Илҷілернің 19 - Наа Молҷағ

Павелнің Ефесте полғаны

¹ Аполлос Коринф саарда полчатхан туста, Павел, ортызынзархы чирлерҷе иртіп, Ефес саарзар чит килген. Анда хай пірее ӱгренҷілерні таап алып,

² олардаң сурған: – Сірер, киртін сығып, Худай Худын алғазар ба? – Піс Худай Худынаңар испеебіс тее, – нандырғаннар олар ағаа. –

³ Хайдағ ниме пастыра сірер кіреске тӱскезер? – пазох сурған олардаң Павел. – Иоанның кіреске тӱзіргенінең, – нандырғаннар олар. –

⁴ Иоанн кізілерні чазыхтарынаң хыйа ползыннар тіп кіреске тӱзірген. Ол позының соонҷа килчеткеніне, Иисус Христосха, киртінерге хығырған, – теен Павел.

⁵ Аны истіп, ӱгренҷілер Иисус Хан-пигнің адынаң кіреске тӱскеннер.

⁶ Анаң Павел оларзар холларын салғанда, оларға Худай Худы тӱскен. Ӱгренҷілер ухаанҷылааннар паза аймах-пасха тіллернең чоохтан сыхханнар.

⁷ Оларның прайзы он ікіҷе кізі полған.

⁸ Павел, синагогазар киліп, кізілернең чоохтазып, Худай хан-ӱлгӱзінеңер киртістіг иде ӱс айҷа чалтанмин ӱгреткен.

⁹ Че хай пірее кізілер, ағаа тарынып, киртінмин, кізілер кӧзіне Хан Худай чолын сӧклееннер. Андада Павел, киртінчеткен ӱгренҷілерін чарып алып, Тиранн тіп кізінің ӱгредіг туразында кӱннің сай ӱгрет турған.

¹⁰ Іди ікі чылҷа полған. Аннаңар Асий чирінің прай даа кізілері, иудейлер дее, гректер дее, Иисус Хан-пигдеңер ӱгредігні искеннер.

Скеваның ооллары

¹¹ Худай Павелнің холынаң илееде хайхастар иткен.

¹² Ағырығ кізілерзер аннаң ал халған хол платтарын алай ба хурларны салып, ағырығларын тохтатчаңнар, чабал хуттар даа олардаң сых парыбыс турҷаңнар.

¹³ Пір орында чуртабинчатхан иудей сыбырағҷылары даа Иисус Хан-пигнің адынаң чабал хуттар кірген кізілерні имнирінде тузалан кӧрҷеңнер. – Сірерні Павел ӱгретчеткен Иисустың адынаң сыбырапчабыс, – чоохтанҷаңнар олар.

¹⁴ Андағ нимені иудейлернің улуғ абызы полчатхан Скеваның читі оолғы итчең.

¹⁵ Че чабал хут оларға піди нандырған: – Иисусты пілчем, Павел дее мағаа таныс, че сірер чи кемзер?

¹⁶ Анаң чабал хутха хаптырған кізі, оларға атығып, тыыныбызып, кӱснең оларны асхан, анзылары, тізең, ол турадаң, кип-азах чох паза чоо сохтыр салып, сығара хонғаннар.

¹⁷ Пу тылаас Ефес саарда чуртапчатхан прай даа иудейлер паза гректер аразында тарап парған. Прайзы хорыхханнарына Иисус Хан-пигнің адын сабландырған.

¹⁸ Киртін парғаннарның кӧбізі, тізең, Павелзер киліп, постарынаңар паза иткен чазыхтарынаңар кӧні чоохтааннар.

¹⁹ Сыбырағҷы киреенең айғасхан кізілернің кӧбізі, постарының пічіктерін чыып алып, оларны кізілер кӧзіне ӧртеен. Ол пічіктернің турчатхан паазын санабысханда, иліг муң кӱмӱс ахчаа чит партыр.

²⁰ Ана іди, кӱс алынып, тарап сыххан Хан Худай сӧзі.

²¹ Ол киректер соонда Павел, Македон паза Ахай чирлерінҷе иртерге паза Иерусалимге чидерге пӧгін тудып, чоохтанған: – Анда полып алып, мағаа Римні дее кӧріп аларға кирек.

²² Анаң ол, позына полысчатхан Тимофейнең Ерастты Македон чирінзер ызыбызып, позы ӱр нимеске Асий чирінде хала парған.

Ефестегі хорылыс

²³ Ол тустарда Хан Худай чолынаң тоғыр илееде кӧп кізі кӧдірілген.

²⁴ Кӱмӱс киреенең айғасчатхан ус кізі Димитрий, Артемиданың кӱмӱс храмыҷахтарын итчеткен ус, чонға паза хоосчыларға илееде кӧп парыс ағылҷаң полған.

²⁵ Ол, хоосчыларны паза пасха даа андағох ус чонны чыып алып, теен: – Арғыстар! Сірер пілчезер, пу тоғыснаң палғалыстығ пістің ис-пайыбыс.

²⁶ Че сірер кӧртеечезер, истеечезер, пу Павелнің Ефес саарда ла нимес, че прай даа Асий чирінде, кізі холынаң иділген нимелерні худай ниместер тіп кізілерге киртіністіг чоохтан чӧріп, кӧп кізіні тискерлендірчеткенін.

²⁷ Мынзы, тізең, узыбыстың на нимес, че улуғ худайыбыс Артемиданың храмының пір дее нимее салылбазынаң хорғыстығ. Прай Асий чирінде паза прай чир-чалбахта улуғлалчатхан худайыбыстың аарлығ омазы хырыл халар.

²⁸ Пу нимені ис салып, оларның чабаллары тут килген. – Ефестегі Артемида илбек! – хысхырыс сыхханнар олар.

²⁹ Прай саар хорылысха пат парған. Павелнең хада чӧрчеткен македон кізілерін, Гаийнең Аристархты, хаап алып, прайзы пір саңай чыылығлар иртчеткен орынзар чӱгӱрізе халған.

³⁰ Павел ол кізілерзер удур сығарға иткенде, ӱгренҷілер аны позытпааннар.

³¹ Асий чирінің хай пірее пастыхтары даа, Павелге нанҷы полчатханнары, андар кізі ызып, чыылығда кӧрінмеске сурынғаннар.

³² Ол туста піреелері пір ниме, пасхалары, тізең, пасха ниме хысхырысханнар. Чыылығ оорли ла иртчеткен, мында чыылыс парғаннарның кӧбізі нимее чыылысханнарын даа пілбеен.

³³ Иудейлер постарының аразынаң Александрны сығара іткеннер. Кізілер аразынаң кем-де ағаа ниме идерге кирек полчатханын чоохтаан. Александр, холын кӧдіріп, кізілерге чоохтанарға иткен.

³⁴ Кізілер, аның иудей полчатханын піл салып, пір тиңе пірее ікі часча хысхырғаннар: – Ефестегі Артемида илбек!

³⁵ Андада саар пастыхтарының пірсі, кізілерні амырадып, теен: – Ефес кізілері! Кем пілбинче, Ефес саар илбек Артемида худайның паза тигірдең тӱскен ызых тастың нымысчы саары полчатханын?

³⁶ Мында тартысчаң ниме чох полза, андағда сірерге, амырап парып, кинен хылынмасха кирек.

³⁷ Сірер, тізең, пеер Артемида худайыңарны хомайлабаан даа, храмда даа пір дее ниме оғырлабаан кізілерні ағыл килгезер.

³⁸ Димитрий паза аннаң хада полчатхан хоосчылар кемні-де хоптирға сағынчатсалар, андағ нимее чарғылар паза пастыхтар пар: андар удур-тӧдір хоптаныссыннар.

³⁹ Че пірее пасха ниме кӧрглепчетсеңер, анзы ӱлгӱ-чахығ чыылиинда пӧгілер.

⁴⁰ Пісті, пол парған ниме ӱчӱн, кізілер, хорылыс кӧдірчезер тіп, пыролыбызарға даа айабастар. Пу хорылысты ахтир пістің пір дее сылтаабыс чоғыл.

⁴¹ Іди тіп, ол чыылған чонны позыдыбысхан.