Илҷілернің 8 - Наа Молҷағ

Киртінчеткеннерні сӱргені

¹ Савл Стефанны ӧдіргеннеріне чӧпсінген. Олох кӱннерде Иерусалимдегі тигіриб чоны хатығ сӱргінге хаптырт сыххан. Илҷілердең пасха прайзы даа Иудейнің паза Самарның аймах-пасха чирлеріне тарап чӧрібіскен.

² Худай кибірліг кізілер, Стефанны чыып салып, ағаа ачығ сыхтааннар.

³ Савл, тізең, тигіриб чонын сайбаан; турадаң тураа кіріп, иреннернең ипчілерні хаап, харибге чаптыр салып одырған.

Самар чирінде Чахсы Хабарға ӱгреткені

⁴ Олох арада тари парыбысханнары, анда-мында чӧріп, Чахсы Хабарға ӱгреткеннер.

⁵ Іди Филипп, Самардағы пір саарзар киліп, андағыларға Христостаңар искірген.

⁶ Чон, Филипп итчеткен хайхастарны кӧріп, истіп, аның чооғын тыңнаан.

⁷ Чабал хуттар кӧп кізідең аах-уух тӱзіп ала сығара чачырааннар, пас чӧр полбинчатхан паза ахсах кӧп кізі хазыхтан пар турған.

⁸ Ол саарда улуғ ӧрініс полған.

⁹ Олох саарда, алында сыбырағҷы полып, позын илбек кізі чіли кӧзідіп, Самардағы чонны таңнатчатхан Симон тіп аттығ пір кізі чуртаан.

¹⁰ Анда Худай пирген илбек кӱс пар тіп, аны прай улуғ-кічіг чон сиргек исчең.

¹¹ Ол илееде тус, кізі сыбырап, оларны хайхатхан, аннаңар аны исчеңнер.

¹² Че хаҷан чон Худай хан-ӱлгӱзінеңер паза Иисус Христостаңар Чахсы Хабар искір пирчеткен Филиппке киртін парғанда, иреннер дее, ипчілер дее кіреске тӱскеннер.

¹³ Симон позы, даа ағаа киртін парып, кіреске тӱзіп, Филипптең хыйа парбин, аның итчеткен илбек хайхастарын паза танығларын кӧріп, тың хайхаан.

¹⁴ Иерусалимдегі илҷілер, Самар чиріндегілернің Худай сӧзін чӱректеріне киргеннерін истіп, оларзар Пётрнаң Иоанны ысханнар.

¹⁵ Олар, киліп, андағы чонға Худай Худы кірзін тіп, оларның ӱчӱн пазырғаннар.

¹⁶ Олар Иисус Хан-пигнің адынаң кіреске тӱскен не полғаннар, че оларның пірдеезіне Худай Худы ам даа кіргелек полған.

¹⁷ Андада Пётрнаң Иоанн андағы кізілерзер холларын салғаннар, олар, тізең, Худай Худын алғаннар.

¹⁸ Симон, тізең, илҷілернің салған холлары пастыра Худай Худы пирілчеткенін кӧріп, оларға ахча ағыл пирген. –

¹⁹ Минің салған холым пастыра кізее Худай Худы кір пар турар ӱчӱн, Мағаа даа андағ кӱс пиріңер, – теен ол.

²⁰ Че Пётр ағаа нандырған: – Худайның сыйиин ахчаа алып аларға иткенің ӱчӱн, ағылған кӱмӱзің дее, син дее чох пол парыңар!

²¹ Сағаа мында андағ оңдай паза ӱлӱс пирілбес, Худайның алнында синің чӱреең ам даа орта нимес.

²² Аннаңар, пу чазығың ӱчӱн пыросынып, Хан-пиге пазыр: арса, Ол пу чӱрееңнең сыххан сағызыңның пырозын тастир.

²³ Кӧрчем мин, син істіңе толдыра чайыл парған ачығ ӧӧдіңнең хадазың паза чойланыс холындазың. –

²⁴ Сірер дее, чоохтаан нимелеріңнің пірдеезі мағаа тӱспезін тіп, миннең ӱчӱн Хан Худайға пазырыңар, – нандырған Симон.

²⁵ Илҷілер, Хан Худай сӧзін киречілеп, кізілерні ӱгредіп, анаң Иерусалимзер нандыра парчадып, Самар чиріндегі аалларда Чахсы Хабардаңар ӱгреткеннер.

Филипп паза эфиоп кізі

²⁶ Филиппке, тізең, Хан Худай ангелі теен: – Турып, Иерусалимнең Газа саарзар парчатхан кізі чӧрбес чолзар кӱнӧрте сых.

²⁷ Филипп, турып, андар парған, чолда ағаа эфиоп евнух тоғас парған. Ол, Иерусалимзер пазырарға килген кізі, Эфиоп хан ипчінің улуғ пастығы паза аның прай ис-пайын хайраллапчатхан кізізі,

²⁸ ікі тегілектіг хаңаада одырып алып, ухаанҷы Исаийнің киндезін хығырып ала, нандыра айланчатхан.

²⁹ Худай Худы Филиппке теен: «Чағын пас парып, ол хаңаанаң хости пас пар».

³⁰ Филипп, чағын пас киліп, ол кізінің Исаийнің ухаан чоохтарын хығырчатханын истіп, сурған: – Сірер оңар полчазар ба хығырчатхан нимені? –

³¹ Пірдеезі чарыда чоохтап пирбеенде, хайди піліп аларбын? – нандырған ол кізі. Анаң Филипптең хости одырыбызарға сурынған.

³² Ол Худай Пічиинде хығырчатхан орын, тізең, мындағ полған: Аны, хойны чіли, ӧлімге апарғаннар. Хырыхчатхан кізінің алнында хураған хайдағ табыс-тубыс чох поладыр, Ол ідӧк ахсын пір дее аспаан.

³³ Аның чарғызы, Аны нимее салбин, иділген. Че Аның тӧллерін кізі чоохтап полар ба ни? Аның чир ӱстӱндегі чуртазы тоозыл парды нооза.

³⁴ Евнух Филиппсер айланған: – Синнең сурынчам, чоохтап пир мағаа, кемнеңер іди пасча ухаанҷы? Позынаңар ба алай пірее пасха кізідеңер бе?

³⁵ Филипп андада, пу хығырған киндеде пазылған нимелердең пасти, Иисустаңар Чахсы Хабарны искір пирген.

³⁶ Іди олар, чолларын узарадып, суға чит килгеннер. Андада евнух теен: – Мына суғ, мағаа кіреске тӱзерге ниме харығ полча? –

³⁷ Прай чӱрееңернең киртінчетсеңер, кіреске тӱзерге чарир, – нандырған ағаа Филипп. – Иисус Христостың Худай Оолғы полчатханына киртінчем, – нандырған ағаа анзы.

³⁸ Анаң, хаңаазын тохтадыбызарға чахыбызып, олар ікізінең суға кірібіскеннер. Филипп евнухты кіреске тӱзірген.

³⁹ Олар суғдаң сых килгеннерінде, евнухсар Худай Худы тӱскен. Филиппті, тізең, Хан Худай ангелі ал чӧрібіскен. Че евнух аны паза кӧрбеен, ол аннаң андар ӧрчіліг парған.

⁴⁰ Филипп, тізең, Азот саарда пол парған. Мында паза пасха даа саарларда ол Чахсы Хабардаңар чоохтап чӧрген. Іди ол Кесар саарзар чит килген.