Илҷілернің 26 - Наа Молҷағ

Павелнің Агрипп ханның алнында арачыланғаны

¹ Агрипп Павелге теен: – Сағаа позыңның ӱчӱн чоохтанарға чарадылча. Андада Павел, холын кӧдіріп, позын арачылап чоохтан сыххан: –

² Агрипп хан! Иудейлерге пыролатчатхан прай ниме ӱчӱн синің алныңда ахтанарға оңдай пирілгеніне, мин позымны часкалығ кізее санапчам.

³ Ағаа хоза, син иудейлернің кибірлерін паза таластығ сағыстарын прай пілчезің. Аннаңар прай чахсы кӧңніңнең мині истіп ал тіп, сурынчам.

⁴ Минің чуртазымны, чииттең сығара позымның чоным аразында чуртаанымны, соонаң Иерусалимде чуртаанымны прай иудейлер пілчелер.

⁵ Олар мині хаҷаннаңох сығара пілчелер, хынзалар, минің фарисей полып, пістің киртіністің кибірін хатығ тудып чуртааныма даа киречі поларлар.

⁶ Ам даа мин, Худайның пістің ӧбекелерібіске пирген сӧзінің толарына ізенчеткенім ӱчӱн, чарғы алнында турчам.

⁷ Пістің он ікі сӧӧгібістің кізілері, Худайға хараа-кӱнӧрте матап пазырып, Аның сӧзінің толарын кӧріп аларға ізенчелер. Ана пу ізеніс ӱчӱн, Агрипп хан, мині иудейлер пыролапчалар.

⁸ Ноға сірер Худайның ӧліглерні тірілдірчеткеніне киртінминчезер?

⁹ Итсе-де мин дее Назареттең сыххан Иисустың адынаң тоғыр пар-чох кӱснең кӱрезерге кирек тіп сағынҷаң полғам.

¹⁰ Мин Иерусалимде іди иткем. Улуғ абыстардаң алған ӱлгӱ хоостыра мин кӧп ах-арығ кізілер харибге чапхам. Оларны ӧдірчетселер, мин анзына ӱн пирҷеңмін.

¹¹ Мин кӧп хати оларны прай синагогаларҷа иреелеп ала ал чӧріп, Иисусты хырызарға кӱстеҷеңмін, оларға иртіре чабалланҷаңмын, паза оларны пасха даа чирлердегі саарларынҷа сӱр чӧрҷеңмін.

¹² Аныңох ӱчӱн мин, улуғ абыстардаң ӱлгӱ паза чахығ алып, Дамаск саарзар парчатхам.

¹³ Іди кӱнӧрте чолҷа парчадып, Фест пигім, мин кӱн чариинаң даа артых чарыхтың тигірдең чарыпчатханын кӧр салғам. Ол чарых мині паза миннең хада парчатхан кізілерні чарыдыбысхан.

¹⁴ Піс прайзыбыс чирге тӱс парғабыс. Анаң мин еврей тілінең мағаа чоохтанчатхан ӱнні ис салғам: «Савл, Савл! Ноға син Мині сӱрчезің? Сидік сағаа Миннең тоғыр кӱрезерге».

¹⁵ «Кемзер сірер, Хан-пигім?» – теем мин. Ол мағаа нандырған: «Мин, син хыйа сӱрчеткен Иисуспын.

¹⁶ Че тур, азахтарыңа тур. Сині Позымның нымысчым идіп аларым ӱчӱн, син кӧрген ниме паза Минің сағаа ас пирер нимеме киречі идіп аларым ӱчӱн, Мин синің харааңа кӧріндім.

¹⁷ Амды мин сині пасха чоннарзар ысчам, позым сині олардаң паза иудей чонынаң арачылирбын.

¹⁸ Син оларға харахтарын ас пирерге кирексің: харасхыдаң чарыхсар, сайтан ӱлгӱзінең Худайзар айланар иде, Мағаа киртініп, чазыхтарынаң позып алар иде, паза Минің таллап алған кізілерімнің аразында орын алар иде».

¹⁹ Аннаңар мин, Агрипп хан, тигірдең тӱскен кӧспекке тоғырланмаам.

²⁰ Мин пастап Дамаск саарның чуртағҷыларын, анаң Иерусалимнің чуртағҷыларын, анаң прай Иудей чиріндегілерні, анаң иудей ниместерні, чазыхтарынаң хыйа полып, Худайзар айланзыннар паза пыросынысха турыстығ киректер итсіннер тіп ӱгреткем.

²¹ Аның ӱчӱн иудейлер мині, храмда хаап алып, ыра-чара тарт саларға иткеннер.

²² Пӱӱнгі кӱнге теере Худай мағаа полысхан. Мин, турып, мындағ ниме поларынаңар ухаанҷыларның паза Моисейнің чоохтааннарынаң артых пір дее ниме чоохтабин, улуғ-кічіге киречілепчем:

²³ Иудейлерге паза пасха чоннарға арачыланыстаңар чарыхты искірер ӱчӱн, Мессий ирееленіп ӧл парғаннарның аразында тірілгеннернің пастағызы полған.

Фесттің паза Агрипптің чоохтанғаннары

²⁴ Павел іди арачыланчатханда, Фест хысхыра тӱскен: – Павел, син алаахчазың! Улуғ ӱгредииң синің сағызыңны ардатча. –

²⁵ Чох, аарлығ Фест, – нандырған Павел, – мин алаахпинчам. Мин хыйға паза сын сӧстерні чоохтапчам.

²⁶ Аннаңар хан пілче, мин аның алнында чалтанмин чоохтанчам. Пу полған нимелердеңер аның пілбинчеткеніне мин киртінминчем. Олар хайда-да чазытта иділбееннер.

²⁷ Агрипп хан, ухаанҷыларға киртінчезің ме? Пілчем, киртінчезің. –

²⁸ Пу хысхаҷах тус аразына син мині христианға айландырыбызарға сағынчазың ма? – теен Павелге Агрипп. –

²⁹ Син не нимес, че пӱӱн мині исчеткен пасха даа кізілер ӱр бе, ас па тус аразына минӧк осхас пол парҷаң ползалар тіп, мин Худайға пазырчам. Мин чіли пағда ла полбазыннар, – нандырған Павел.

³⁰ Ол іди чоохтанғанда, Агрипп, Фест, Вереник паза одырчатхан пасха даа кізілер тур килгеннер.

³¹ Оортах парып, пос аразында, пу кізі ӧлімге чарғылатчаң алай харибге одыртчаң пір дее ниме итпиндір тіп, чоохтасханнар. –

³² Пу кізіні, ол хағанның чарғызына парарға кӱстенмеен полза, позыдыбызарға даа чарирҷых, – теен Фестке Агрипп. Аннаңар Фест Павелні хағанзар ызыбызарға чаратхан.