Илҷілернің 28 - Наа Молҷағ

Павелнің Мелит олтырыхта хыстааны

¹ Арачылан халып, піс олтырыхтың Мелит тіп адалчатханын піліп алғабыс.

² Мындағы кізілер піске уғаа чалахай хайғаннар. Наңмыр чаап, соох полчатханнаңар, олар пісті кӧйчеткен от хазынзар чылынарға хығырғаннар.

³ Павел, хуруғ сырыптар илееде чыып алып, оларны отха салчатханда, оттаң чылан сығара сойлап килбинең, аның холына чапсыныбысхан.

⁴ Олтырых чоны, аның холында салбаңнапчатхан чыланны кӧр салып, чоохтасхан: – Пу кізі – кізі ӧдірген осхас. Талай салғахтарынаң арачылан халған даа полза, Худай чарғызы пазох ағаа ӧлім ысча.

⁵ Че Павел ол чыланны отха тастабысхан. Позы, тізең, пір дее хайтпаан.

⁶ Олар Павелнің сіс сығарын алай кинетін ӧліг тӱс парарын сағааннар. Че илееде ӱр сағып, Павелнің пір дее хайди полбаанын кӧріп, олар Павелдеңер пасха сағын сыхханнар паза, ол худай полтыр тіп, чоохтасханнар.

⁷ Ол орынның хыринда олтырых пастығы Публий тіп кізінің чирлері полған. Ол пісті, позынзар хығырып, ӱс кӱн, паарсап, ааллатхан.

⁸ Публийнің пабазы, тудан паза істі ағыриинаң ирееленіп, тӧзекте чатхан. Павел андар пас киліп, пазырып алған, анаң холларын андар салып, имнебіскен.

⁹ Аның соонда олтырыхтағы пасха даа ағырығ кізілер Павелзер киліп, имненіп алҷаңнар.

¹⁰ Аннаңар олтырыхтағы кізілер пісті матап алғыстааннар. Чорыхха сыхчатханда, піске чолға кирек прай нимелерні пиргеннер.

Павелнің Римзер килгені

¹¹ Ӱс ай пазынаң піс ол олтырыхта хыстаан «Ікіс худайлар» тіп Александр саарның керібіне одырыбысхабыс.

¹² Іди піс, Сиракуз саарға чит киліп, анда ӱс кӱн полғабыс.

¹³ Аннаң сығып, Ригий саарға читкебіс. Пір кӱн пазынаң ӱстӱнзархы чил саап сыхханда, ікінҷі кӱнінде Путеол саарға читкебіс.

¹⁴ Мында пізӧк чіли киртінчеткен кізілерге тоғазып, оларның сурынызынаң анда читі кӱн пол салғабыс, соонаң Римзер парғабыс.

¹⁵ Андағы харындастар, пістеңер ис салып, пісті Аппий Форумы аалда паза Ӱс Хоных Туразы тіп аал хыринда удурлааннар. Оларны кӧр салып, Павел Худайны алғыстаан, кӧңні, тізең, чарып парған.

Павелнің Римде ӱгреткені

¹⁶ Іди піс Римге читкенде, чӱспазы чабығдағы кізілерні чааҷылар пастығына пирібіскен. Павелге, тізең, позын хадарчатхан чааҷынаң хада алынҷа чуртирға чарадылған.

¹⁷ Ӱс кӱн пазынаң Павел мындағы иудейлернің иң улуғлапчатхан кізілерін чыып алған. Олар чыылыс килгенде, чоохтанған: – Харындастар! Пістің чонның паза ӧбекелерібістің кибірлерінең тоғыр ниме итпеен дее ползам, мині Иерусалимде харибге одыртып, Рим кізілерінің холына пирібіскеннер.

¹⁸ Олар мині, чарғылап, ӧлімге турызар пір дее пыро чохта, позыдыбызарға сағынғаннар.

¹⁹ Че иудейлер тоғырлан сыхханнарында, мин ирік чохта Рим хағанының чарғызынаңар сурынғам. Итсе-де, мин позымның чонын пір дее ниме ӱчӱн пыролирға сағынминчам.

²⁰ Ол сылтағнаң мин сірерні, тоғазып, чоохтазып аларға тіп хығырдым. Израиль ізенізінің ӱчӱн мині пу пағда тутчалар. –

²¹ Піс синнеңер Иудей чирінең пір дее пічік албаабыс, – нандырғаннар олар, – андартын килчеткен харындастар синнеңер пір дее ниме искірбееннер, хомай даа ниме чоохтабааннар.

²² Итсе-де піс ниме сағынчатханыңны синнең истіп аларға хынчабыс. Син апарчатхан ӱгредігдеңер прай чирде таласчатханнарын піс пілчебіс.

²³ Анаң чоохтас салған кӱнде Павел чуртапчатхан хоных-туразынзар уғаа кӧп кізі килген. Павел оларға иртеннең иирге теере Худай хан-ӱлгӱзінеңер ӱгредігні искірген паза Моисей Чахиина, ідӧк ухаанҷылар пічіктеріне тӧстеніп, оларны Иисусха киртіндірерге кӱстенген.

²⁴ Піреелері аның сӧстеріне киртінгеннер, пасхалары, тізең, киртінминчеткеннер.

²⁵ Олар, пос аразында чараспин, сых париғаннарында, Павел оларға ам даа пір ниме хоза чоохтаныбысхан: – Худай Худы пістің ӧбекелерібіске Исаий ухаанҷы пастыра чахсы чоохтаан полған:

²⁶ «Пу чонзар парып, чоохтап пир: хулахнаң истіп, піл полбассар, харахнаң кӧріп, кӧр таппассар.

²⁷ Пу кізілернің чӱректері хатығ пол парғаннар, хулахтарынаң даа сала-сула исчелер, харахтарын, тізең, нуубысханнар. Андағ полбаан полза, оларның харахтары кӧрерҷіктер, хулахтары истерҷіктер, чӱректері піл поларҷыхтар постары Минзер айланарҷыхтар, Мин, тізең, оларны имнебізерҷікпін». –

²⁸ Амды сірер піліңер, Худай пасха даа чоннарға арачыланыс ысхан. Олар истерлер.

²⁹ Павел іди теенде, иудейлер, пос-алынҷа хазыр талазып ала, сых чӧрібіскеннер.

³⁰ Іди Павел Римде, позына алынҷа тура тудып, ікі чыл чуртаан паза позынзар килчеткен прай кізілернең тоғас турған.

³¹ Ол чалтанмин, Худай хан-ӱлгӱзінеңер ӱгредіп, Иисус Христос Хан-пигібістеңер чоохтаан. Ағаа пір дее кізі харығ полбаан.