Илҷілернің 10 - Наа Молҷағ

Пётрнаң Корнилий

¹ Кесар саарда Италий тіп адалчатхан полктың чӱспазы Корнилий тіп кізі полған.

² Ол Худайны аарлаачы паза Аннаң чалтанаачы кізі полған. Ол иудейлерге кӧп чахсы иткен. Ол прай туған-чағыннарынаң хада Худайға сыбыра пазырҷаң.

³ Кӱнӧрте тоғыс час тузында Корнилийге Худай ангелінің позынзар кір килгені хараана кӧрін парған. Ол ағаа теен: – Корнилий!

⁴ Ол, тізең, андар кӧрібізіп, хорых парып, теен: – Ноо ниме, пигім? Ангел ағаа нандырған: – Синің кізілерге чахсы иткеніңні паза пазырғаныңны Худай сағысха кир килген.

⁵ Син, Иоппи саарзар кізілер ызып, Пётр тіп солалығ Симонны хығыртыбыс.

⁶ Ол туразы талай хазында турчатхан Симонда, тууп истеҷең кізіде, ааллапча. Пётр сағаа позыңны паза прай тураңны арачылап алҷаң сӧстер чоохтап пирер.

⁷ Корнилийнең чоохтасчатхан ангел паза халғанда, Корнилий нымысчыларынаң ікізін паза позынаң хада чӧрчеткен Худай киртіністіг пір чааҷыны хығыртыбысхан.

⁸ Анаң, оларға прай нимедеңер чоохтап пиріп, оларны Иоппизер ызыбысхан.

⁹ Пазағы кӱн, олар Иоппи саарға чағдап одырғанда, Пётр, кӱн ортызына чағыннапчатхан туста, тура ӱстӱнзер пазырарға сыххан.

¹⁰ Аның, астап, азыранары килген. Чіҷең ниме иділчеткен аразында, ағаа хараана ниме кӧрінген.

¹¹ Кӧрзе, тигір азыл килтір, андартын хайдағ-да иске тӧӧй ниме тӧрт пулиинаң палғалған чіли чирзер алдыра тӱсче.

¹² Анда тӧрт азахтығ аймах-пасха маллар, чылысхылар паза хустар полғаннар.

¹³ Анаң ағаа ӱн истілген: – Пётр, тур, соғып алып, чі. –

¹⁴ Чох, Хан Худайым! Мин хаҷан даа чиркестігні алай кірлігні чібеем, – теен Пётр.

¹⁵ Андада ӱн хатап истілген: – Худай арығлаан нимені син кірліге санаба.

¹⁶ Іди ӱс хати полған. Анаң ол ниме хатап тигірзер кӧдіріле халған.

¹⁷ Пётр, хараана кӧрінгені ниме ниме полҷаң тіп, позы алынҷа сағысха тӱскен аразында Корнилийнің ысхан кізілері, Симонның туразынаңар кізілердең сурастырғлап ала, ізік хыринда тур салғаннар. –

¹⁸ Пётр тіп солалығ Симон мында ба? – хысхырып, сурғаннар олар.

¹⁹ Пётр кӧрізінеңер сағын турчатхан аразында, Худай Худы ағаа теен: – Мына ӱс кізі сині тілепче.

²⁰ Тур, оларзар тӱзіп, пір дее ікінҷілебин, оларнаң хада пар. Оларны Мин ысхам нооза.

²¹ Пётр, Корнилий позынзар ысхан кізілерзер тӱс киліп, теен: – Сірер сурчатхан кізі – минмін. Хайдағ кирекнең чӧрчезер? –

²² Чӱспазы Корнилий, арығ чӱректіг, Худайға киртінчеткен паза прай иудей чонына улуғлатчатхан кізі ах-арығ ангелінең чахығ алтыр: сині ибінзер хығырып, чооғыңны истіп аларға, – нандырғаннар олар.

²³ Андада Пётр оларны, тураа киріп, сыйлаан. Пазағы кӱн, тізең, Пётр оларнаң хада Кесар саарзар сығыбысхан. Оларнаң хада Иоппидең хай пірее киртінчеткеннер парғаннарох.

²⁴ Ікінҷі кӱнінде олар Кесар саарға читкеннер. Корнилий, тізең, туғаннарын паза чағын арғыстарын хығырып алып, оларны сағыпчатхан.

²⁵ Пётр кірчеткенде, Корнилий, тізекке тӱзіп, аны удурлап, пазыра мӧкейген.

²⁶ Пётр, тізең «Тур, мин дее кізілебін» тіп, аны турғысхан.

²⁷ Анаң Пётр, аннаң чоохтазып ала тураа кіріп, тураа кізі кӧп чыыл парғанын кӧр салған.

²⁸ Пётр оларға теен: – Иудей кізее иудей ниместернең тоғазарға паза чағынназарға чарабинчатханын сірер пілчезер. Че Худай мағаа пір дее кізіні чиркестіг алай кірліг тіп санабазын ас пирген.

²⁹ Аннаңар мин, сірер хығырғанда, пір дее таласпин килдім. Че хайдағ кирекнең мині хығырдыңар тіп сурапчам.

³⁰ Корнилий чоохтанған: – Ӱс кӱн мының алнында мин пуох тусха теере ораза тутхам паза позымның турамда кӱнӧрте тоғыс час тузында пазырчатхам, кинетін алнымда пызыңнаас кип-азахтығ кізі тура тӱскен.

³¹ Анаң тіпче: «Корнилий! Худай синің пазырғаныңны ис салған паза кізілерге чахсы иткеніңні сағысха кирген.

³² Амды, Иоппи саарзар кізілер ызып, Пётр тіп солалығ Симонны хығырып ал. Ол Пётр талай хазында чуртапчатхан тууп истеҷең Симонның туразында ааллапча. Ол, киліп, сағаа чоохтир».

³³ Мин сах андох синзер кізілер ысхам. Син, пеер киліп, чахсы иттің. Амды, Худайның сағаа чахаан нимелерінің прайзын истіп аларға тіп, піс прайзыбыс Худай алнында турчабыс.

Пётрның ӱгредии

³⁴ Пётр чоохтан сыххан: – Худайның прай чоннарға пір син хайчатханын амды сынап кӧрчем.

³⁵ Аймах-пасха чоннарда Аны улуғлапчатханнар паза орта ниме итчеткеннер Худайның кӧңніне кірче.

³⁶ Ол Израиль чонына амыр хоныхтаңар Чахсы Хабарны Иисус Христос пастыра ыс пирген. Пу Иисус прайзының Хан-пигі полча.

³⁷ Иоанн кізілерні кіреске тӱзерге ӱгреткен соонда, Галилей чирінең пастади, прай Иудей чирінде ниме полғанын сірер пілчезер.

³⁸ Хайди Худай Позының Худын паза кӱзін Назареттегі Иисусха пиргенін, пілчезер. Иисус, тізең, Худай Анынаң хада полғаннаңар, кізілер аразынҷа чӧріп, чахсы нимелер иткен паза сайтанға хаптырғаннарның прайзын имнебіс турған.

³⁹ Піс, тізең, Иисустың Иудей чирінде паза Иерусалимде иткен нимелерінің прайзын киречілепчебіс, ідӧк кіреске хазатыртып ӧдірткенін дее киречілепчебіс.

⁴⁰ Худай Аны, ӱзінҷі кӱнінде тірілдіріп, харахха кӧрінер ит салған.

⁴¹ Прай чонға нимес, че піске ле, Худай таллаан киречілерге, піске, кем Иисуснаң хада, Аның ӧлімнең тірілгені соонда, азыранып, іскен.

⁴² Иисус піске чахаан: кізілерні ӱгредіп, Позының тіріг паза ӧліг кізілерге Худай турғысхан Чарғыҷы полчатханын киречілирге.

⁴³ Прай ухаанҷылар киречілепчелер Иисустаңар паза Ағаа киртінчеткен полған на кізінің чазыхтардаң Аның адынаң позып поларынаңар.

Иудей ниместерге Худай Худының тӱскені

⁴⁴ Пётр іди чоохтанчатхан тустох аны исчеткеннернің прайзына Худай Худы тӱскен.

⁴⁵ Пётрнаң хада килген киртінчеткен иудейлер, Худай Худының сыйии иудей ниместерге дее пирілчеткенін кӧріп, хахап парғаннар.

⁴⁶ Олар, иудей ниместернің пасха-пасха тіллернең чоохтазып, Худайны махтапчатханнарын искеннер нооза. Андада Пётр теен: –

⁴⁷ Пізӧк чіли Худай Худын алған кізілерге суғда кіреске тӱзерге кем чаратпас?

⁴⁸ Анаң Пётр оларға Иисус Христостың адынаң кіреске тӱзерге чахаан. Соонаң олар Пётрны постарында кӧп нимес кӱн полып аларға сурынғаннар.