Илҷілернің 4 - Наа Молҷағ

Илҷілерні харибге чапханы

¹ Пётрнаң Иоанн кізілерні ӱгретчеткен туста оларзар абыстар, храмдағы хадағҷылар пастығы паза саддукейлер пас килгеннер.

² Олар илҷілернің чонны ӱгретчеткеннеріне паза, Иисузох чіли, ӧліглер тірілердеңер чоохтап чӧрчеткеннеріне хылыхтанғаннар.

³ Анаң илҷілерні тудып алғаннар, че иир полғаннаңар, иртенге теере харибге чаап салғаннар.

⁴ Че ол чоохты искеннернің аразында кӧп кізі киртініп пастаан. Андағ кізілернің саны пис муңа чағын полған.

⁵ Пазағы кӱн оларның пастыхтары, ах сағаллар паза Моисей Чахии пілігҷілері Иерусалимзер парарға тыхтан сыхханнар.

⁶ Анна улуғ абыс, паза Кайафа, Иоанн, Александр паза олардаң даа пасха улуғ абыстар сӧӧгінең сыхханнар даа анда полғаннар.

⁷ Пётрнаң Иоанны постарының алнында турғызып алып, сурғаннар: – Хайдағ кӱснең алай кемнің адынаң сірер анзын иттіңер?

Пётрның Ӧӧркі Чарғыдағы чооғы

⁸ Андада Пётр, Худай Худынаң тол чӧрібізіп, оларға теен: – Чон пастыхтары паза Израильнің ах сағаллары!

⁹ Ағырығ кізее чахсы иткенібіс ӱчӱн паза аның хазыхтанып алған оңдайы ӱчӱн нандырығ киректепчетсеңер,

¹⁰ піліңер, прай Израиль чоны даа пілзін: Назареттең сыххан Иисус Христостың адынаң имнедібіс. Сірерге кіреске хазадып ӧдірткен, анаң Худайға ӧлімнең тірілдірткен Иисус аны, хазых идіп, азахха турғысты.

¹¹ Иисус сірерге, пӱдірігҷілерге, нимее салдыртпин, хыйа тастатхан, че соонаң тура пулиин тударға иң кирек пол парған тас полча. Арачыланыс Аннаң пасха пірдеезінде чоғыл. –

¹² Кізілерге, позыбысты арачыланарыбыс ӱчӱн, пу чир ӱстӱнде Аннаң пасха пірдеезінің ады адалбаан.

Пётрнаң Иоанны позытханнары

¹³ Пётрнаң Иоанның махачы тудынчатханнарын кӧріп, оларның, пічікчіл нимес, олаңай кізілер полчатханнарын сизініп, таңнааннар. Олох туста оларда Иисуснаң хада полған кізілерні танааннар.

¹⁴ Имненіп алған пас чӧр полбаҷаң кізі оларнаң хада турғаннаңар, пір дее ниме тоғыр чоохтан полбааннар.

¹⁵ Анаң, илҷілерге Ӧӧркі Чарғыдаң сығыңар тіп, олар постары алынҷа чоохтас сыхханнар: –

¹⁶ Хайди идеелер пу кізілерні? Оларның кӧріндіре иде хайхас иткеннерін, Иерусалимде чуртапчатханнарның прайзы пілче. Піс андағ ниме полбаан тіп полбаспыс.

¹⁷ Че анзы чон аразында аннаң андар тарабас ӱчӱн, оларны, хатығлап, Иисустың адынаң пір дее кізінең чоохтаспазыннар тіп, хызаннап салааңар.

¹⁸ Анаң, илҷілерні хығыртыбызып, мыннаң мындар Иисустың адынаң чоохтанып, ӱгрет чӧрбеске чахығ пиргеннер.

¹⁹ Че Пётрнаң Иоанн, оларға нандырып, тееннер: – Постарың пӧгіңер, Худайның алнында хайзы орта полар: Худайның чооғын искені бе, алай сірерні искені?

²⁰ Піс позыбыс кӧрген паза искен нимелердеңер чоохтабин пол полбинчабыс.

²¹ Ӧӧркі Чарғыдағылар оларны, кізілер кӧзіне хатығлирға тідінмин, хызаннап ла алып, позыдыбысханнар. Прай чон полған ниме ӱчӱн Худайны сабландырған нооза.

²² Хайхастығ имнегнең хазыхтанып алған кізее хырых азыра час полған.

Ӧрініс паза тигірибде пазырғаны

²³ Илҷілер, позып алғандох, пос кізілерінзер киліп, улуғ абыстарнаң ах сағаллар постарына ниме тееннерін чоохтап пиргеннер.

²⁴ Олар, тізең, илҷілерні истіп алып, прайлары хада Худайзар айланып, чоохтанғаннар: – Тигірнең чирні паза талайны, ідӧк олардағы прай нимелерні чайаан Ээзібіс Худай!

²⁵ Син пістің ӧбекебіс паза Позыңның нымысчың Давидтең пастыра Худай Худынаң чоохтаазың: «Ноға пасха худайлығ чоннар хорылысчалар, ноға чоннар тик нимені сағын чӧрчелер?

²⁶ Хан Худайдаң паза Аның Мессийінең тоғыр чир ӱстӱндегі ханнар кӧдірілгеннер, паза кнестер піріге чыылысханнар». –

²⁷ Сынап таа, Ирод паза Понтий Пилат, Израиль чонынаң паза иудей ниместернең хада ол саарда чыылызып, Иисустаң, Синің Мессийге таллап алған Ах-арығ Нымысчыңнаң тоғыр полғаннар.

²⁸ Олар холыңнаң кӧңнің азынада пӧгін салған нимелернің прайзын идібізерге чыылысханнар.

²⁹ Че сағам, Хан Худай, истек оларның хыҷанчатханнарын, нымысчыларыңа, тізең, Сӧзіңнеңер туртухпин чоохтирға чарат.

³⁰ Син, тізең, Иисустың, Ах-арығ Нымысчының, адынаң кізілерні имнирге паза танығларнаң хайхастар идерге холыңны алнынзар сун.

³¹ Олар пазырарын тоос салғаннарындох, чыылысхан чир чайхала тӱскен. Прайзы, Худай Худынаң тол чӧрібізіп, Худай сӧзін туртухпин чоохтап сыххан.

Ис-пайны ӱлезіп тузаланғаны

³² Худайға киртінгеннер пос аразында пір чӱректіг паза пір сағыстығ пол парғаннар. Пірдеезі позының ис-пайына «мини» тібеҷең, че пар ниме прайзыни полған.

³³ Илҷілер, тізең, илбек кӱснең Хан-пиг Иисус Христостың тіріл килгенінеңер киречілееннер. Илбек паарсас оларда прайзында полған.

³⁴ Оларның аразында пір дее хызылчатхан кізі чох полған. Чирлері алай туралары пар кізілер, оларны садып, ахчаларын, ағыл киліп,

³⁵ Илҷілернің азахтарынзар сал пирҷеңнер; полған на кізее кирексеен синде пирілҷең.

³⁶ Іди Иосий, Кипр олтырыхтаң сыххан паза илҷілерге Варнава тіп солалатхан (анзы «Часхарыс оолғы» теені полча) левит,

³⁷ Позының чирін садыбызып, ахчазын, ағыл киліп, илҷілернің азахтарынзар сал пирген.