Илҷілернің 16 - Наа Молҷағ

Павелге Тимофейнің хозылғаны

¹ Павел Дервий паза Листр саарларға читкен. Анда киртінчеткен иудей іҷеліг, грек пабалығ Тимофей ады-солалығ ӱгренҷі полған.

² Тимофейдеңер Листрдегі паза Икондағы харындастар чахсы чоохтанғаннар.

³ Павел аны позынаң хада алып аларға хынған, че андағы иудейлер Тимофейнің пабазы грек кізі полчатханын пілгеннер, аннаңар ол Тимофейге сӱннет иттірібіскен.

⁴ Іди олар, саардаң саарға чӧріп, анда киртінчеткен кізілерге Иерусалимдегі илҷілернің паза тигіриб ах сағалларының чарадығларын, чахығларын толдыр турардаңар чоохтап турғаннар.

⁵ Тигіриб чонының киртінізі тыып, аның саны кӱннің сай хозылғаннаң хозылған.

Павелнің хараана кӧрінген кӧспек

⁶ Хаҷан олар Фригий паза Галат чирлерін ирткеннерінде, Худай Худы оларны Асий чирінзер Худай сӧзінеңер искірерге позытпаан.

⁷ Мисий чирінзер чидіп, Вифиний чирінзер парарға иткеннер, че Хут оларны андар позытпаанох.

⁸ Мисий чирін иртіп, олар Троада саарға читкеннер.

⁹ Хараазын Павелнің кӧспегінде Македон чирінең пір кізі, алнында тура тӱзіп, сурынып ала теен: «Македон чирінзер киліп, піске полыс пир».

¹⁰ Аны кӧрген соонаң, Хан Худай пісті Чахсы Хабардаңар искірерге андар хығырча тіп сағына тартып, сах андох Македон чирінзер парарға тимненібіскебіс.

Павелнің Филипп саарда ӱгреткені

¹¹ Іди, Троада саардаң сығып, піс Самофракий олтырыхсар кӧні читкебіс, пазағы кӱнінде, тізең, Неаполь саарда полғабыс.

¹² Андартын Филипп саарзар читкебіс. Ол Македон чирінің пу чардығындағы пастағы саар полған паза Рим колониязы полған. Анда піс анҷа-мынҷа кӱн полғабыс.

¹³ Субботада піс саар тастындағы суғ хазынзар парғабыс, хайда иудейлернің кибірі хоостыра Худайға пазырҷаң чир пар поладыр. Анда одырып алып, чыылыс парған ипчілернең чоохтасхабыс.

¹⁴ Оларның аразында Фиатир саардаң аарлығ хызыл ис сатчаң паза Худайны улуғлапчатхан Лидий тіп пір ипчі истіп одырған. Хан Худай, тізең, Павелнің чооғын оңарзын тіп, ол ипчінің чӱреен ас пирген.

¹⁵ Лидий, ибдегілерінең хада кіреске тӱскен соонда, теен: – Мині Хан Худайның сын кізізі тіп сағынчатсаңар, турамзар кіріп, минде чуртап алыңар. Іди ол пісті чӧптеп алған.

Павелнең Силаның харибге чаптырғаны

¹⁶ Пірсінде піс пазырҷаң чирзер парчатханда, нымысчы хыс тоғас парған. Ол полар нимені кӧзітчеткен хутха хаптырт салтыр. Іди ухаанҷылап, ол хыс ээлерін уғаа пайытчатхан.

¹⁷ Павелнің паза пістің сообысча киліп, ол хыс хысхырған: – Пу кізілер Ӧӧркі Худай нымысчылары. Олар піске арачыланыс чолынаңар искірчелер.

¹⁸ Іди ол хыс кӧп кӱн ит турған. Павел, тарын парып, айнаа айланып, теен: – Иисус Христостың адынаң тіпчем сағаа, сых аннаң! Олох туста чабал хут хыстаң сых чӧрібіскен.

¹⁹ Пайаағы хыстың ээлері, пайыҷаң оңдайлары чох пол парғанын кӧріп, Павелнең Силаны, тудып алып, чыылығлар иртірҷең чирзер алдыра пастыхтарзар сӧзір сыхханнар.

²⁰ Оларны пастыхтарынзар ағыл киліп, тееннер: – Пу иудей полчатхан кізілер пістің саардағыларны ай-пораан итчелер.

²¹ Олар мында піске, римдегілерге, чаразарға даа, толдырарға даа киліспинчеткен кибірлерні ӱгрет парчалар.

²² Кізілер дее олардаң тоғыр пол сыхханнар. Пастыхтар, тізең, Павелнең Силаның кип-азахтарын суура тартып, оларны сымыхнаң соғарға чахааннар.

²³ Соғып-соғып алып, тізең, оларны харибге чаап салғаннар. Андағы хадағҷаа оларны сиргек хадарарға чахааннар.

²⁴ Андағ чахығ алып алып, хадағҷы, оларны істіндегі пӧлікте пиктеп, азахтарына ағас кізен кизірт салған.

²⁵ Орты хараа тузында Павелнең Сила, пазырып, Худайны саблапчатхан сарыннарын сарнааннар, харибдегілер, тізең, оларны искеннер.

²⁶ Кинетін чирнің уғаа тың тітіреп сыхханына хариб тӧзінең прай чайхала тӱскен, анаң прай ізіктер аза чачырааннар, прайларының ілҷірбелері пос-пас тӱс парғаннар.

²⁷ Хариб хадағҷызы, усхун киліп, кӧрзе, прай ізіктер азых. Анаң, харибдегілер тис парыбысхан поларлар тіп, ол, хылызын сығара тартып, позын сазыбызарға иткен.

²⁸ Че Павел, тыыда чоохтанып, аны тохтадыбысхан: – Позыңа хомай ниме итпе. Піс прайзыбыс мындабыс.

²⁹ Хадағҷы, чарытхы ағылдырып алып, хариб істінзер кире ойлаан, анаң, тітірезіп ала, Павелнең Силаның азағынзар тӱскен.

³⁰ Анаң оларны харибдең сығар парыбызып: – Пиглерім! Арачылан халар ӱчӱн, ниме идерге кирек мағаа? – тіп сурған ол. –

³¹ Иисус Христос Хан-пиге киртін, андада позың даа, прай тураң даа арачылан халарзар, – нандырғаннар ағаа олар.

³² Анаң Хан Худай сӧзіне аны паза аның туразында полған прай кізілерні ӱгреткеннер.

³³ Хадағҷы олох туста хараазын, оларны сығарып, палығларын чууп пирген, анаң позы даа, аның ибдегілері дее сах андох кіреске тӱскеннер.

³⁴ Анаң, оларны ибінзер ағылып, стол кистіне одыртып, сыйлаан, позының паза ибдегілерінің Худайға киртін сыхханнарына ӧрінген.

³⁵ Кӱнӧрте пол килгенде, саар пастыхтары, нымысчыларын хадағҷызар ызып, тееннер: – Ол кізілерні позыдыбыс. –

³⁶ Пастыхтар сірерні позыдыбыс тіп кізі ыстылар. Амды, мыннаң сығып, амыр-хазых чӧріңер, – искірген Павелге хариб хадағҷызы. –

³⁷ Пісті, Рим кізілерін, чарғы даа чох, чон кӧзіне чыртып, харибге чапханнар. Амды, тізең, сым-туюххан позытчалар? Чох, постары киліп, позыдыбыссыннар пісті, – теен оларға Павел.

³⁸ Нымысчылар, парып, ол сӧстерні саар пастыхтарына читір пиргенде, анзылары, пуларның Рим кізілері полчатханнарын истіп, хорых парғаннар.

³⁹ Киліп, тізең, оларның алнында пыросынғаннар, анаң, тастынзар сығарып, саардаң парыбызыңар тіп сурынғаннар.

⁴⁰ Олар, тізең, харибдең сығып, Лидийзер килгеннер, анда киртінісче харындастарны кӧр салып, оларны ӱгредіп, саардаң чӧре халғаннар.