыра миннең хадазың, нинҷе пар нимем прай сини,

³² че харындазыңның, ӧліг полып, тіріл килгеніне, чіт парып, табылғанына ӧрініп, кӱлеттирге кирекпіс».