Иоанн 1 - Наа Молҷағ

Иисус Христос – сын Сӧс

¹ Иң пастап Сӧс полған. Сӧс Худайнаң хада полған, Сӧс Худай полған.

² Сӧс Худайнаң хада пастабох полған.

³ Ол прай нимені чайаан, Ол чох пір дее ниме чайалбаан.

⁴ Сӧсте чуртас полған, чуртас, тізең, кізілернің чарии полған.

⁵ Чарых харасхыда чарыпча, харасхы, тізең, аны пір дее чаап полбаан.

Иисус Христос – сын Чарых

⁶ Худай пір кізіні ысхан. Аның ады Иоанн полған.

⁷ Ол, Чарыхтаңар киречілееніне киртінзіннер тіп, чонға Чарыхтаңар чоохтирға килген.

⁸ Ол позы Чарых полбаан, че Чарыхтаңар киречілирге килген.

⁹ Чир ӱстӱне тӧреен полған на кізіні чарытчатхан сын Чарых пар полған.

¹⁰ Сын Чарых чир ӱстӱнде полған, чир ӱстӱ Аннаң пастыра чайалған, че кізілер Аны таныбааннар.

¹¹ Ол Позының чонынзар килген, че олар Аны постарына чағын кирбееннер.

¹² Аны удурлаан паза Ағаа киртінген кізілерге Худайның палалары полҷаң оңдай пирілген.

¹³ Худай палалары олаңай паба-іҷедең не нимес, че Худайдаң тӧридірлер.

¹⁴ Сӧс, кізі пол парып, паарсасха паза сынға пай полып, піснең хада чуртаан. Піс Аның Пабазынаң алған сабланызын кӧргебіс. Ол сабланысты Пабазының чалғыс Оолғы полып алған.

Кіреске тӱзірҷең Иоанның киречілеені

¹⁵ Иоанн, Сӧстеңер киречілеп, хысхырып ала чоохтаан: – «Минің соомҷа Килчеткені, мин тӧреелеккеӧк пар полғаннаңар, миннең илбек» тіп чоохтаам Пу Кізідеңер.

¹⁶ Анда паарсас толдыра полғаннаңар, піс паарсасты ӱзігі чох алғабыс.

¹⁷ Моисей Чахиин піске Моисей, Худайдаң алып, пирген, че паарсаснаң сын сӧстерні Иисус Христос пирген нооза.

¹⁸ Худайны пір дее кізі хаҷан даа кӧрбеен. Пабазының иң чағыны, чалғыс Оолғы ла, кӧріп, Аннаңар піске, прай чоллап, искір пирген.

Иоанн позынаңар чоохтапча

¹⁹ Иудей пастыхтары Иоаннзар Иерусалимнең абыстарны паза левиттерні «Кемзің син, Мессий-Христоссың ма?» тіп сурарға ысханнар. –

²⁰ Мин Мессий-Христос нимеспін, – тіп, кӧні, хыйа полбин, нандырған Иоанн. –

²¹ Кемзің син? Илиязың ма? – сурғаннар олар. – Чох, – теен Иоанн. – Андағда ухаанҷызың ма? – Чох. –

²² Кемзің син андағда? – сурастырғлааннар олар. – Пісті ысхан кізілерге хайдағ нандырығ пирибіс? Позыңнаңар ниме чоохтап пирерзің?

²³ Иоанн Исаий ухаанҷының пічиинде пазылған сӧстернең нандырған: – Мин хуу чазыда «Хан Худайға кӧні чол ит пиріңер!» тіп хысхырчатхан кізінің ӱні осхаспын.

²⁴ Килген кізілернің аразында фарисейлер полғаннар. –

²⁵ Син, Мессий-Христос таа, Илия даа, ухаанҷы даа ниместе, ноға кізілерні кіреске тӱзірчезің? – тіп сурғаннар олар. –

²⁶ Мин суғда кіреске тӱзірчем, – нандырған Иоанн. – Че араңарда сірерге таныс нимес Кізі пар.

²⁷ Ол минің соомҷа килерге кирек, Ол, мин тӧреелеккеӧк, пар полғаннаңар, Аның маймааның паан даа систерге турыстығ нимеспін.

²⁸ Пу чоох Вифавара саарда полған. Пу саар Иоанн кіреске тӱзірчеткен Иордан суғның іскеркі саринда турған.

Иисус – Худай Хурағаны

²⁹ Пазағы кӱнде Иоанн, позынзар килчеткен Иисусты кӧр салып, кізілерге теен: – Мына Худай Хурағаны. Чир ӱстӱндегі прай кізілернің чазыхтарын Позына алып алчатхан Хураған.

³⁰ Мин ол Хурағаннаңар піди чоохтаан полғам: «Минің соомҷа Ирен килче. Ол, мин тӧреелеккеӧк, пар полғаннаңар, миннең илбек».

³¹ Израиль кізілері Аны пілзіннер тіп, чонны кіреске тӱзірерге килгем. Че мин дее Аның кем полчатханын пілбеем.

³² Иоанн ідӧк киречілеен: – Мин Худай Худының, тахырах хус чіли, тигірдең кӧні тӱс киліп, Ағаа одырыбысханын кӧргем.

³³ Мин Аның кем полчатханын пілбеем, че Худай, мині кізілерні суғда кіреске тӱзірерге ызып, теен: «Тигірдең тӱсчеткен Хут Кемде тохтир, Ол, Худай Худын пиріп, пасха оңдайнаң кіреске тӱзірчеткен Кізі полар».

³⁴ Мин, Худай Худының тӱсчеткенін кӧріп, Аның Худай Оолғы полчатханын киречілеем.

Иисус пастағы ӱгренҷілерін хығырча

³⁵ Пазағы кӱнде Иоанн ікі ӱгренҷізінең хада олох орында турған.

³⁶ Ирт париған Иисусты кӧріп, Иоанн теен: – Мына Худай Хурағаны.

³⁷ Ол сӧстерні истіп, ікі ӱгренҷі Иисустың соонҷа пар сыххан.

³⁸ Иисус, хайбағынып, Позының соонҷа килчеткеннерні кӧр салып, сурған: – Ниме кирек сірерге? – Равви (пу «Ӱгретчі» теені полча), Син хайда чуртапчазың? – сурғаннар олар. –

³⁹ Парааңар, постарың кӧрерзер, – нандырған Иисус. Иирзер, он час тузында, ӱгренҷілері, Аннаң хада парып, хайда чуртапчатханын кӧріп алып, иир тооза анда полғаннар.

⁴⁰ Иисустың соонҷа парчатхан ікі ӱгренҷінің пірсі Симон-Пётрның харындазы Андрей полған.

^41-42 Ол, сах андох Симон харындазына тоғазып «Піс кізілер сағыпчатхан Мессийні (пу «Христосты» теені полча) таап алдыбыс» тіп, аны Иисуссар ағыл килген. Иисус, Симонны кӧріп, теен: – Син, Симон, Ионаның оолғы, Кифа (пу грек тілінде Пётр полча) тіп адаларзың.

⁴³ Пазағы кӱнде Иисус Галилей чирінзер парарға сағыныбысхан. Ол, Филиппке тоғазып, теен: – Минің соомҷа пар.

⁴⁴ Филипп тее Андрейнең Пётр харындастар чуртапчатхан Вифсаида саардаң полған.

⁴⁵ Филипп, Нафанаилге тоғазып, чоохтанған: – Піс Моисей Чахиинда паза ухаанҷыларның пічиинде пазылған Кізіні таап алғабыс. Ол Назареттегі Иосифтің оолғы Иисус. –

⁴⁶ Назареттең пірее чахсы ниме полар ба? – теен Нафанаил. – Пар, кӧріп ал, – нандырча Филипп. –

⁴⁷ Мына Израиль адын ал чӧрерге турыстығ, чойырхос нимес кізі, – чоохтанча Иисус, Позынзар килчеткен Нафанаилні кӧр салып. –

⁴⁸ Мині хайдаң пілчезің? – сурча Нафанаил. – Филипп сині хығырар алнындох, Мин сині смоковница ағазының хыринда кӧргем, – нандырған Иисус. –

⁴⁹ Ӱгретчі! Син – Худай Оолғызың, Син – Израиль Ханызың! – хысхырған Нафанаил. –

⁵⁰ Мин, сині смоковница ағазының хыринда кӧргем тіп, чоохтаанымнаңар, син киртінчезің. Син аннаң даа артых ниме кӧрерзің, – нандырған Иисус.

⁵¹ Аннаң андар хосхан: – Сынны чоохтапчам сірерге, пу тустаң сығара тигірнің азылчатханын паза Худай ангеллерінің, Кізі Оолғынзар тӱзіп, нандыра тигірзер ӧӧрлепчеткеннерін кӧрерзер.