Лука 1 - Наа Молҷағ

Сӧс алны

¹ Пістің арабыста полған нимелердеңер изерістіре пас саларға кӧп кізі кӱстенген.

² Ол нимелерні иң пастабох кӧріп алып, Чахсы Хабар ӱгретчілері пол парған кізілер піске аннаңар искіргеннер.

³ Мин дее, прай нимені пастағызынаң сығара чахсы иде піліп алған соонаң, сағаа, аарлығ Феофил, аннаңар изерістіре пас пирерге сағын салғам.

⁴ Сағаа пирілген ӱгредігнің нинҷе пар сынын прай пӱкӱлге піліп аларың ӱчӱн, іди иткем.

Кіреске тӱзірҷең Иоанның тӧрирінеңер

⁵ Иродтың, Иудей чирі ханының, тузында Авий абыстың чолын пасхан абыстарның тӧлінең сыххан Захарий тіп абыс чуртаан, аның ипчізі Елисавет, тізең, абыс Аарон сӧӧгінең полған.

⁶ Олар ікізі дее, Худай алнында арығ чӱректіг кізілер полып, Хан Худайның чахығларына тӧстеніп чуртааннар.

⁷ Елисавет тӧлі чох ипчі полғаннаңар, оларның пала чох полған, амды, тізең, ікізі дее частан парған кізілер полғаннар.

⁸ Пірсінде Захарий, теезі чидіп, Худайға пазырарын иртірчеткенде,

⁹ Абыстар кибірі хоостыра, ағаа, Хан Худайның храмынзар кіріп, анда тадылығ чыстығ оттарны тамызарға ӱлӱс тӱскен.

¹⁰ Оттар тамызылғанда, нинҷе пар чон прайзы тасхар пазыр турған.

¹¹ Ол туста Захарий тадылығ чыстығ отты ӧртеҷең орынның оң саринда Хан Худайның ангелінің турчатханын кӧр салған.

¹² Аны кӧр салып, Захарий, изі чохтанып, тың хорых парған.

¹³ Ангел, тізең, ағаа теен: – Хорыхпа, Захарий! Пазырғаныңны Худай искен, Елисавет ипчің оол таап пирер, син аны Иоанн тіп адап саларзың.

¹⁴ Ол сағаа ӧрініс паза кӧглес ағылар. Кӧп кізі аның тӧрееніне ӧрінер.

¹⁵ Ол Хан Худайның алнында илбек кізі полар. Ағаа араға ізерге чарабас полар, ол тӧреелеккеӧк Худай Худынаң тол парар.

¹⁶ Ол Израиль чонынаң кӧп кізіні Ӧӧркі Чайаачаа, оларның Худайына айландырар.

¹⁷ Иоанн, Аның алнынҷа килер ухаанҷы, Илияох осхас кӱстіг паза кӱлӱк кӧңніліг: пабаларның чӱректерін палаларынзар айландырар паза сӧс испинчеткеннерні сын чолға кирер, Хан Худайға чонны тимнеп пирер. –

¹⁸ Ол нимені мин хайди піліп аларбын? Мин позым даа кирібін, ипчім дее улуғ частығ, – теен ангелге Захарий.

¹⁹ Ангел ағаа нандырған: – Мин Худайның алнында турчатхан Гавриилбін, Ол мині синзер чоохтазарға паза пу чахсы хабарны искірерге ысхан.

²⁰ Мин чоохтаан сӧстер, тузы читсе, толарлар. Че син, сӧстеріме киртінмеенің ӱчӱн, искірген хабарым толғанҷа, чоохтан полбин, сым на поларзың.

²¹ Ол туста чон, Захарийні сахтап, аның храмда ӱр тудылчатханына таңнаан.

²² Захарий, сых киліп, кізілернең чоохтас полбаан; олар, тізең, Захарийнің храмда ангелні кӧргенін сизін салғаннар. Ол, чоохтан полбин, оларнаң танығларнаң тіл алысхан.

²³ Захарийнің храмда тоғынҷаң кӱннері ирт парғанда, ол ибінзер айлан килген.

²⁴ Ол кӱннернің соонда ипчізі Елисавет, тойлығ пол парып, пис ай ибдең сыхпин одырған. Ол піди тіҷең: –

²⁵ Чонның алнында мағаа паза уйадыстығ полбазын тіп, Хан Худай, кӧрізін минзер айландырып, мағаа паарсазын читірді.

Иисустың тӧрирінеңер искіріг

²⁶ Елисавет алтынҷы айында тойлығ чӧрчеткенде, Худай Гавриил ангелні Галилей чиріндегі Назарет саарзар ысхан.

²⁷ Ол Давид тӧлінең сыххан Иосифке худалал парған Мария тіп хыссар килген.

²⁸ Ангел, Мариязар киліп, теен: – Изен, Худай паарсазы тӱскен хыс! Хан Худай синнең хада. Ипчі кізілернің иң алғастығы синзің.

²⁹ Мария, тізең, аның сӧстерін истіп, алаң ас парған, пу чолабиттің ниме таныхтапчатханын піліп аларға сіренген.

³⁰ Андада ангел ағаа теен: – Хорыхпа, Мария. Син Худай паарсазын алғазың нооза.

³¹ Син ам азах аар пол парып, оол тӧрідерзің, Аны Иисус тіп адап саларзың.

³² Ол илбек полар, Ӧӧркі Чайаачының Оолғы тіп адалар. Хан Худай Ағаа Давид ӧбекезінің хан-ӱлгӱзін пирер.

³³ Ол хаҷан даа Иаковтың чонының ханы полар. Аның ӱлгӱзі хаҷан даа тоозылбас-ӱзілбес. –

³⁴ Че ирімнең хоных хонғалахха хайди ол ниме пол парар? – сурған ангелдең Мария.

³⁵ Ангел ағаа нандырған: – Худай Худы, синзер киліп, Ӧӧркі Чайаачының кӱзінең сині кӧлебізер, аннаңар тӧреен Паланы ах-арығ паза Худай Оолғы тіп адирлар.

³⁶ Тӧлі чох тіп саналчатхан Елисавет туғаның, частығ даа полза, тойлығох пол парған. Амды алтынҷы айында чӧрче.

³⁷ Худайның пір дее сӧзі тикке пола чоғыл. –

³⁸ Мин Хан Худайның хулыбын. Син чоохтаанни ползын, – теен андада Мария. Ангел, тізең, Мариядаң парыбысхан.

Марияның Елисаветсер килгені

³⁹ Олох кӱннерде Мария, табырах ла тыхтанып, Иудей тағлығ чиріндегі саарзар алдыра чол сығыбысхан.

⁴⁰ Ол, Захарийнің туразынзар кір киліп, Елисаветнең изеннескен.

⁴¹ Елисавет Марияның изен-минді теенін ис салғандох, істіндегі палазы туғли тӱскен. Елисаветке Худай Худы тол парыбысхан.

⁴² Елисавет, тізең, ӧтіг табыснаң чоохтанған: – Ипчілернің иң алғастығы синзің, істіңдегі дее пала алғастығ!

⁴³ Хайди полдым мин, ноға Хан-пигімнің іҷезі минзер килді?

⁴⁴ Ӱніңні искенімдӧк, істімдегі палам даа ӧрінгеніне туғли тӱскен.

⁴⁵ Хан Худайның чоохтаан сӧзінің тол парарына киртінчезің, аннаңар син часкалығзың.

Марияның Худайны саблапчатхан сарыны

⁴⁶ Андада Мария теен: – Минің чӱреем Хан Худайны саблапча.

⁴⁷ Ӧрінчедір кӧңнім Худайға, Арачылағҷыма,

^48-49 Минзер, Позының олаңай ла хулынзар, кӧрізін айландырғаны ӱчӱн! Мыннаң мындар, кӱстіг Худайның мағаа ит пирген илбек киректері ӱчӱн, прай чоннар мині часкалығ тирлер! Аның ады ах-арығ;

⁵⁰ Тӧлдең тӧлге Позынаң чалтанчатханнарға ӧлҷей пирче.

⁵¹ Ол Позының кӱзінең илбек нимелер иткен: Улуғсырхостарны сағын чӧрчеткен сағыстарынаң хада андар-мындар сӱрглебіскен.

⁵² Кӱстіг хан-пиглерні ӱлгӱ сіреелерінең тӱзіріп, чабыстарны кӧдірген.

⁵³ Хызыхчатханнарны пай идіп, пайларны хуруғ холлығ халғыс салған.

⁵⁴ Ол, ӧбекелерібіске пирген сӧзін тудып, Израиль нымысчызына полызарға килген.

⁵⁵ Ӧбекелерібіске – Авраамға паза аның хаҷан даа ӱзілбес тӧліне – пирген сӧзін толдырған.

⁵⁶ Мария, ӱс айға чағын Елисаветнең хада полып, ибінзер айлан килген.

Кіреске тӱзірҷең Иоанның тӧреені

⁵⁷ Пала тӧрітчең тус чит килгенде, Елисавет оолағас таап алған.

⁵⁸ Хан Худайдаң ағаа улуғ ӧлҷей тӱскенін ис салып, хонҷыхтарынаң туғаннары Елисаветнең хада ӧрінгеннер.

⁵⁹ Сигізінҷі кӱнінде палаа сӱннет идерге киліп, пабазының адынаң Захарий тіп адап саларға иткеннер.

⁶⁰ Че іҷезі теен: – Чох, Иоанн тіп адап саларға кирек. –

⁶¹ Синің туғаннарың аразында андағ аттығ пір дее кізі чоғыл, – нандырғаннар ағаа.

⁶² Анаң, пабазынзар икіп, паланы хайди адирың килче тіп сурғаннар.

⁶³ Захарий, чардыҷах сурып алып, анда «Аның ады Иоанн» тіп пас салған. Прайзы таңнап парған.

⁶⁴ Сах андох Захарий, пазох чоохтазар пол парып, Худайны алғап сыххан.

⁶⁵ Оларның ибіре чуртапчатхан хонҷыхтарның прайзы хорых парған. Пу киректеңер чоох прай Иудей тағлығ чиріне тараан.

⁶⁶ Пу тылаасты искен полған на кізі, хайхап, тіҷең: «Кем полар ни пу пала?» Тӧрееннең анда Хан Худай кӱзі пары пілдістіг полған.

Захарийнің ухаанҷы сарыны

⁶⁷ Иоанның пабазы Захарий, Худай Худынаң тол парыбызып ухаанҷылаан: –

⁶⁸ Ӧӧркі Чайаачы, Израильнің Худайы, сабланзын! Ол Позының чонына полызарға килген паза пос чуртас пирген.

⁶⁹ Ол Давид нымысчызының тӧлінең сыххан кӱстіг Арачылағҷыны піске пирген.

^70-71 Ол пісті, ыырҷыларыбыстаң арачылап, хырт кӧрчеткеннердең арачылир тіп, Хан Худай піске хас-хаҷанох чуртаан ах-арығ ухаанҷылары пастыра искірген.

⁷² Ол ӧбекелерібісті ӧлҷейлирге паза Позының ызых молҷаан ундубасха сӧс пирген.

⁷³ Худай, піске пирҷең нимедеңер ӧбекебіс Авраамға чоохтап, обалланып ала сӧс пирген:

^74-75 пісті ыырҷыларыбыстаң осхырарға паза чуртазыбыс тооза Аның алнында ах-арығ, орта тудынып, пірдеезінең хорыхпин, Ағаа нымысчы поларыбысты чарадарға.

⁷⁶ Че син, палам, Ӧӧркі Чайаачының ухаанҷызы тіп адаларзың. Хан Худайның алнынҷа парарзың: Ағаа чолны тимнеп пирер ӱчӱн;

⁷⁷ Чонның арачыланызы чазыхтарынаң позыдыларында полчатханын чонға искір пирер ӱчӱн.

⁷⁸ Пістің Худайыбыс айаачы паза чағбан чӱректіг, нооза. Ол тигірдең арачыланыстығ таң чариин піске ысхан:

⁷⁹ Ӧлімнің харасхы кӧлегінде чуртапчатханнарны чарыдар ӱчӱн, азахтарыбысты амыр хоныхсар алдыра пастырар ӱчӱн.

⁸⁰ Пала ӧскен, хылии даа тыып одырған. Ол хуу чазыда Израиль чонының алнына сығар кӱнге теере полған.