Илҷілернің 15 - Наа Молҷағ

Иерусалимдегі чыылығ

¹ Иудей чирінең килген кізілернің хай піреезі харындастарны, Моисей Чахии хоостыра сӱннет итпезеңер, арачылан полбассар тіп, ӱгреткеннер.

² Че Павелнең Варнава ол кізілернең, чараспин, тың тартыс салғаннар. Андада пу кирек хоостыра Павелнең Варнаваны, ідӧк постарының аразынаң хай пірее пасха даа киртінчеткеннерні Иерусалимдегі илҷілерзер паза тигіриб ах сағалларынзар ызарға чарат салғаннар.

³ Павелнең Варнава, тигіриб чонына ӱдестіртіп алып, Финикий паза Самар чирлерінҷе ирткеннер, андағы чонға иудей ниместернің Худайға киртін сыхханнарынаңар чоохтап, прай киртінчеткеннерні уғаа тың ӧріндіргеннер.

⁴ Иерусалимзер чит килгеннерінде, оларны тигіриб чоны, илҷілер паза тигіриб ах сағаллары удурлааннар. Павелнең Варнава Худай постарынаң ниме иткенінеңер паза иудей ниместерге киртініссер ізік ас пиргенінеңер оларға прай искір пиргеннер.

⁵ Андада фарисейлернің пірігізіндегі киртінчеткен кізілернің хай піреезі, тура хонып, иудей ниместерге сӱннет идерге паза Моисей Чахиинҷа чуртирға кирек тіп чоохтанған.

⁶ Илҷілер паза тигіриб ах сағаллары ол киректі ӱзӱрерге чыылыс парғаннар.

⁷ Ӱр ӱзӱрген соонда, Пётр, тур киліп, оларға чоохтаан: – Харындастар! Сірер пілчезер, иң пастабох Худай, иудей ниместер Чахсы Хабарны миннең истіп, Худайға киртін сыхсыннар тіп, пістің арабыстаң мині таллап алған.

⁸ Кізілер сағызын пілчеткен Худай, иудей ниместерге піскеӧк чіли Худай Худын сыйлап, оларны Позына алчатханын киречілеен.

⁹ Пірдеебісті пасхалабин, иудей ниместернің чӱректерін киртініснең арығлабысхан.

¹⁰ Амды ноға сірер Худайны сынапчазар? Ӱгренҷілернің мойныларына пістің ӧбекелерібіс тее паза піс тее апар полбаан чӱкті сал пирерге кӱстенчезер?

¹¹ Че піс оларох чіли Хан-пигібіс Иисус Христостың паарсазынаң арачылан халарыбысха киртінчебіс.

¹² Анаң чыылған чон, тымыл парып, Варнаванаң Павелні искен. Олар хайди Худай оларнаң пастыра иудей ниместернің аразында хайхастар паза танығлар иткенінеңер чоохтааннар.

¹³ Анаң олар тохтап парғанда, Иаков, чооғын пастап, теен: – Харындастар! Истіңер мині.

¹⁴ Симон чарыт пирген, хайди Худай пастап иудей ниместердең Позының чонын идіп аларына хайығ салған.

¹⁵ Анзынаң ухаанҷыларның сӧстері дее чарасчалар, аннаңар піди пазылған полған:

¹⁶ «Анаң, айлан киліп, Давидтің хыйын тӱскен чуртын, нааҷылап саларбын. Иңзеріл парған нимелерін, прай тыхтап, тӱзет саларбын.

¹⁷ Аннаңар пасха кізілер паза прай чоннар, кемні Мин Позыма чоным идінерге хығырғам, Хан Худайны тілирлер, – тіпче прай пу нимені чайапчатхан Хан Худай». –

¹⁸ Худайға Позының хас-хаҷаннаң итчеткен киректері прайзы пілдістіг.

¹⁹ Аннаңар, сағынчам, Худайға айланчатхан иудей ниместерге харығ полбасха кирек.

²⁰ Че оларға піди пас пирерге кирек – чой худайларға салылған чиисті чібеске, чӧреес хылыхтығ полбасха, поо пазылған малның идін чібеске паза ханны іспеске, постары хынминчатхан нимелерні пасхаларына итпеске.

²¹ Моисей Чахиин хас-хаҷаннаң пеер полған на саарның синагогаларында хығырадырлар, аның сӧстерін суббота сай искіредірлер нооза.

Иудей ниместерге пічік ысханы

²² Андада илҷілер паза ах сағаллар, прай тигіриб чонынаң чӧптезіп алып, постарының аразынаң нинҷе-де кізі таллап алғаннар, анаң оларны Антиох саарзар Павелнең паза Варнаванаң хада ызарға чарат салғаннар. Оларның пірсі Варсава тіп солалығ Иуда, ікінҷізі Сила полған. Олар киртінчеткен харындастарның аразында пастыхтар полғаннар.

²³ Олар мындағ пічік пас пиргеннер: «Илҷілер, тигіриб ах сағаллары паза харындастар Антиох саарда, Сирий паза Киликий чирлерінде чуртапчатхан иудей нимес чоннардаң сыххан харындастарға чолабит ысчабыс!

²⁴ Пістің арабыстаң парған хай пірее кізілер, сӱннет итчең кибірні тудып, Моисей Чахиинҷа чуртирға кирек тіп, сірерні сағыссырат салғаннарын искебіс. Піс оларға андағ нимені чахыбаабыс.

²⁵ Аннаңар піс, мында чыылызып, аарлығ Варнаванаң паза Павелнең хада сірерзер позыбыс таллап алған кізілерібісті ызарға чарат салғабыс.

²⁶ Ол кізілер Хан-пигібіс Иисус Христос ӱчӱн постарының тыннарына даа айабааннар.

²⁷ Аннаңар піс сірерзер Иуданы паза Силаны ысчабыс. Олар піс пасхан нимелерні сӧстернең чарыт пирерлер.

²⁸ Худай Худы даа, піс тее сірерге пасха чӱк артарға пір дее кирек чоғыл тіп сағынчабыс, че пу ла иң кирек нимелерні:

²⁹ чой худайларға тайығ идіп салған чиисті, поо пазылған малларның идін паза ханны чібеңер, чӧреес хылыхтығ полбаңар паза постарың хынминчатхан нимені пасхаларына даа итпин турыңар. Пу нимені толдырзаңар, орта идерзер. Хазых полыңар».

³⁰ Ысхан кізілер, Антиох саарзар чидіп, кізілерні чыып алып, пу пічікті пирібіскеннер.

³¹ Мындағы чон, ол пічікті хығырып, чахығларға ӧрінген.

³² Иуданаң Сила, ухаанҷылар полғаннарынаңар, мындағы харындастарны кӧп ӱгредіп, оларның киртіністерін тыытханнар.

³³ Анда анҷа-мынҷа полып алған соонда, харындастарны нандыра, оларны пеер ысханнарзар, амыр хоных алғап, позыдыбысханнар.

³⁴ Че Сила анда халарға сағыныбысхан, Иуда, тізең, Иерусалимзер айланған.

Павелнең Варнаваның чарылысханы

³⁵ Павелнең Варнава Антиох саарда чуртааннар. Олар паза пасха кӧп ӱгретчілер, кізілерні Хан Худай сӧзіне ӱгредіп, Чахсы Хабарны искіргеннер.

³⁶ Нинҷе-де тус ирткенде, Павел Варнаваа теен: – Хан Худай сӧзін искірген прай саарларыбысча хатап чӧр киліп, Худайға киртінчеткеннер хайди чуртапчатханнарын кӧр килең.

³⁷ Варнава позынаң хада Марк тіп солалығ Иоанны алып аларға сағынған.

³⁸ Че Павел постарынаң Памфилийде чарыл парыбысхан, паза итчең тоғыстарында араласпаан Иоанны хада аларға хынмаан.

³⁹ Анзынаң талаза халып, олар чарылыс парғаннар. Варнава, Маркты хада алып, Кипрзер кис парыбысхан.

⁴⁰ Павел, тізең, Силаны таллап алған, анаң харындастар пастыра Худай алғазын алып, чорыхха сығыбысхан.

⁴¹ Олар, Сирий паза Киликий чирлерінҷе чӧріп, андағы тигіриб чонының киртіністерін тыытханнар.